خەندەکێن د ناڤبەرا باشوور و رۆژئاڤا و دیوارێ د ناڤبەرا باکور و رۆژهلاتێ کوردستانێ دا

خەندەکێن د ناڤبەرا باشوور و رۆژئاڤا و دیوارێ د ناڤبەرا باکور و رۆژهلاتێ کوردستانێ دا

مەمەت مێردینی

ل سالا 2014ێ، پاش کو داعش ل سووریێ گەلەک ب هیز بووی، حکوومەتا هەرێما کوردستانێ ژ بۆی پاراستنا باشوور ژ ئێریشێن تەرۆریستێن داعشێ هندەک خەندەک د ناڤبەرا باشوور و رۆژئاڤایێ کوردستانێ دا کۆلان، لێ هەر د زوو دا ئەڤ کارێ حکوومەتا کوردستانێ ژ لایێ دوژمن و نەیارێن کوردستانێ یێن ناڤخوەیی و دەرڤە وەکو رەواتیدان ب دابەشکرنا کوردستانێ، رەواتی دان ب پەیمانا سایکس بیکۆ و خیانەتا ل گەلێ کورد هات پێناسە کرن. پەکەکێ تەڤ نڤیسکار و چالاکڤان و ئالیگرێن خوە ل دژی ڤێ یەک سەفەربەر کرن، ب تەڤ ئاوایان ل دژی خەندەکان سەکنین و راگهاند، “پارتی خیانەتێ دکەت”، “پارتی سنۆران د نێڤبەرا پارچەیێن کوردستانێ دا دروست دکەت”، “پارتی ب فەرمانا دەولەتێن داگیرکەر ڤێ یەکێ دکەت” و …..هتد. واتە پەکەکێ وەکو کارێن خوە یێن هەردەم ئارمانجا سەرەکی یا کۆلانا ڤان خەندەکان ل بیرا خەلکێ بر و ووسا ب وان دا زانین کو ئەڤە کارەکی خراب و خیانەتا نیشتیمانی یە.

یا راست حکوومەتا هەرێمێ 3 ئارمانج ژ کۆلانا خەندەکان هەبوو، یەک ژ وان رێگری کرن ژ هاتنا رۆژانە یا عەرەبان ژ بۆ ناڤا هەرێما کوردستانێ. دو، رێگریکرن ل کارێ قاچاخچیتیێ. سێ، خوە حازر کرن ژ بۆی هەر ئێریشەکا ژ لایێ تەرۆریستێن داعشێ یان دوژمنەک دی ژ وی ئالی ڤە بهێتە ئەنجام دایین.

دەما کو ئەڤ خەندەکە دهاتنە کۆلان، یەکەمجار پەکەکێ د چاپەمەنیا خوە دا ئەڤ کارە ب کارەکێ دوژمناتی و خیانەت ب ناڤ کر، پشترا تەڤ ئالیگر و ئەندامێن خوە ئەرکدار کرن کو د سۆسیال مەدیایێ دا ل دژی پارتی گۆتاران بنڤیسن، تەڤی کو دزانی ئەڤە کارەک باشە و حکوومەتا هەرێما کوردستانێ ژ بۆی پاراستنا باشوور ئەنجام ددەت، لێ بەلێ پەکەکێ جارەکا دی د بن ناڤێ دژاتیا پارتی دا دژاتیا خوە ژ بۆی کارێن حکوومەتا هەرێما کوردستانێ راگهاند. د چاپەمەنیێ دا ب سەدان گۆتار ژ لایێ قەلەمشۆرێن پەکەکێ ڤە هاتن نڤیساندن، د تەلەفزیۆنێن پەکەکێ دا ژی ب دەهان راپۆر و شیرۆڤەیێن بێ بنگەهـ و دوور ژ راستیێ هاتنە چێکرن، گەلێ رۆژئاڤا ل دژی حکوومەتا هەرێمێ و هیزێن پێشمەرگە هان دان، چ بێ رێزیەک نەما کو پەکەکێ دەرحەق حکوومەتا باشوور نەکری.

بەرەڤاژی ڤێ یەکێ نها ترکیا ژ ئالیەکێ د ناڤبەرا باکور و رۆژئاڤایێ کوردستانێ و ژ ئالیەکێ دی د ناڤبەرا باکور و رۆژهلاتێ کوردستانێ دا دیواران ئاڤا دکەت، بێی کو هیچ جورە مەترسیەک ل سەر ترکیێ هەبیت، بێی کو مەترسییا ئێریشا داعشێ ل سەر ترکیا هەبیت، لێ پەکەکە هەر وەکو د گوهێ گای دا نڤست بیت، هەر وەکو چ تشتەکێ نابینیت و کورەیە، لال بوویە و ب چ رەنگا ل دژی وان دیواران نە تشتەکێ دنڤیسیت و نە ژی ئالیگرەکی خوە دشینیت وان جیهان داکو ترکیا ژ چێکرنا دیواران و “دروستکرنا سینۆرێن دەستکرد” د ناڤبەرا پارچەیێن کوردستانێ دا ئاستەنگ بکەت. پەکەکە ب چ رەنگا گرنگیێ ب ڤێ یەکێ نادەت و ل دژی ناسەکنیت، ب یا پەکەکێ ترکیا کارەکێ قەنج دکەت، گەر پەکەکە ژی ل دژ راوەستیت ئەڤە دێ بیتە سەدەمەک کو “براتیا گەلان” تێک بچیت! لێ ژ بۆی باشوور؟!! پەکەکێ تەڤ پیر و کال و زارۆکێن کورد یێن نیشتەجیێن سەر سنۆرێ د نێڤبەرا رۆژئاڤا و باشوور ئانین سەر سنۆر و ئاستەنگ ژ بۆی حکوومەتا هەرێما کوردستانێ دروست کرن، پەکەکێ ب هاندانا پیر و کال و زارۆکان خواست یاریا ب عاتیفەیا گەلێ کورد بکەت و ل دژی حکوومەتا هەرێما کوردستانێ وان بکار بینیت. پیر و کالێن کو ب درەوێن پەکەکێ هاتبوون خاپاندن خواست ب دەستان و مەربێلان خەندەکێن کو ب حەفارەیان هاتبوون کۆلاندن تژی بکەن!

ئەم ل ڤێرە هندەک پرسیاران ژ پەکەکێ دکەین، گەلۆ چما ل دژی حکوومەتا باشوور ب ڤی ئاوا تەڤدگەرن لێ ل دژی حکوومەتا ترکیێ هوون ب دەنگ و لالن؟! چما هوون بۆریێن پەترۆلا حکوومەتا هەرێمێ کو ل نێزی بۆریێن ترکیێ نە دتەقینن، لێ بۆریێن ترکیێ ناتەقینن؟! چما هوون ل دژی حکوومەتا هەرێمێ دنڤیسن، تەڤدگەرن، گەل ل دژی حکوومەتێ هان ددن لێ ل دژی ترکیێ هوون بێدەنگن؟! گەلۆ گەر هوون ژی چێکریێن ترکیێ نەبن و د خزمەتا میساقا مللی یا ترکیێ و دەولەتا کوور یا ترکیێ دا نەبن چما هوون ل همبەر خەندەکێن د ناڤبەرا رۆژئاڤا و باکور دا، دیوارێن د ناڤبەرا باکور و رۆژهلات دا کو ب دەستێ دەولەتا داگیرکەرا ترکیێ تێنە چێکرن بێدەنگن؟!

پوستێن ھەمان بەش