نووری چەلیک
ئیرۆ باشوورێ کوردستانێ کەڤرێن داوییێ نەتەودەولەتا سەربخوە دادنیت؛ بنگەهێن پێشەرۆژا سەرخوەبوونا کوردستانێ ل وی بەشی دهێنە دانان.
دڤێت ئەڤ مەشا مقەدەس، سەربلندی و کاما دلێ ھەر کوردەکێ بیت؛ ھەر کوردەک دەستێ هاریکاریێ و پشتگریێ درێژی ڤی بەشی بکەت دا کو رۆژەک بەری رۆژەکێ کورد چارەنووسا خوە ب دەستێ خوە بنڤیسن.
د دەمەک وەک ئیرۆ دا، کو داگیرکەرێن کوردستانێ ب ھەر شێوەیی ئێریشی باشوور دکەن و دخوازن دەستکەفتیێن ھەیی ژ ھۆلێ راکەن، مافێ چ کوردەکی نینە کو ڤێ ئارامی و ئاھەنگییا ھەیی ژ بۆ بەرژەوەندییێن ئۆلی یان هەرێما خوە تەڤ بدەن.
دڤێر هەموو حیزب و دەزگەھێن کوردستانێ ژی ل گۆر ھەقیقەت و بەرژەوەندییێن کوردستانێ خزمەتێ بکەن. د ئاڤابوونا ھەر دەولەت و دەزگەھەکێ دا خەلەتی و کێماسی چێدبن.
سازکرن و برێکووپێکبوونا وێ دەولەتێ پیدڤی ب زەمانەکێ دوور و درێژ ھەیە.
ھەلبەت دڤێت ئەو خەلەتی یان کێماسییێن کو تێنە دیتن ب زمانەکێ برایەتی و دۆستانی بێنە رەخنە کرن.
لێ گاڤا رەخنە ژ رەخنەبوونا خوە دەرکەت و بوو چەکا پاراستنا بەرژەوەندییێن ھەرێمی، یان ژی پارتایەتی وی دەمی سنۆرێن رەخنەکرنێ ژ ھۆلێ تێنە راکرن و دژمناتی دەستپێدکەت.
ئەڤە ژی د خزمەتا دژمن و خێرنەخوازێن کورد و کوردستانێ دا یە.
ئەز باوەر ناکەم (ژ بلی سەرۆک و ھندەک رایەدارێن پەکەکێ) کوردەک رابیت و بێژیت: ”ئەز کوردستانەکا سەربخوە یان ژی فەدەرال ناخوازم”. د دلێ ھەر کوردێ دا خەون و خەیالا کوردستانا مەزن و یەکگرتی ھەیە.
لێ بارودۆخی ووسا کریە کو ئەم بخوازین و نەخوازین، کوردستان چار پارچەیە، کورد د وەلاتێن خوە دا ژ ھەڤ ھاتنە تاروومار کرن. 4 ھەرێمێن جودا و ھەر یەک ژ وان دخوازیت ب سەرێ خوە ببیتە ھەرێما سەرەکی.
گاڤا ئەم ھەژمارا کوردان بدەینە سەر ھەڤ، باکورێ کوردستانێ بەشێ ھەری مەزنە.
گاڤا ئەم ل گۆرا ھەژمارێ بلڤین، ھندەک دکارن بێژن دڤێت باکوری سەپەرشتیا کوردا بکەن.
لێ واقعێ ھەیی مرۆڤان ناچاری دیفاکتۆیا ھەیی دکەت کو ئەو ژی ئەوە کو ھەرێمەک ژ ھەرێمێن کوردستانێ ئازادیا خوە بدەست خستیە.
دڤێت ئەم کورد ڤێ دەستکەفتیێ د قادا ناڤخوەیی و ناڤدەولەتی دا باش ب کار بینین دا کو ھەرێمێن دی ژی ب کاربن وان دەستکەفتیا ب رێیەکا ھقوقی بێخنە رۆژەڤا جیھانێ.
کوردێ ل ھەرێمێن نە ئازاد کری د ڤی واری دا خوەدی مافن. لێ وەک مە ل ژۆر ژی باس کری، پارچەبوونا کوردستانێ کورد د ھەر واری دا تاروومار کرنە.
ژ بەر ڤێ ژی، دڤێت پەنجەرا رۆناھیا باشوورێ کوردستانێ وەک رۆناھیا چاڤان بهێتە پاراستن. و دڤێت ئەم چ فەرقیێ نەخینە ناڤبەرا نەتاوا خوە.
دڤێت ئیرۆ هەمو کوردستانی د بن ئالا و رێبەریا سرۆکێ کوردستانێ دا، ل دژی دەولەت و حیزبێن تەرۆریست دەست بدەنە ھەڤ و د ئاڤاکرنا کوردستانا ئازاد دا ببنە خوە پار.
چاوا کو سەرۆک مستەفا بارزانی د دەما خوە دا گۆتبوو: “چ کەسێ کو روحا نەتەوەپارێزی بۆ چێنەبووبیت، دێ رۆژەک ژ رۆژان خیانەتێ ل گەلێ خوە کەت” ئەڤ گۆتنە ژ بۆ ئیرۆ و ژ بۆ ھەر دەمی ژی دەرباس دبیت.
ئیرۆ پرسگرێکا سەرەکی یا د ناڤ کوردان دا، پرسگرێکا پەکەکێ و کوردێ دەرڤەیی پەکەکێ یە. ھەر چقاسی ھەبوونا پەکەکێ یا ل قەندیل و دەڤەرێن دی ژبۆ حکوومەتا کوردستانێ ژی سەرێشاندنەکێ ب خوە را بینیت ژی، دڤێت ژ باشوورییان زێدەتر ئەم کوردێن باکور سەرێ خوە ب ڤێ پرسگرێکێ بێشینن.
د داخویانی و ھەلوەستێن ھندەک رایەدارێن پەکەکێ دا دیار دبیت کو، شەرێ ل دژی دەولەتا تەرۆریست، چەتە و حیزبێن تەرۆریست دا ئالیکاریا ناڤدەولەتی، پەیوەندیێن ھەرێما کوردستانێ لگەل جیرانا دا ئەو نەرەحەت کرنە.
گەر پەکەکە بکاریت سەبەبێ نەرەحەتیا خوە ل سەر ئەساسێ کوردایەتی ژ بۆ حکوومەتا فەدەرەیا کوردستانێ بینیتە سەر زمان، ئەز باوەرم دێ وەک دەولەت، ھەرێما کوردستان ژی کاریت چارەسەریەکێ ژ بۆ نەرەحەتیا پەکەکێ بینیت.
ژ خوە بەیانێن سەرۆکێ کوردستانێ یێن د ڤی واری دا گەلەک زەلالن. سەرۆکێ کوردستانێ د ھەر فرسەندێ دا چارەسەریێ د ریا دیالۆگ و ریێن بێ چەک بوونێ و دەمۆکراتک دا تینیتە سەر زمان.
دڤێت ئەم باکوری ژ نھا دا بزانین کو ھەگەر سبە یان دوسبا باکورێ کوردستانێ ئازاد بوو، دێ ئەڤ پرسگرێکا پەکەکێ کو ئیرۆ ل رۆژئاڤا و باشوورێ کوردستانێ ب شەکلەکی کرێت خوە ل سەر ملەتێ کوردا فەرز دکەت ل باکور ژی دەستپێکەت.
پرسگرێکا ھەیی پرسگرێکا هەموو کوردستانێ ژی بیت، دڤێت ئەم باکوری ژ ئیرۆ دا ب بەرپرسیاری تەڤ بگەرین و خوەدی سیاسەتەکا نەتەوی بین.
یان نە سبە ئەم ژی دێ تووشی دژواریا پەکەکێ بین. و وێ گاڤێ ئەم ژی دێ تێکەڤن رەوشا کو نھا ل باشوور د ناڤبەرا داگیرکەرێن کوردستانێ و ھەموەلاتیێن وێ دا ھەیی دەردکەڤیتە ئۆرتێ. پرسگرێکا چارەسەریا پەکەکێ و خوەدیلێدەرکەتنا وێ، نە ئەرکێ باشوورە.
ھەگەر ل باشوور پرسگرێکا تونەکرنا پەکەکێ ھەبیت، ئەرکا دەستپێکێ دکەڤیتە سەر ملێن باکورییان ب خوە و دڤێت ئەو ل خوە و ل دەسکەفتیێن خوە خوەدی دەرکەڤن.
دڤێت د سەری دا پەکەکە، دەست ژ سیاسەتا توندوتیژیێ بەردەت و ب رێیێن دەمۆکراتیک ل چارەسەرییا دیالۆگا د ناڤ کوردان دا بگەریت.
لێ گاڤا پەکەکە وان دەستکەفتیێن کوردا بکەتە قوربانا شەخس یان ھەرێمەکێ (کارتۆن یان کانتۆنان) دڤێت ئەم کوردێن باکور ب دەنگەک بلند نە رازیبوونا خوە ل ھمبەر ھەلوستێن پەکەکێ یێن نە د بەرژەوەندیا ملەتێ کورد دا، بقێرین.
ئەو رۆژ ژی ئیرۆیە…. بەلا پەکەکە ژ نوو ڤە دەست ب شەرێ دەستکەفتیێن کوردستانا ئازاد بکەت. پەکەکە بوویە کەلەما چاڤێ کوردان.
پەکەکێ دەست و پست دایە داگیرکەرێن کوردستانێ و شەرێ پەدەکێ و رومەتا ملەتێ کورد مالباتا بارزانیان دکەت. پەکەکە شەرێ ھێژاییێن کوردان دکەت.
پەکەکێ ل سەر ناڤێ “پاراستنا ھەرێمێن مەدیا” دەڤەرەکا مەزن داگیر کریە و ل وان دەرا پێشمەرگەیان شەهید دکەت. پەکەکە ب ناڤێ ھەرێمێن خوەسەر پارچە کرنا کوردستانێ ژ بۆ خوە کریە بنگەهـ.
ب کوورت کورمانجی؛ پەکەکێ سوندا تار و مار کرنا کوردستانێ خواریە. ژ بەر وێ یەکێ ژی دڤێت هەموو کورد ب دەنگەکێ بلند بقیرن و ببێژن ئێدی بەسە زلم و دەک و دۆلابێن پەکەکێ.
