ئاساییشا پەیەدێ دو جوانێن رۆژئاڤا رەڤاندن و کوشتن
چه‌كدارێن په‌یه‌دێ، باسكێ په‌كه‌كێ یێ رۆژئاڤا كوردستانێ، دو جوانێن كورد ره‌ڤاندن و پاش كو ئێشكه‌نجه‌یه‌كه مه‌زن ل وان كری، ئه‌و د زیندانێ دا قه‌تل كرن.
رەڤاندن، ئیشکەنجەدان و کوشتن، ئەو کارن یێن کو رۆژانە چەکدارێن پەیەدێ ل دژی گەلێ کورد ل رۆژئاڤایێ کوردستانێ ئەنجام ددەن، دەستهلاتا پەیەدێ ل رۆژئاڤا چ بێ روومه‌تییه‌ك نەمایه کو دەرحەق گەلێ رۆژئاڤا دا ئەنجام نه‌دا بیت، ب ئاوایەکێ کو نها ل رۆژئاڤا چ جوداهی د نێڤبەرا دەستهلاتا پەیەدێ و دەستهلاتا رەژیما ئەسەد دا نینە.
چاڤكانیێن تایبه‌ت یێن پێگه‌ها داركا مازی ل رۆژئاڤا كوردستان، هنده‌ك ئاگاهی ل ده‌ربارا تاوانا كوشتنا دو جوانێن عه‌فرینێ ژ هێلا ئاساییشا په‌یه‌دێ ڤه ب ده‌ست خستنه، د ڤێ تاوانێ دا، دو جوانێن كورد كو ژ به‌ر داگیركه‌رییا تركیێ ژ عه‌فرینێ كۆچبه‌ری قامشلۆیێ ببوون، ل قامشلۆیێ ئه‌و ب ده‌ستێ ئاساییشا په‌یه‌دێ ڤه ب ئاوایه‌كی هۆڤ هاتنه قه‌تل كرن.
ل گۆری ئاگاهیێن پێگه‌ها مه، ئاساييشا په‌یه‌دێ، بەرا 5 مەهان دو وه‌لاتی ژ قامشلۆیێ ب ناڤێن «محەمەد عەلی ئەحمەد و شێرۆ عەزیز محەمەد» ره‌ڤاندن و خستن د زیندانێ دا، پاش كو ئیشكه‌نجه‌یه‌كا مه‌زن ل وان كری، ل رۆژا 11/4/2021ێ ب ئاوایه‌كی هۆڤ قه‌تل كرن.
د ته‌عقیبا ڤێ تاوانێ دا، چاڤكانیێن پێگه‌ها مه ئاگاهی ب ده‌ست خستنه كو جه‌سه‌دێ ڤان هه‌ردو جوانان ل جهه‌كێ نه‌دیار ب ئاخێ هاتنه سپارتن و مالباتێن وان نزانن گۆرێن ئه‌ولادێن وان ل كو ده‌رێ نه.
زانیاریێن ڤان جوانان ووسانه:
محەمەد عەلی ئەحمەد، ژ داییک بوویێ سالا 1985انە، ناڤێ داییکا وی «خەزالە» و ب عەسلێ خوە ژ «جندرێس-عەفرینێ» یە، پاش داگیرکرنا عەفرینێ ژ هێلا ترکیێ ڤە، ئه‌و ژ بۆی قامشلۆیێ هاتبوون كۆچبه‌ر كرن.
هه‌روه‌ها شێرۆ عەزیز محەمەد ژی، ژ داییک بوویێ سالا 1984ێ یە، ناڤێ داییکا وی «خاتوونە»، ب عەسلێ خوە ژ «عەفرینێ»یە، ئەو ژی مینا محەمەد و ب هەزاران کەسێن دی، پشتی داگیرکرنا عەفرینێ ژ هێلا ترکیێ ڤە، کۆچبەری هەرێمێن د بن دەستهلاتا پەیەدێ دبن، ئەو ژی ل قامشلۆیێ نیشتەجی دبیت، لێ چەکدارێن سەر ب ئاساییشا پەیەدێ ڤه وی درەڤینن و پشتره دکوژن.
تەڤی کو هەژمارەکا هەری زێدە یا گەلێ رۆژئاڤا پشتی داگیرکرنا عەفرینێ ژ هێلا دەولەتا ترک ڤە کۆچبەری ناڤچەیێن د بن دەستهلاتا پەیەدێ بوونە، لێ بەلێ، ل وان ناڤچەیان ژ ئالیێ چەکدارێن ئاساییشا پەیەدێ ڤە راستی رەڤاندن، ئیشکەنجە و کوشتنێ تێن.
