پەکەکە ل رۆژئاڤایێ کوردستانێ ھەموو نرخێن مرۆڤاتیێ دپەرچقینیت

سیاسەتا پەکەکێ ل رۆژئاڤایێ کوردستانێ ب ئاوایەک خراب بەردەوامە. سیاسەتا پەکەکێ ل رۆژئاڤایێ کوردستانێ ژ ناڤەندەکا تایبەت دهێتە رێڤەبرن. تایبەتی ھەتا وەک ڤێ گاڤێ رەژیما سووریێ ھەرتشتا دخوازیت ل دژێ کوردا ل رۆژئاڤایێ کوردستانێ ب قەندیلێ ددەتە کرن. دەمەکێ ب چاڤدێریا ئەمەریکایێ و ھەولدانێن سەرۆکێ ھەرێما کوردستانێ نێچیرڤان بارزانی بەحسا یەکرێزیەکێ د ناڤبەرا ئەنەکەسێ و پەیەدێ دا ھاتە کرن. ھەردو ئالیان د بن چاڤدەریا ئەمەریکایێ دا گەلەک جڤین ل دارخستن. لێ چ ئەنجام ژێ دەرنەکەت.

دهێتە زانین کو ژێر چاڤدێریا سەرۆک بارزان دا 3 جارا ئەنەکەسێ و پەیەدێ پەیمان ئیمزا کرنە. ھەولێر 1،ھەولێر 2 و دھۆک. لێ چ جارا ئەڤ یەک د پراکتیکێ دا ل سەر روویێ ئەردێ پێکنەھاتیە و نەکەتیە ژیانێ. نھا ژی ئاشکەرا دبیت کو ھەر گاڤا کو پەیەدە ل ژێر کاریگەرییا قەندیلێ دا تاڤێژیت تەکتکیە و خاپاندنا ئالیێن خێرخوازە کو دخوازن یەکرێزیەکێ ل رۆژئاڤایێ کوردستانێ پێک بهێت.

لێ ئەڤ ھەلوەستا ئالیێن خێرخواز دێ ھەتا کوودەرێ بەردەوام بیت؟ ڤەکری دهێتە دتن کو قەندیل رێکێ نادەت یەکرێزیەک ل رۆژئاڤایێ کوردستانێ بهێتە ئاڤاکرن و د ڤێ دەربارێ دا ئاستەنگا پەیدا دکەت، پیدڤیە ڤێجا ئەڤ نیەتا پەکەکێ یا قرێژی بهێتە دیتن و ژ بۆ رۆژئاڤایێ کوردستانێ ستراتەژیەکا دی بهێتە ئاڤاکرن. ئەرکا پەکەکێ ئەوە کو ب ھەموو ئاوایی رێ ل دەستکەفتیێن نەتەوی بگریت. ئەرکا پەکەکێ رێگریا دەولەتبوونا کوردایە.

ل پێشیا کوردێن رۆژئاڤایێ کوردستانێ یێن کو د رێیا پەکەکێ دا و د بن ئالایێ پەکەکێ دا بەحسا کوردایەتیێ دکەن رێیەک ھەیە کو راستیا خوە ببینن، دەست ژ سیاسەتا پەکەکێ بەردەن و ژ بۆ وەلاتێ خوە ژ بۆ دەستکەفتیێن نەتەوی دەستبدەنە ھەڤ و تەڤبگەرن.

باش بالا خوە بدەنێ، پەکەکە ل رۆژئاڤایێ کوردستانێ چ دکەت؟ ل رۆژھلاتێ کوردستانێ، ل باشوورێ کوردستانێ چ دکەت؟ ھەروەھا ژ ھەموویێ گرنگتر ئەڤە 30 سالن ل باکورێ کوردستانێ چ کریە. ئەنجاما خەباتا وان یا 30 سالی یا کو بوویە سەدەما رێتما خوینا ب ھەزاران جوانێن کورد چیە؟ گەلۆ ھەتا ڤێ گاڤێ ل باکورێ کوردستانێ گوندەک ئازاد کریە؟ گەلۆ دەستکەفتیەک نەتەوی دەستڤە ئانیە؟ تشتەک نینە. ئەنجاما سیاسەتا پەکەکێ ل باکور بوویە، تەخریبا جڤاکێ کوردی، وندابوونا نرخێن مرۆڤاتیێ، بارکرنا 7 ملیۆن کوردان ژ کوردستانێ و وێرانکرنا کوردستانێ.

سبەھی شەرێ ل دژێ داعشێ داوی بهێت دێ ھەلوەستا ئەمەریکا ل سووریا و رۆژئاڤایێ کوردستانێ چبیت؟ ئەمەریکا ھەر گاڤێ دکاریت ژ سوریا دەرکەڤیت. ھنگی چەکدارێن پەکەکێ بەر ب رەژیما سووریاڤە دچن و دبنە میلیشیایێن رەژیما سووریا. گەلۆ ژ بۆ چ پەکەکە ناڤێ کوردستانێ گوھەریە و ب ئاوایەک فەرمی کریە باکورێ رۆژھلاتێ سووریا. گەلۆ ژ بۆ چ ئالا کوردستانێ ل رۆژئاڤا قەدەغەیە. ھەتا کو کورد ڤان تشتان ھەموویان بەرچاڤ نەگرن و نەبنە خوەدی ھەلوەست، دێ ھەر کۆلەیێن سیاسەتا پەکەکێ یا قرێژ بن .

ڤان رۆژان ئەنەکەسێ ل رۆژئاڤایێ کوردستانێ ھندەک خوەپێشاندان ل دارخستن. میلیشیایێن پەکەکێ ب توندی ئێریشێ وان کرن، ئالایێ کوردستانێ بنپێکرن، ژنێن کورد بریندار کرن و ئەو د کۆلانا دا خراندن. گەلەک ڤەکری دبێژین تشتا پۆلسێن ترک ل ترکیا و باکورێ کوردستانێ دکەن چ جارا وەک یا کو میلیشیایێن پەکەکێ ل قامشلۆ کرین نە خرابترە.

بابەتەک دی ئەوە کو گەلەک ئالیێن کوردی، دەما بوویەرەک رووددەت د جھ دا داخوویانیا دەرتێخن و بوویەرا شەرمەزار دکەن. گەلۆ چەند پارتییێن سیاسی، یان ژی دەزگەھێن سڤیل، دەزگەھێن مافێ مرۆڤان ئێریشا چەکدارێن پەکەکێ ل رۆژئاڤایێ کوردستانێ شەرمەزارکرن؟ راستی مرۆڤ مەرەقا ڤان ناڤا دکەت.

د دەرحەقێ پەکەکێ گەلەک تشت تێنە گۆتن، لێ دیارە خەلکەک ژ بۆ بەرژەوەندیێن خوەیێن کەسایەتی و رۆژانە ناخوازیت راستیا ھەیی ببینیت. ژ بیر نەکەن کو دێ ئەڤ سیاسەتە ئەولێ سەرێ خوەدیێ خوە و دوڤرا ژی سەرێ ھەڤکارێن خوە و یێ ل دووڤ وان دچن خوەت.

ل ھندەک وەلاتێن ئەورۆپا کریارێن چەکدارێن پەکەکێ ل رۆژئاڤایێ کوردستانێ ھاتن شەرمەزار کرن. د ڤان خوەپێشاندانان دا ژنەک کورد ئاخاڤتنەکا کورت دکەت. بالکێشە..

رۆژەڤاکورد