رێڤه‌به‌رێ په‌كه‌كێ موراد كارایلان، ب جیهازی ژ بۆی گه‌ریلایان ئاخفت و نرخاندن ژ بۆی ئێریشێن تركیێ ل سه‌ر باشوور و رۆژئاڤا كوردستانێ كر، وه‌كه هه‌رتم وی خیتابا خوه ب ئێریشكرنا سه‌ر په‌ده‌كێ ده‌ستپێكر.
ئاژانسا ANF یا په‌كه‌كێ ئیرۆ 27 جۆتمه‌هێ به‌لاڤ كر كو موراد كارایلان یێ ب كۆد ناڤێ جه‌مال، ب رێیا جیهازا راگهاندنێ ژ بۆ هێزێن گەریلا ئاخڤتیە. ب كورتاسی کارایلان ئەڤ پەیامە دان گەریلایان:
په‌ده‌كه لنگێ ناڤخوە یێ تركیێ یه.
تركیا ل باشوور شكه‌ست لۆما به‌رێ خوه دا رۆژئاڤا.
ئه‌م نه‌هێلین ته‌جروبا عه‌فرینێ دوباره ببیت.
سه‌كنا ئاپۆ یا ئیمرالیێ ئه‌ساسێ هه‌ر تشتی یه.
عه‌ڤد‌لا بەرخوەدانا ل هەمبەر شەرێ پسیکۆلۆژیک ئافراندییه.
گه‌ریلا هێزه‌كا ئاپۆگه‌ری یه.
كارایلان ل ده‌ربارا ئێریشان دا گۆت: ده‌وله‌تا ترك حه‌سابا خوه كر بوو كو د ناڤا سێ مه‌هان دا، قادێن گه‌ریلا هه‌رێمێن پاراستنێ یێن مه‌دیا داگیربكەت، ژ بۆی ڤێ ژی وەکە لنگەکێ ناڤخوە په‌ده‌كه بەشداری ڤێ پێڤاژۆیێ کر، لێ به‌لێ مه سه‌ركه‌تن ئانی و تركیا ئەنجام نه‌گرت.
ئه‌م نزانین جه‌مالێ کەر دز قالا كیژان سه‌ركه‌تنێ دكهت، یا كه‌تنا حه‌فته‌نینێ و زنارا كێسته؟، یان یا ڤالا كرنا 54 گوندان و ب كوشتن دانا ب سه‌دان گه‌ریلایان، یان هاتنا ئارتێشا داگیركه‌ر ب كووراهییا 15 كیلمه‌ترۆیان د خاكا باشوور دا، دبیت د نه‌رینا جه‌مال دا ئه‌ڤ یێك سه‌ركه‌تن بیت، لێ به‌لێ گه‌ل ڤان سه‌ركه‌تنان ناس ناكه‌ت.
هه‌موو رێڤه‌به‌رێن په‌كه‌كێ دخوازن شكه‌ستنا خوه ب چێكرنا توهمه‌تان ژ بۆی حكوومه‌تا باشوور، پێشمه‌رگه‌هان و په‌ده‌كێ بڤەشێرن، ئه‌و هه‌ر رۆژ ل مه‌دیایێ ده‌ردكه‌ڤن و عه‌ینی تشتی دوبار دكەن، ئه‌و دفكرن گه‌ل باوه‌ر ژ ڤان ده‌ره‌وێن وان دكهت، لێ به‌لێ هه‌ر كورده‌ك راستیێ دزانیت، هەر کەس دزانیت کێ باکورێ کوردستانێ ژ بۆ دوژمنی هشتیە و دەرباسی پارچەیێن دی یێن کوردستانێ بوویە و کی دخوازیت وان پارچەیان ژی تەسلیمی دەستێ دەولەتا ترکیێ بکەت و کێ ژی باشوور ژ دوژمنی رزگار کریە و پاراستیە، ئەڤ مژارە ئەوقاس زەلالە کو یێ پیچەکێ مەژیکێ د سەرێ وی دا هەبیت، پیچەک ویژدان هەبیت بەرسڤێ باش دزانیت.
ته‌جروبا عه‌فرینێ
موراد كارایلان د به‌شه‌كا ئاخافتنا خوه دا گۆت: تركیا ل باشوور راستی شكه‌ستنێ هات، لەوما وێ جارەکا دی به‌رێ خوه دا رۆژئاڤا، لێ ئه‌م ڤێ جارێ ناهێلین ته‌جروبا عه‌فرینێ دوباره ببیت، ڤێ جارێ گه‌ل كۆچبه‌ر نابیت و دێ مل ب ملی شه‌رڤانان ل به‌ر خوه بدەت.
ئاخافتنا جه‌مال كو ئه‌و ناهێلیت ته‌جروبا عه‌فرینێ دوباره ببیت دهێته واتایا وی یەکێ كو جارا به‌رێ وان ژ عه‌فرینی بازدابوو و ژ بۆ تركیێ هێلابوو، ئەڤە ب خوە ژ ئالیەکێ دانپیدانەکە ژ بۆی رادەستکرنا عەفرینێ ژ لایێ پەکەکێ بۆ دەستێ ترکیی، ژ ئالیەکێ دی دانپێدانەک زەلالە کو پەکەکە دخوازیت گەلێ کورد وەکە مەرتالێ زیندی بدەتە بەرا خوە و وان بدەتە کوشتن، دووڤرا بهێت و پرۆپاگاندا و بازارێ سیاسی ب خوینا گەلێ کورد بکەت. ل رۆژێن ده‌رباسبوویی رەجەب تەییب ئەردۆگان و هولوسی ئاكار گه‌ف ل رۆژئاڤایێ كوردستانێ کرن و گۆتن كو تشتا پێویست بیت دێ هێتە ئه‌نجام دایین، جه‌مال ژی ئیرۆ هاتییه دبێژیت: ڤێ جارێ گه‌ل كۆچبه‌ر نابیت، چ دبیت بلا ببیت، یا راست ئه‌و دخوازیت گه‌لێ رۆژئاڤا به‌ر ب شه‌واتێ و ته‌هلوكێ ببەت.
جه‌مال دخوا‌ست مورالا گه‌ریلا به‌رز بكه‌ت لەوما گۆتە وان: هێزا گه‌ریلا، هێزه‌كا ئاپۆگه‌ری یه، یێ كو باش ژ پارادیگما ئاپۆ فێم نه‌كەت و ئه‌و نكاریت ببیته گه‌ریلایه‌ك مۆده‌رنیت و سه‌رده‌م، نكاریت خوه پێشبێخیت.
جه‌مال كو خوه وه‌كه جه‌نه‌رال د حه‌سبینیت، د كاریت رۆژێ ب ده‌هان گه‌ریلایان فه‌دایێ ئاپۆ بكه‌ت، ئه‌و هه‌ر جارا کو ژ بۆ گه‌ریلایان دئاخڤیت بۆ وان باسی كورد و كوردستان، خاك و نه‌ته‌وه ناکەت، ئه‌و ته‌نێ ژ ژ بۆی وان باسی ئاپۆ دکەت و دبێژیتێ ئاپۆ هه‌ر تشته، ئه‌م ژ بۆی ئاپۆ ته‌ڤ دگه‌رین و بێی ئاپۆ هه‌ر تشت بێ واته دبیت.
لنگێن په‌كه‌كێ
گۆتنه‌كا مەزنان هه‌یه دبێژیت: «ده‌ڤێ وی ژ بەر شیرێ گه‌رم شه‌وتییه، پف دکەتە ده‌وی»، موراد كارایلان ل شوونا كو به‌رسڤا ئاخافتنێن سوله‌یمان سویلوو بده‌ت كو چه‌ند رۆژان به‌رێ گۆتبۆ کارایلان: «گه‌ریلا نه شینه شەری، تو ب خوه وه‌ره، وه‌كی مشكان خوه ڤه‌نه‌شێره»، ئه‌و دهێت و دبێژهیت په‌ده‌كه لنگێ هوندرین یێ تركیێ یه، ئه‌م دپرسین قه‌ی په‌ده‌كێ لنگێن جه‌مال گرێدانه و نەهێلایە ئه‌و بچیت باكور رزگار بكه‌ت؟، یان ژی په‌ده‌كێ نەهێلا تو ئه‌نقه‌رێ و سته‌نبۆلێ بشه‌وتینی وه‌ختا ته به‌حسا عه‌فرینێ و لنگێ ئەردۆگان كری.
هه‌ر كورده‌ك دزانیت په‌كه‌كه ل ئالییه‌كێ لنگێ تركیێ و ل ئالییه‌كێ دی لنگێ سووریێ، ئیرانێ و حه‌شدا شه‌عبی یه و ب وه‌كاله‌ت د بن ناڤێ دژاتیکرنا پەدەکێ، شه‌رێ هەموو کوردستانێ و ب تایبەتی هه‌رێما فەدەرال یا باشوورێ كوردستانێ دكەت.
