پەکەکێ جان ژ دەست دانا فەرماندارا خوە یا ب ناڤێ شیلان گۆیی راگهاند

پەکەکێ جان ژ دەست دانا فەرماندارا خوە یا ب ناڤێ شیلان گۆیی راگهاند

پەکەکێ راگھاند، فەرماندارەکا وان یا ژن یا سەر ب رێخستنا یەژا ستار ڤە ب ناڤێ تایبەت بلەن و ناسناڤێ “شیلان گۆیی” کو ل گوندێ ھلالێ ناڤچەیا قلابان یا شرنەخێ ژ دایک بوویە، د بۆمبەبارانەکا ئارتێشا ترکیێ دا ژیانا خوە ژ دەست دایە.

فەرمانداریا بریارگەھا ناڤەندی یا یەژا ستارێ د داخویانیەکێ دا راگھاندیە، فەرماندارا وان شیلان گۆیی رۆژا 8ێ جۆتمەھا 2021ێ د ئێرشەکا ئەسمانی یا ئارتێشا ترکیێ دا ھاتیە کوشتن.

د داخویانیێ دا ھاتیە دیارکرن کو شیلان گۆیی ژ بۆ دەرمانکرنێ و ژ بۆ سەردانا مالباتا خوە چووبوو کامپا مەخموورێ، کو بۆمبەباران ل ناڤچەیێ پێک ھاتیە و د ئەنجامێ دا ژیانا خوە ژ دەست دایە.

یەژا ستارێ دەستنیشان کریە کو تایبەت بلەن ئانکو شیلان گۆیی د سالا 1999ێ دا تەڤلی رێزێن پەکەکێ بوویە و ھەری داوی ل قادا گارە فەرمانداریتی کربوو.

وەزارەتا بەرەڤانیا ترکیەیێ رۆژا 9ێ جۆتمەھێ راگھاندبوو کو د ئەنجاما ئێریشا ئارتێشێ و سازیا ئستخباراتا وی وەلاتی دا، 2 ئەندامێن پەکەکێ د بۆمبەبارانا ل سەر ھەرێما گارە دا ژیانا خوە ژ دەست دانە.