ز. بریندار
ئیرۆ چاپەمەنییا کو ب دەرفەتێن پارتییێن وەک پەدەکێ و ب ناڤێ “چاپەمەنییا ئازاد” ل باشوورێ کوردستانێ وەشانێ دکەن، ژ وەشانێن نەتەوی دوور، نە د خزمەتا بەرژەوەندییێن پەدەکێ و باشوورێ کوردستانێ دا نە. ژ پەدەکێ و بەرژەوەندییێن باشوور زێدەتر بوونە بەردەڤکێن پارتییێن وەک پەکەکێ و پەیەدێ و ژ پشت ڤە خەنجەرێ ل پشتا خوەدییێ خوە ددەن.
گەلەک جاران د سەرکەفتنێ دا مرۆڤ سەرخوەش دبیت و سەر خوە دا دچیت. د ڤێ سەرخوەشبوونێ دا گەلەک تشت ژ بەر چاڤا وەندا دبن و مرۆڤ نابینیت، یان ژی ناخوازیت ببینیت.
ئاڤاکرنا وەلات یان دەولەتەکێ ھەلبەت نە ھێسانە. د پێڤاژۆیا ئاڤاکرنا وەلاتەکێ دا گەلەک زەحمەت، پرسگرێک و ئالۆزی دەردکەڤنە پێش. ژ بەر کو د دەستپێکێ دا بنیاتێن ساخلەم و ستوونێن پەتەو نایێنە دانین، زەحمەتی و پرسگرێک بنیاتێن وی وەلاتی یان بنگەھا وێ دەولەتێ دھەژینن و ھەفسار ژ دەستێ مرۆڤی دەردکەڤیت. سوارێ کو ھەفساری سست بکەت یان ھەفسار ژ دەستێ وی دەرکەڤیت، زوو ب زوو نکاریت سەرێ ھەسپێ خوە بگریت. د ئەنجامێ دا یان ژ ھەسپی دکەڤیت، یان ژی ھەسپێ وی بەرێ خوە ددەتە رێ و ئارمانجەکا دی. یانی، سوارێ کو نە هشک و پیچەکی دیکتاتۆر نەبیت نکاریت سەرێ ھەسپێ خوە بگریت.
د وەلاتێن پاشدامایی دا و ب تایبەت ل رۆژھلاتا ناڤین، دەمۆکراسی وەک بەردانا سەرێ ھەفسارێ ھەسپی یە. ھەتا تو دەولەتا خوە ل سەر بنگەهـ و ئەساسێن ساخلەم و زەخم نەدەیە روونشتاندن، ھەتا تو دەم و دەزگەھێن دەولەتا خوە ل سەر ئەساس و بیر و باوەرێن نەتەوی ئاڤا نەکەی، دێ ھەر تشت سەقەت و لەنگ بمەشیت و دێ ھەفسارێ جڤاتێ ژ دەستێ تە دەرکەڤیت. باشوورێ کوردستانێ ئیرۆ د ڤێ رەوشێ دایە. ژ بەر کو د دەستپێکێ دا ھیم و ستوونێن ساخلەم نەھاتنە دانین و دام و دەزگەھێن کو دەولەتێ ل سەر پییان دگرن نەھاتنە سازکرن، رێڤەبەری و دەزگەھێن ھەیی ژی نکارن کار و ئەرکێن خوە ل گۆر یاسایێن دەولەتێ برێڤە ببەن. ئەڤ یەک ژی رێ ددەت کو پارتی، مالبات، عەشیر و ھەتتا کەسێن سەربخوە ژی رێزێ ژ دەزگەھێن ھەیی نەگرن و ژ بۆ تێکبرنا وان دەزگەھان ھەر کارێ کرێت و خراب بکەن.
گاڤا ئەم تێین و بالا خوە ددەینە رەوشا ھەر چار پارچەیێن کوردستانێ، دبینین کو ئەم کورد ژ قالبێن مالباتی، عەشیرتی و حزبایەتی دەرنەکەتنە، ھزرا نەتەوی و نەتەوپارێزییێ د مەژی و گیانێ مە دا نەمەیایە، بەرەڤ پێش نەچوویە و ژ بەر ڤێ ژی ئەم نەبووینە مللەت. ھەر چقاسی ئەم خوە وەک مللەت ببینین و پەسنا خوە بدەین ژی، ب کریار، ھەست، فکر و ھزرا خوە ئەم ژ شەرت و مەرجیێن مللەتبوونێ دوورین. ھەم پارچەبوونا وەلاتێ مە ئەم ژ پیڤانێن مللەتبوونێ دوور خستینە، ھەم چاند و زمانێ مە. د ئەنجاما نەبوونا ڤان کریتەران دا بێگومان د سیاسەتێ دا ژی پیڤانێن مللەتبوون و نەتەوپەروەرییێ ئەم ژ ھەڤ دوور خستینە. نەبوون یان ژی کێمبوونا پیڤانێن مللەتبوون و نەتەوبوونێ، باندۆرەکا نەرینی ل ھەست و ھزرا مە و ھەروەھا ل سیاسەتا مە ژی دکەت. ژ بەر نەبوون یان ژی کێمبوونا پیڤانێن مللەتبوون و نەتەوبوونێ، ئەم د کاروبارێن خوەیێن حیزبی، مالباتی، عەشیرتی و رێخستنی دا ژی بسەر ناکەڤین و ھەر تشتێ مە نیڤجۆ دمەشیت. د سیاسەتێ دا ژی ب ڤی ئاوایە، د رێڤەبرنا دام و دەزگەھان دا ژی.
د ئەنجاما تەکۆشینەک دەمدرێژ و بەدیلەک پر گران دا پارچەیەک وەلاتێ مە نیڤ ئازاد بوو و باشوورێ کوردستانێ بوو فەدەراسیۆن. ب پێلدانا ئالا رەنگین، ب حکوومەتا خوە، ب دەم و دەزگەھێن خوە، ب پێشمەرگە و ھێزێن ئەولەکارییا خوە، باش یان خراب وەک نیڤ دەولەتەکێ ب رێڤە دچیت. خوەدیلێدەرکەتن و پاراستنا پارچەیەکا ئازاد بێگومان ئەرک و وەزیفەیا ھەر کوردێ وەلاتپەروەرە. ئەڤە تشتەکێ دییە. ژ ڤێ زێدەتر، خوەدیلێدەرکەتن و پاراستنا وێ پارچەیا ئازاد ژ ھەرکەسی زێدەتر ئەرک و وەزیفەیا پارتی و دەزگەھێن وێ پارچەیێ نە. ئەرک و وەزیفەیا ھێزێن وێ پارچەیێ نە. ئەڤە ژی بێگ ومان ب ئارتێشەک یەکگرتی، نەتەوی و خورت و ب پەروەردەیەک نەتەوی و نەتەوپەرەستی پێک دهێت. ھەگەر ئارتێش و دەزگەھ ژ بن باندۆرا پارتییان دەرنەکەڤن و وەک بەشەک ژ پارتییان بخەبتن، نە دکارن ئەرکێن خوە ب جیھ بینن، نە ژی دکارن دەولەتەک ساخلەم ئاڤا بکەن. چاپەمەنی ژی ب ڤی رەنگی یە. چاپەمەنییا کو نە د خزمەتا بەرژەوەندییێن مللەت و دەولەتا خوە دا بیت، نکاریت فایدەیێ بگھینتە مللەتێ کورد. چاپەمەنییا کو ب ھزر و ھەستێن نەتەوی وەشانێ نەکەت و خوەدی ل بەرژەوەندییێن کوردستانێ دەرنەکەڤیت، دێ ژ خێرێ زێدەتر زیانێ گەهینتە رێڤەبەری، دەزگەھ و دەستکەفتییێن ھەیی.
ئیرۆ چاپەمەنییا کو ب پارە و دەرفەتێن پارتییێن وەک پەدەکێ و ب ناڤێ “چاپەمەنییا ئازاد” ل باشوورێ کوردستانێ وەشانێ دکەن، ژ وەشانێن نەتەوی دوور، نە د خزمەتا بەرژەوەندییێن پەدەکێ و باشوورێ کوردستانێ دا نە. ژ پەدەکێ و بەرژەوەندییێن باشوور زێدەتر بوونە بەردەڤکێن پارتییێن وەک پەکەکێ و پەیەدێ و ژ پشت ڤە خەنجەرێ ل پشتا خوەدییێ خوە ددەن. ئەڤ یەک ژی بێگومان ئەنجاما “دەمۆکراسی” و “ئازادییا ” بێ سەر و بەرە.
ئەنجامەک دی یا “دەمۆکراسی و ئازادییا بێ سەر و بەر” ژی ھەبوون و رەوشا پەکەکێ ب خوەیە.
ل چ وەلاتەکێ دنیایێ ئازادی و دەمۆکراسییەک بێ سنۆر نینە. ئازادی و دەمۆکراسییا بێ سنۆر لگەل خوە دا ئالۆزی و ئانارشیزمێ ژی تینت. د دەولەتەک سەربخوە دا ھەلبەت دڤێت ئازادی و دەمۆکراسی ھەبیت. لێ د رەوشا ئیرۆ دا ئازادی و دەمۆکراسییا بێ سنۆر ژ بۆ باشوورێ کوردستانێ مەترسی یە، وەک بەردانا ھەفسارێ ھەسپی یە. ھەگەر ژ رۆژا رۆژ دا ھندەک خال و سنۆرێن توند ھاتبانا دانین و ھەفسارێ ھەسپی زێدە نەھاتبا سستکرن، بەلکی ئیرۆ پەکەکە ژی و چاپەمەنییا کو ژ پەدەک ێزێدەتر بەردەڤکییا پەکەکێ دکەن ژی سنۆر دەرباس نەدکرن.
گۆتنەک ھەیە دبێژن؛ “کەرۆ نەمرە بوھار دێ هێت، پیرێ نەمر گیا و پنجار دێ هێت.”
مرۆڤ ژ نیڤا رێ ژی ڤەگەریت و کێماسییێن خوە تەمام بکەت باشە. هەگەر پەدەکە و بارزانی ب ناڤێ ئازادی و دەمۆکراسییێ دەنگێ خوە نەکەن و ل بەندا بوھارێ بمینن، دێ ئەو دەستکەفتییێن ھەیی ژی یەک ب یەک ژ دەست دەرکەڤن وەسسەلام.
