په‌كه‌كێ ئەو دره‌وا خەلێفانێ ب چار دەستان هەمبێز کرییە، ئەڤ هەولێن په‌كه‌كێ دهێنه واتایا کو ڤێ رێخستنێ چ سه‌رمایێن دی د دەست دا نینه، ئەو هێژ ژی ڤێ مژارێ یا کو ب دەهان جاره «وه‌ك درەو» هاتییه ئیسبات کرن، وەک بەنیشتێ دجوین، راستییا کو تەڤگەرەکا سیاسی و رێبەرێن وێ ئەو قاس ب درەوان ڤە مژوول دبن، هەم عه‌قلیه‌تا وان و هەم ژی ئاستەنگیێن وان نیشان ددەت.
رێڤەبەرێن كه‌جه‌كێ گه‌له‌ك بەحسا خەلێفانێ دکه‌ن، ب راستی، مستەفا قه‌ره‌سوو ئه‌ڤ دره‌وه ئەو قاس پێشڤە بر کو وی پێشمەرگەیێن رۆژ ژی کرنه د ناڤا بابەتی دا، قه‌ره‌سوو گۆت: «پێشمەرگەیێن رۆژ ل گەل مالباتێن خوە ئاخڤتینە و گۆتینە: «په‌كه‌كیی هاتینە خەلێفانێ، ئەم دێ وان کوژین».
ووسا دیاره، مستەفا قه‌ره‌سوو د شکەفتان دا بێکار مایە، ب تەماشەکرنا رێزە فلمێن ترکی خوە فێری نڤیساندنا سیناریۆیێن پووچ و دره‌و کرییە، ژ بۆ کو مرۆڤ ژ ڤێ سیناریۆیا بێ ئاقل باوەر بکەت، پێدڤییە هشمەندییا مرۆڤی پڕ یا کێم بیت.
هەڤسەرۆکا کۆنسەیا رێڤەبەر یا که‌جه‌کێ بەسێ هۆزات ژی، ژ قه‌ره‌سوو کێمتر نینه ئەو ژی بێی كو شەرم بكه‌ت هەمان دره‌وێ دوبارە دکەت، هۆزات بۆ رادیۆیا دەنگێ وەلات ئاخڤی و گۆت: «% 90 ژ زیانێن گیانی یێن گەریلایان ژ بەر ئاگاهدارییا په‌ده‌كێ چێبووینە».
بەردەڤکێ په‌ده‌كێ مەحموود محەمەد راگه‌هاند کو ل خه‌لێفانێ چ شه‌ر و تەقە چێنەبووینە، لێ په‌كه‌كە ئیسرار دکەت کو ئەندامێن وێ ب دەستێ په‌ده‌كێ هاتینە کوشتن، لێ هەمان په‌كه‌كە قالا رێڤەبه‌رێن خوە ناكه‌ت یێن کو ل ده‌ڤه‌رێن د بن کۆنترۆلا وان دا هاتینە کوشتن، هه‌روه‌ها رێڤەبه‌رێن کو ژ ئالیێ په‌كه‌كێ ب خوە ڤە هاتینە کوشتن.
هۆزات دبێژیت: «په‌ده‌كە كوردیناتا ددەته ئارتێشا ترک»، لێ بەلێ، %95ێ ژ زیانێن په‌كه‌كێ ل دەڤەرێن کو خه‌لك لێ نینە دهێنه تۆمار كرن، په‌كه‌كە وەناکەت کو یه‌ك سڤیل بکەڤیتە ده‌ڤه‌رێن د بن کۆنترۆلا وان دا، ل ئاڤاشین، مەتینا، خاکوورک و خنێرە په‌كه‌كه ناهێلیت چووچکێن سڤیل بفرن، لێ هەموو زیانێن ل وێرێ دهێنه دان، په‌كه‌كێ ب نوقتەیێن کۆنترۆلێ ناهێلیت کەسەکێ سڤیل بکەڤیتە دەڤەرێن وان و ب سالانە ئاكنجیێن هەرێمێ نه‌شێن بچنه گوندێن خوە، په‌كه‌كە پترین زیانێن خوه یێن گیانی ل وێرێ دده‌ت، دپرسین ئه‌رێ په‌كه‌كە بخوە ئیخباریێ ل سه‌ر گەریلایێن ل وێرێ دده‌ت؟ ئەڤه شک و گومانەک مەزنە، ئارتێشا ترک چاوا دزانیت كیژان به‌رپرسێ په‌كه‌كێ د وێ د ترومبێلێ دایه یا كو ژ سەرێ چیایێ گاره‌ی دهێت و ئه‌وێ ترومبێلێ بۆمبه‌باران دكه‌ت؟ ل وێ دەڤەرێ ژ بلی په‌كه‌كێ کەسەکی دی نینە، نە پێشمەرگە و نه ژی کەسەکی سڤیل، ئه‌رێ وان ناڤا په‌كه‌كە ددەته دژمنی؟ دڤێت بەسێ هۆزات دەرکەڤیت و ل ده‌ستپێكێ بەرسڤا ڤان پرسان بدەت.
یان ژی بەسێ هۆزات دشێت بۆ مە بێژیت ئه‌رێ بۆچی تنێ فەرماندارییا ناڤەندی و شەرڤان دبنە ئارمانجا ڤان هێرشێن ترکان؟ یان ژی ناڤێن کو په‌كه‌كە گرنگیێ پێ ددەت ژیانا وان ل باژار و دەڤەرێن ئێمن، د بن گارانتیا هنده‌ك دەولەت و هێزان دا نە، تنێ یێن د به‌ر پێیان دچن ئەون یێن ژ بۆ پێدڤیێن رێڤەبەریێ هاتن و چوونێ دکه‌ن، ترومبێل و مۆتۆرسیکلێن کو ل سەر رێیێن گارەی و قەندیلێ دهێنه بۆمبه‌باران كرن، هەروه‌ها کەسێن پێدڤیێن رێڤەبەران د ئینن و دبەن، بلا بەسێ هۆزات ل ده‌ستپێكێ ڤێ بێژیت.
یان بەسێ هۆزات بلا ئەو بەحسا د. حسێن «سەلمان بۆزکر» بکەت، د. حسێن ل كووڤه هات ئارمانج کرن؟ ل کامپا مەخموور ل بەر دەرگەهێ ئیدارێ، ئەو ل کەلها په‌كه‌كێ یا کو نێزیكی 300 لەشکەر و 250 كه‌سێن سڤیل لێ هەنە، ئانكو هەموو ئیدارە د دەستێ په‌كه‌كێ دا یە د رۆژا روهن دا هاتە ئارمانج كرن، کێ ئەو ئیخبار کر؟ بێ گومان، ئیخبار و ئاگاهی ژ ناڤ په‌كه‌كێ بۆ دژمنی چوو بوون.
ئەو مستەفا قه‌ره‌سوو، یێ کو نه‌شێت راست و چەپان ژ هەڤ جودا بکەت، دبیهزیت کو پێشمەرگەیێن رۆژ، دگه‌ل مالباتێن خوە ل رۆژئاڤا د ئاخڤن و ئەو دبێژن ئەم دێ ل خه‌لیفانێ کەمینێ دانین، نێ کەر ژی دێ ب ڤێ دره‌وا قه‌ره‌سووی كه‌نیت.
ئەی قه‌ره‌سوو تو بۆچی نزانی ئەو كادرێ تە یێ 45 سالان خزمەت کری ئانكو حه‌یده‌ر ڤارتۆ «ئەنگین کارائاسلان» ل قامشلۆ چاوا هاتە ئارمانج کرن، حه‌یده ڤارتۆ ل ناڤەندا یه‌په‌گێ ل قامشلۆ سواری ترومبێلێ دبیت، پاش ب 25 خوله‌كان ترومبێلا وی دهێته بۆمبه‌باران كرن، كێ ئەو ئیخبار کر؟ مانە یێن د ناڤا یه‌په‌گێ دا نە حه‌یده‌ر ئیخبار کری؟ بێ گومان په‌كه‌كێ ب خوە ئەو دا کوشتن، قه‌ره‌سوو تو ل ده‌ستپێكێ دەرکەڤە و بەرسڤا ڤێ بدە.
مستەفا قه‌ره‌سوو تو دزانی کو هەتا نووکە ل ناڤا ئامێدیێ و دهۆکێ یه‌ك گەریلا ژی نه‌هاتییە ئارمانج كرن، لێ هەڤالێن تە هەر رۆژ ل قامشلۆ، مەخموور، کۆبانێ و ده‌ڤه‌رێن د بن دەستهه‌لاتدارییا تە دا دهێنه کوشتن، ما ئەو نە د بن کۆنترۆلا وە دا نە؟ بۆچی دهێنه ئارمانج کرن؟ لێ کەرێ کۆر ژی دزانیت کو هوون وان هەڤالێن خوە ئیخبار دکه‌ن؟
مستەفا قه‌ره‌سوو، ل ده‌ستپێكێ بلا دەرکەڤیت و چیرۆکا کوشتنا عه‌لی حه‌یده‌ر قەیتان «فوئاد دەرسم» بێژیت، عەلی حه‌یده‌ر قەیتان ژ دامەزرێنه‌رێن په‌كه‌كێ و هەڤالێ ئۆجالان یێ یەکەمین بوو، بۆ مه بێژە «عەلی حه‌یده‌ر» چاوا مەجبوور ما کو ژیانا خوە ژ دەست بدەت، بۆ مه بێژە کا وە چاوا دامه‌زرێنه‌رێ پارتییا خوە «قەیتان» ل به‌ر پێیان هێلا، بۆ مه بێژه بۆچی ئەڤه دو سالن هوون مرنا عه‌لی حه‌یده‌ر قەیتان د ڤەشێرن و ئاشكه‌را ناکه‌ن.
بلا په‌كه‌كە ل ده‌ستپێكێ دەرکەڤیت و ببێژە ئەو بۆچی چارەنووسا فەرماندارێن خوە ڤەدشێرن، بۆ نموونه، بلا ئەو چاره‌نووسا ئەندامێ کۆنسەیا فەرماندارییا هه‌په‌گێ «سه‌بری باشکالە» فەهمی شارلاتان ئاشکەرا بکه‌ن، ل 28ێ گولانا 2016 ێ ئه‌و ل هەرێما مەتینا ل جهێ بێ سڤیل د ترومبێلێ دا هاته ئارمانج كرن، ل هەمان ده‌مژمێرێ ئارتێشا ترک گۆت مە «سه‌بری باشکالا» کوشت، کی فەرماندار «سه‌بری» دا کوشتن؟. وە بۆچی «سه‌بری» ئیخبار کر؟، ئەڤه 5 سال دەرباز بوون بۆچی هوون مرنا «سه‌بری» راناگه‌هینن؟.
قه‌ره‌سوو وە بۆچی کادرێ په‌كه‌كێ و فەرماندارێ گشتیێ هێزێن ئاساییشا رۆژئاڤا «جوان عەرەب»، کوشت؟. وە خواست «جوان» ب چ نەپەنییان ڤە بمریت؟ بلا په‌كه‌كە بەحسا ب دەهان چیرۆکێن كوشتن و ته‌سفییه كرنێ یێن ناڤخوه یێن ڤەشارتی بکەت، ئارتێشا ترک وەک «تیما ته‌سفیێن ناڤخوه» یا په‌كه‌كێ کار دکەت، په‌كه‌كە کێ دەستنیشان بکەت ترک وی دکوژن.
هوون بۆچی قالا ڤان کەسێن کو مە بەحس کری ناکه‌ن؟، کا بۆچی و چاوا ئەڤ کەسه هاتنە ئارمانج کرن؟. ژ بەر کو په‌كه‌كە هه‌ر مرنەکا كو نه‌شێت مفای ژێ وه‌ربگریت، شرۆڤه ناكه‌ت، په‌كه‌كە ژیان و بیرهاتنێن ڤان مرۆڤان وەک ملکێ خوە دبینیت، گەر هەوجەیی پێ هه‌بیت، ئەو دێ به‌لاڤ كه‌ت و شرۆڤه كه‌ت، ناڤێن ڤان کەسان هندی پێدڤی بیت، دێ ب نهێنی بمینن.
په‌كه‌كە کادرێن خوە دکوژیت، ددەته کوشتن و ل سەر مرنا وان سوودێ وەردگریت، وێ چ حورمه‌ت بۆ مریان نینه، ئەو کەسێ مری ژی وەکی پەرێ بێریکێ دبینیت کو دەما وی هات دێ ژ بۆ خوە ب کار ئینیت، ئەو دبێژیت گەریلایێن مە ل خه‌لێفانێ کەتنه کەمینێ، لێ ئەو قالا وان زارۆکێن بچووک ل چەپەرێن شەر یێن ل زەندوورا و وه‌رخه‌لێ ناكه‌ت كا چاوا دانە کوشتن، ئەو زارۆکێن كو هێژان تفال د تۆنێلێن مرنێ دا هاتن هێلان، بلا په‌كه‌كە ل ده‌ستپێكێ دەرکەڤیت و ژ گەلێ کورد را چیرۆکێن جوانێن کو شاندینە مرنێ و جوانێن کو کوشتینە بێژیت.
رێڤەبەرێن په‌كه‌كێ ب قاسی دەولەتا ترک بوون ئه‌گه‌را مرنا جوانێن کورد
رێڤەبەرێن په‌كه‌كێ ب قاسی دەولەتا ترک بوون ئه‌گه‌را مرنا جوانێن کورد، دەستێن وان ب خوینا جوانێن کورد سۆر بوویە، نها ژی په‌كه‌كە و رێڤەبەرێن وێ دخوازن، دەستێن خوە یێن ب خوین ب حکوومەتا هەرێما کوردستانێ، په‌ده‌كێ، پێشمەرگەی و پێشمەرگەیێن رۆژ پاقژ بکەت.
کەس دەستوورێ نادەت ئه‌ڤ چه‌نده بهێته كرن، نه‌مومکنە کو کەسێن دەستێن وان ب خوینا جوانێن کورد سۆر بوویی، بشێن پاشەرۆژەکێ بۆ کوردان ئاڤا بکه‌ن، ئەو بەرەڤاژی زاگۆنێن خوه‌زایی یه، کەسێن ووسا بێوژدان، بێئەخلاق، دره‌وین، خاپینۆک و ب زانەبوون دبنه ئه‌گه‌را مرنا جوانان چ جاران سەرناکەڤن، یێن مه‌عسوومیه‌ت و وافاداری ژ دەست دای دێ هەرتشتی ژ ده‌ست ده‌ن، لێ هوون دێ جه‌زایێ وێ خوینا ب دەستێن وە ڤە هشک بوویی، ده‌ن.
