ژ بۆ پارلەمەنتۆیا ئیراقێ 10/10/2021ێ ھلبژارتن تێنە ل دارخستن. تایبەتی پەدەکە د سەری دا داخویاکرن کو، ئەڤ ھلبژارتنە نەیێن دادپەروەرانە نە، ژ بەر کو ل گۆرا نفووسا باژاران ھەژمارا بەربژێرا نەھاتنە دیارکرن. وەک میناک ھندەک باژارێن ئیراقێ ھەنە کو نفووسا وان ژیێن کوردستانێ کێمترە، لێ ھەژمارا پارلەمەنتەرێن دەرتێخن ژ یێن باژارێن کوردستانێ پترن. ژ بەر کو ل کوردستانێ سەرھژمارەک نەھاتیە کرن. لێ جاردەکا دی پەدەکێ ژ بۆ ئستقرار و ئارامیا دەڤەرێ قەبوول کر کو ھلبژارتن بهێنە ئەنجامدان و تەڤلی ڤان ھلبژارتنا دبن.
ھەر ئالیەک سیاسی کوردستانی ل گۆرا خوە پرۆپاگاندەیێ دکەت و ھەول ددەن کو پێتر پارلەمەنتەرا دەستڤە بینن. بێ گومان د دەما پرۆپاگاندەیێن ھلبژارتنان دا ھەڤدو رەخنە دکەن و بەحسا پرۆژەیێن خوە ل بەغدایێ دکەن. گەلەک گرنگە کورد ل بەغدایێ بکارن ل ھمبەر پارلەمنەتەر و دەستھلاتا بەغدایێ بەرژەوەندیێن کوردستانێ بپارێزن. ژ خوە رەوشێ ھەتا ئیرۆ گەلەک ڤەکری دایە خویاکرن کو، کا کی چەوە ل بەغدایێ دژاتیا دەستکەفتیێن کوردا دکەن و بەرەڤاژی وێ ژی کی و چەوا ژ بۆ دەستکەفتیان و بەرژەوەندیێن کوردستانی ھەولددون.
رۆژا 2/10/2021ێ بەربژێرێن پەدەکێ یێن شنگالێ ھەولدان کو بچن شنگالێ، لێ چەکدارێن پەکەکێ رێ ل وان گرتن و نەھێلان بچن ناڤا باژارێ شنگالێ. ژ بۆ کو شەرەک دەرنەکەڤیت بەربژێرێن پەدەکێ شوونڤە ڤەگەریان. لێ ئەو نایێ واتەیا کو نەچنە شنگالێ. ھەر چەوابیت بەربژێرێن پەدەکێ دێ چنە ناڤا باژارێ شنگالێ و ھەر دەڤەرا پێوست دێ پرۆپاگاندەیا خوە کەن. چەکدارێن پەکەکێ ژی ڤێ یەکێ باش دزانن. یانی کورتاھی چەکدارێن پەکەکێ ل گەل میلیشیایێن شیعە نکارن ل چ دەڤەرەکا کوردستانێ رێکێ ل پەدەکێ بگرن.
لێ ژ بۆ کو شەرەک دروست نەبیت ژ بۆ کو خوین نەهێت رژاندن پەدکە گەلەک ب ھەساسی و ب بەرپرسیاری تەڤدگەریت.
دهێتە زانین کو، د دەما داعشێ دا ھێزێن پێشمەرگەیێن کوردستانێ ب فەرمانداریا سەرۆک بارزان دا شنگال ژ دەستێ داعشێ ئازاد کر. مەسعوود بارزانی ل سەرێ چیایێ شنگالێ ل ھمبەر مەدیا جیھانی ئازادکرنا شنگالێ د کۆنفەرانسەکا رۆژنەمەڤان دا راگھاند.
پشتی رەفەراندوما سەرخوەبوونا کوردستانێ، ئارتێشا ئیراقێ ل گەل ھێزێن حەشدا شەعبی ئێریش برن سەر کوردستانێ، خیانەتا 16ێ ئۆکتۆبەرێ ھشت کو پێشمەرگە خوە ژ ھندەک دەڤەران بدەنە ئالیەکێ و دەڤەرێن ستراتەژک یێن کوردستانێ بپارێزن. چەکدارێن پەکەکێ مل دان ملێ میلیشیایێن شیعە شەرێ پێشمەرگەیێن کوردستانێ کرن.
ناھا ژی چەکدارێن پەکەکێ ل گەل حەشدا شەعبی ل شنگالێ نە. د دەربارێ شنگالێ دا د ناڤبەرا حکوومەتا بەغدایێ و کوردستانێ دا رێکەفتنەک ھاتە کرن. لێ میلیشیا و چەکدارێن پەکەکێ رێ نادەن کو ئەڤ رێکەفتنە ل شەنگالێ بهێتە جێبەجێکرن. پەکەکە ناخوازیت شنگال بکەڤیتە سەر کوردستانێ و د بن باندۆرا حکوومەتا کوردستانێ دا. ئەو ھەول ددەن شەنگال ببیتە بەشەک ژ ئیراقێ.
پەکەکە وەک ھەر جارێ د دەربارێ رەوشا شەنگالێ دا درەوان بەلاڤ دکەت
د مەدیا پەکەکێ دا بەحسا بوویەرا کو تدا پەکەک رێ ل بەربژێرن پەدەکێ گرت هاتە کرن و درەو بەلاڤکرن. ANFێ دا دبێژیت:”د 2یێ جۆتمەھێ دا پەدەکێ ب ھێزێن چەکدار خواستن دەرباسی شەنگالێ ببن لێ گەلێ مەیێ کو ل چاند، ئۆل و روومەتا خوە خوەدی دەردکەڤیت ژ بەر خیانەتا کو د 3یێ تەباخا 2014ێ دا ژ لایێ پەدەکێ ڤە ل دژی وان ھاتیە کرن، نەھشتن ئەڤ ھێز دەرباسی سەر ئاخا پیرۆز ببن. دایکێن مە، جوانێن مە و تەڤاھیا گەلێ مە شەنگال ل ھەمبەری داگیرکەریا پەدەکێ راوەستیان و ئەو نەچار کرن کو پاشڤە ڤەگەرن. لێ پشتی رۆژەکێ جارەکا دی دخوازن ڤی کاری ببەنە سەری و خوینا ئێزدیان برژینن.
ئەم ژ بۆ رایا گشتی ددەینە دیارکرن کو ئارمانجا وان نە پرۆپاگاندایا ھلبژارتنێ یە، ژ خوە گەلێ مە ئیسپات کر کو ئەو خیانەتکاران قەبوول ناکەن و دەنگێ خوە نادەنە وان.”
سیاسەت و سیخووریا پەکەکێ د دەربارێ کوردستانێ دا دهێتە زانن، لێ جاردەکا دی مەدیا پەکەکێ درەوا دکەت و ھەول ددەت کو ھەڤالبەندیا پەکەکێ ل گەل داگیرکەرا ڤەشێریت. پەکەکە ل ھەموو بەشێن کوردستانێ دا ژ بۆ رێ ل دەستکەفتیێن نەتەوی بگریت ل گەل حکوومەتان ھەڤکارە. ئارمانجا پەکەکێ یا سەرەکی ئەوە کو؛ رێ ل دەولەتبوونا کوردان بگریت.
نابیتە کورد و ئالیێن سیاسی ل ھمبەر سیاسەتا پەکەکێ بێ دەنگ بمینن، ھەر بێدەنگی هاریکاریا دژمنا دکەت. پێوستە ھەر کوردەک ژ بۆ دەستکەفتیێن نەتەوی دەنگێ خوە بلند بکەت و ل ھمبەر رێگریا دەولەتبونا کوردا خوەدی ھەلوەستبیت. د قۆناغا کو تەڤگەرا کوردستانی تێرا دەرباس دبیت ئەڤ یەک بوویە پیڤانا نشتمانپەروەریێ.
نێرین/شرۆڤە/رۆژەڤا کورد
