8 سال سەر رەڤاندنا ئەندامەکێ پارتیا دەمۆکراتا کوردستان–سووریا ژ لایێ چەکدارێن پەیەدێ ل تاخەکێ حەلەبێ دەرباس دبن، و تا نھا تو دانپێدان ژ پەیەدێ دەربارێ گرتنا وی دا نەھاتینە دان، و مالباتا وی جارەکا دی بانگا خوە نوو کر، دا کو چارەنڤیسا وی دیار بکەن.
د 10ێ مەھا 9 سالا 2013ێ دا گرووپەک ژ چەکدارێن پەیەدێ ئەحمەد سیدۆ ئەندامێ پەدەکە-سێ ل تاخێ شێخ مەقسوودا حەلەبێ ل پێش مالا وی رەڤاند و بەرەڤ جھەکی نەدیار ڤە بر، و تا نھا چ نووچە دەربارێ ژیانا وی دا دەرنەکەتینە.
تەڤی ھەولێن بەردەوام ژ مالباتا ئەحمەد سیدۆ ژ بۆ دیارکرنا چارەنڤیسا وی، لێ تا نھا و پشتی دەرباسبوونا 8 سالان سەر رەڤاندنا سیدۆ دا، چ زانیاری ل سەر وی د دەست دا نینە، ئەگەر ھێژان د ژیانێ دا مایە یان ھاتیە تەرۆرکرن و د سالڤەگەرا 8ێ دا مالباتێ بانگا خوە گھاندە ئالیێن پەیوەندیدار و بەرپرسیار دا کو ببنە ئالیکار و چارەنڤیسا ئەحمەد سیدۆ ئاشکەرا بکەن و بانگا سەربەستبەردانا ھەموو گرتیان ژ زیندانێن رژیمێ، پەیەدێ و کۆمێن چەکدار کر.
ئەحمەد سیدۆ ژ خەلکێ گوندێ حسێ یێ ناڤچەیا مابەتا یا عەفرینێ یە، و نیشتەجیێ تاخا شێخ مەقسوود بوو، ناڤێ وی د ناڤا لیستەیا کو ئەنەکەسێ رادەستی فەرمانداریا قەسەدێ کریە دا هەیە کو چارەنڤیسا وان دیار بکەن و سەربەستبەردەن. د ناڤا لیستەیێ دا، ژ بلی سیدۆ ھەر یەک ژ: (بەھزاد دۆرسن/ ئەندامێ پۆلیتبیرۆیا پەدەکە-سێ، نیدال عۆسمان/ ئەندامێ رێخستنا دێرکێ یا پەدەکە-سێ، جەمیل عومەر/ ئەندامێ یەکیتیا دەمۆکراتا کورد ل سووریێ، ئدریس ئەلۆ/ ئەندامێ رێخستنا عەفرینێ یا پەدەکە-سێ، فووئاد ئیبراھیم/ ئەندامێ ئەمینداریا گشتی یا ئەنەکەسێ، ئەمیر حامد: ئەندامێ رێخستنا سۆز) ھەنە، لێ ل شوونا سەربەست بەردان، ئاستا کریارێن خوە د دەرحەقێ ئەنەکەسێ دا بلند کریە و چەندین ناڤێن دی ژ بۆ رۆژنامەڤان و چالاکڤانان زێدە کرن وەکو:
محەمەد دەھام ئەیۆ، ئەندامێ دەستەیا راوێژکاریا پەدەکە-سێ
عەبدولغەفار محەمەد، ئەندامێ ئەنجوومەنا ھەرێمی یا پەدەکە-سێ
محەمەد ئەحمەد سالح، ئەندامێ ئەنجوومەنا ھەرێمی یا پەدەکە-سێ
فەرامەز عەبدولکەریم حەجی عەبدی، ئەندامێ ئەنجوومەنا شاخییا پەدەکە-سێ
بەرزان حسێن، ئەندامێ ئەنجوومەنا شاخییا پەدەکە-سێ
تەڤی بانگێن بەردەوام ژ بۆ ئاشکەراکرنا شوون و جھێن وان، لێ پەیەدێ تا نھا چ دانپێدان نەکریە کو بەرپرسە د بەر رەڤاندن وان دا، بەرووڤاژی وێ یەکێ رۆژ ب رۆژ کریارێن خوە دژی تەڤگەرا سیاسی یا نە ل گۆری ھزرا وان گورتر دکەن.
