وەلاتپەروەر!

وەلاتپەروەر!

نوری چەلک

وەلاتپەروەری نە کارەکێ سڤک و ئەرزانە. پیڤەرێن وەلاتپەروەرییێ فەداکاری، حەزکرن و ئەڤینا زمان و چاندێ، گرێدانا ب خاک و نرخێن وەلاتی نە. کەسێن وەلاتپەروەر، دڤێت بکارن ب جان و مالێ خوە فەداکارییێ د بەر وەلات و دۆزا وەلاتێ خوە دا بکەن، ب زمان و چاندا خوە، ب نرخێن خوەیێن پیرۆز سەربلند بیت، ژ بۆ سەرکەتنا مللەت و نەتەوا خوە تێبکۆشن. چ د مالا خوە دا، چ ل دەرڤە، دڤێت ژ بۆ ئەندامێن جڤاکێ ببیتە نموونە و ئەرکێن خوە ب جیھ بینیت. پیڤەرێن شۆرەشگەرییێ ژی ھەما بێژن ھەمان تشتن. ھەگەر ئارمانج شۆرەشا وەلات و رزگارییا مللەتی بیت، دڤێت شۆرەشگەر تەخسیر نەکەت و خوە بدەتە بەر بارێ شۆرەشێ. ب مال و جانێ خوە فەداکار بیت و د رۆژێن تەنگ و فرەھ دا خوە نەدەتە پاش. وەلاتپەروەر و شۆرەشگەر، ب رابوون و روونشتنا خوە، ب کەسایەتی و ئەخلاقێ خوە، ب حەزکرن و رێزگرتنا ھەڤال و ھۆگرێن خوە دیار دبن. وەلاتپەروەر و شۆرەشگەر نە ل پاش بەلکو بەردەوام ل پێشن. خوە ل پاش ناھێلن و ھەڤالێن خوە نادەنە پێش. خوە ڤەناشێرن و ھەڤالێن خوە ناشینن مرنێ.

ئەڤ پیڤەرێن کو مە ل سەری ب کورتی بەحسا وان کری، ژ سالێن پشتی 70یێ و حەتا 90ێ ھەما بێژن د کەسایەتا ھەر کوردەکێ وەلاتپەروەر و شۆرەشگەر دا ھەبوون. فەداکارییا جان و مال، ئەڤین و ئەڤیندارییا زمان و وەلات، ئارمانج و ھەدەفا کوردستانەکا سەربخوە، ئەخلاق و نرخێن کوردەواری پیڤەرێن سەرەکی بوون. ھەر کو وەخت د سەر را دەرباس بوو و تەڤگەرا ئازادیخواز و شۆرەشگەر قەلس و لاواز بوو، ئەڤ پیڤەرە ژی قەلس و بێ واتە بوون و ھێدی ھێدی ژ ھۆلێ رابوون. ھەر چقاسی وەلاتپەروەری، شۆرەشگەری و کوردایەتی ھەتا ئیرۆ ھەبیت و دهێتە کرن ژی، ژ کریتەرێن وەلاتپەروەرییا سالێن 70 و 90ێ دوورن و ئەو کەلەجان و ھەوەسدارییا مەزن گەلەک کێم بوویە یان ژی نەمایە.

پشتی کو کادرێن تەڤگەر و پارتییێن کوردستانی دەرکەتن دەرڤەیی وەلاتی و تو پلان و ستراتەژییەک ژ بۆ پێشەرۆژا تەڤگەر و پارتییێن خوە ئامادە نەکرن، ئیجار مەجبوور مان کو سەرێ ھەڤ بخون، ناڤ ھەڤ بکەڤن، ھەڤدو گونەھبار بکەن و خوە ژ بن بارێ سووج و گونەھێن ھەیی بدەنە ئالیەکێ. ئەڤێ یەکێ ھشت کو پیڤەرێن وەلاتپەروەری و شۆرەشگەریێ خوە ژ مەژی و بەدەنا وان دوور بێخن، ھەرکەس ل چارا سەرێ خوە بگەریت و دەست ب ژیانەکا نوو بکەت. یێن زەوجی بوون ژن و زارۆکێن خوە ژ وەلاتی ئانین جەم خوە، یێن نەزەوجیبوون زەوجین و بوونە خوەدی مال و زارۆک. وەلاتپەروەر و شۆرەشگەرێن کو ل وەلاتی جانفەدا و فەداکارێن دۆزا کورد و کوردستانێ بوون، ئێدی خوەدییێ ژیانەکا نووژەن و رەفاھ بوون و ڤێ ژینا نوو ژی بکەت نەکەت باندۆرەکا مەزن ل وان و ل دیتن و ھەلوەستا وان دکر.

ئەز ژی د ناڤ دا، ئیرۆ پرانییا کادر و خەباتکارێن کو د دەما خوە دا ل وەلاتی ژ چ فەداکارییان نەدرەڤییان و ب مال و جانێ خوە د ناڤ خەباتا کوردایەتییێ دا بوون، نە وەک بەرێ نە. ھەر چقاسی کوردایەتی ژ مەژی و بەدەنا مە دەرنەکەتبا و دەرنەکەڤیت ژی، ئەم نە ئەو شێر و پلنگێن بەرێ نە. ئێدی ئەم نە ل پێش لێ ل پاش ھەڤال و ھۆگرێن خوە نە. بەلکی ژ دەرباسبوونا تەمەنێ مە بیت، بەلکی ژ شکەستنا تاقەت و مەفەرا مە بیت، بەلکی ژ قەلسبوون و لاوازبوونا ھێڤی و خەون و خەیالێن مە بیت نزانم. لێ تشتێ ئەز زانم، پرانییا کادر و خەباتکارێن کو دەرکەتنە دەرڤەیی وەلاتی و بوونە خوەدییێ ژیانەکا نوو، ئێدی دلزیز و دلتەنک بوونە. ب تایبەت د دەربارێ مالباتا خوە و زارۆکێن خوە دا بوونە خوەدییێ ھەلوەستەک جودا. نە ھەلوەستەک ژ دل و فەداکاری، لێ ھەلوەستەک نە ژ دل و ھەتا ئەم بێژن سەختەکاری.

ھەر چقاسی راستی تەعل بیت و ل زۆرا گەلەک کەسان بچیت ژی، راستییا پرانییا مە سیاسەتمەدارێن کوردا ئەڤەیە. ئەم لگەل خوە و دۆزا خوە دا نە راستین. ب تایبەت د دەربارێ زارۆکێن خوە دا ئەم دژبەرییەکا مەزن ل دژی دۆز و ئارمانجا خوە دکەین. ژ بەرێ دا ژی دھاتە گۆتن کو شۆرەش ژ مالێ دەست پێ دکەت. ھەگەر سیاسەتمەدارەک ب زانەبوون زارۆکێن خوە ژ تەڤگەرا کوردی دوور بێخیت و نەخوازیت خوین ژ دفنا زارۆکێن وی بهێت، ھەق و مافێ وان نینە کو زارۆکێن خەلکێ بدەنە پێش و وان بشینن مرنێ، یان ژی یاریا ب ژیانا وان بکەن. ئیرۆ تشتێ کو پرانییا سیاسەتمەدار و رێڤەبرێن مە دکەن ئەڤەیە. ھەر چقاسی کەزەب شیرین بیت ژی، گاڤا مەسەلە دۆزا وەلاتەکێ و ئازادکرنا مللەتەکێ بیت، دڤێت بەری ھەرکەسەکێ سیاسەتمەدار و رێڤەبر زارۆکێن خوە بێخنە ناڤ ریزێن تەڤگەرا کوردی و وان بدەنە پێش. یان نە، مافێ وان نینە کو کەزەبا دایک و بابێن دی بشەوتینن و زارۆکێن خوە بنجل بکەن.

ژ ئالییێ دی، راستییەکا دی ژی ھەیە کو ئیرۆ پرانییا سیاسەتمەدار و رێڤەبرێن تەڤگەر و پارتییێن مە راستەراست نەوێرن تەڤلی چالاکییێن تەڤگەرا کوردی ببن. ئەرێ ب زمانی تەڤلی دبن، لێ د چالاکییان دا چاوا کو زارۆکێن خوە ڤەدشێرن، خوە ژی ددەنە پاش. گەلەک ژ مە ھەتا خانەنشین و دەرکەنار نەبن، یان ژی حەتا ژن و مێر ھەڤدو بەرنەدەن، ناکەڤنە ناڤ چالاکییێن تەڤگەرا کوردی. ئەڤ یەک ژی دووری پیڤەر و نرخێن وەلاتپەروەری و کوردایەتییێ نە.

 

ب کورت و کورمانجی؛ ئەڤ نڤیسینە ھەم رەخنەیە، ھەم رەخنەلخوەگرتنە. دڤێت ھەر سیاسەتمەدار و رێڤەبرێن کو ئیرۆ پێشەنگییا تەڤگەر و پارتییێن کوردی دکەن، رەوشا خوە و مالبات و زارۆکێن خوە د بەر چاڤ را دەرباس بکەن، زارۆکێن خوە ژ تەڤگەرا کوردی و ژ کوردایەتییێ دوور نەکەن. ب دوورخستنا زارۆکێن خوە ھەم ئەم دژبەرییا ئارمانج و خەون و خەیالێن خوە دکەین، ھەم ژی ئەم دبینە سەبەبا ئاسیمیلەکرن و وندابوونا زارۆکێن خەلکێ دی.

پوستێن ھەمان بەش