ھەڤپەیڤینا جەمیل بایک یا لگەل ئەل-نەھار دا جورەکێ دانپیدانێ یە

ھەڤپەیڤینا جەمیل بایک یا لگەل ئەل-نەھار دا جورەکێ دانپیدانێ یە

ھەڤسەرۆکێ کۆنسەیا رێڤەبەرا کەجەکێ جەمیل بایک لگەل ئەل-نەھارا کو ل مسرێ وەشانێ دکەت دا ھەڤپەیڤینەک ئەنجامدا. ب راستی مرۆڤ نکاریت ڤێ ھەڤپەیڤینێ نە بجیت و نەژی داقورتینیت. ئەڤ ھەڤپەیڤینا د وارێ ببیرئانینا راستیا پەکەکێ و ب تایبەت یا جەمیل بایک دا گەلەک گرینگە.

دەما کو مە چەند خالێن دەستپێکێ یێن ھەڤپەیڤینێ خواندین، ھەڤالەکێ من ب ڤی رەنگی کارڤەدانا خوە دیار کر: “بێ ئەخلاقیێ ژی سنۆرەک ھەیە، لێ یا ڤان بێ ئەخلاقیەکا بێ سنۆرە”. ژ بەر کو د ناڤەرۆکا ئاخافتنا جەمیل بایک دا “سیخوری، دانپێدان، ھەڤکاری، کوژەری، و ھەموو کریارێن خراب” ھەبوون. ژ بەر ڤێ یەکێ ژی ھوون چ پەیڤا خراب ببێژن د ڤێ ھەڤپەیڤینێ دا هەبوو.

ئەز کوردەکێ بێ زییانم

ئەل-نەھار ل مسرێ وەشانێ دکەت. مسرێ ژ بەر ئالۆزیێن لگەل ترکیێ دا ھەیی، فرسەند دا پەکەکێ کو ھندەک کارا ل مسرێ ئەنجام بدەت. ب قاسی کو ئەم دزانین د بن ناڤێ ئاژانسێن وەکی ANF، ھاوار نیوسێ دا، ھندەک کادرێن رۆژئاڤا ل مسرێ کار دکەن. پەکەکە ب باسکێ خوە یێ مەدیایێ دخوازیت خوە ژ بۆ عەرەبان پیچەک شرین دییار بکەت. ب تایبەتی ھەم د دەزگەھێن خوە یێن راگھاندنێ دا و ھەم ژی د ھەڤپەیڤینێن خوە یێن عەرەبی دا ژ بۆ کو د دژبەرییا ئەردۆگان دا مفا وەربگرن، سییاسەتەکا تەڤلیھەڤ پەیرەو دکەن.

پەکەکەیا کو ل ترکیێ وەک پارێزڤانێ براتیا ترک و کوردان یا ھەری باش خوە پێشان ددەت، ژ نیشکا ڤە ل جیھانا عەرەبی دا خوە وەکی حەیرانێ عەرەبان دەستنیشان دکەت، بەحسا براتیا کورد و عەرەبان دکەت. ھەر کەس دزانیت کو پەکەکە ب پۆلیتیکایا خوە یا دو روو، بەرژەوەندی پەرەست، کو ژ ھەر تشتی مفا وەردگریت، د ھەر مژارێ دا قەرەبوویان قەردگریت و ھەر تشتی ل گۆری بەرژەوەندیێن پارتییا خوە دمەشینیت، ھەموو لایەنێن سیاسی باش دزانن کو پەکەکە هەڤکارەکێ بێ قەول و بێ باوەرە.

 دەما کو پەکەکە ھەول ددەت ژ ھەر کەسی و ھەر تشتی مفا وەربگریت، دکەڤیتە رەوشەکێ کو ھەر کەس ژی، ژ پەکەکێ مفا وەردگریت. مینا میهڤاندارا ل سەر ھەر میزەیەکێ دگەریت و ھەول ددەت کو تشتەکێ دەست خوە ڤە بینیت. بێ گومان سیاسەت ژییاربوون و پاراستنا بەرژەوەندیایە. ب تایبەتی پێدڤیە ئەم کورد زێدەتر ب ڤی رەنگی بین. لێ پەکەکە نە خوەدی خەتەکا سیاسی یا زەلال، نە ئارمانجەک زەلال و نە ژی ھەلوەستەک زەلال یا سیاسی یە. سیاسەتا پەکەکێ، سیاسەتا “یێ پارە بدەت دێ ل فیتکێ دەت”ە.

پەکەکە دخوازیت پەدەکێ وەکە شەیتان دەستنیشان بکەت

ب سالان پەکەکێ ب ھێزا خوە یا مەدیایی ھەول ددەت کو پەدەکێ ھەم ل کوردان، ھەم ل رۆژھلاتا ناڤین و ھەم ژی ل جیھانێ وەکو شەیتان بدەتە ناسین. دبێژیتە وەلاتێن کۆلۆنیالست و داگیرکەر ئەم کوردێن سەرنەرمین، ئەم زۆرداریێ ل سیستەما دەولەتا هەوە ناکەین. ئەم باشین، لێ بارزانی خرابە، ئەم دخوازین لگەل هەوە دا بژین لێ بارزانی دخوازیت ژ هەوە ڤەقەتەیت، ئەم دژی ئەمەریکا نە لێ پەدەکە ھەڤالبەندێ ئەمەریکایە، ئەم ناخوازین سنۆرێن دەولەتێن ھەرێمێ بگوهرین لێ بارزانی ئارمانج دکەت کو سنۆران بگوهریت. ب ڤی ئاوایی دخوازن پەدەکێ و کەڤنەشۆپییا سیاسی یا بارزانی ل رۆژھلاتا ناڤین وەکو شەیتان دەستنیشان بکەن. ژ خوە بارزانی دخوازە باشوورێ کوردستانێ بکەتە ئیسرائیلا دویەمین. عەڤدلا ئۆجەلان ب پارادیگمایا خوە دخوازیت رێگریێ ژ بۆ ڤێ دەولەتبوونا کوردان یا ئیسرایل بوونێ بگریت. پەکەکێ دخواست ئەو دژاتییا عەرەبان یا دژی ئەردۆگان بکەتە دژاتییا پەدەکێ و باشوورێ کوردستانێ. پەکەکە پەدەکێ ب ھەڤکارییا ئاکەپێ و ترکیایێ تاوانبار دکەت و ل سەر ڤی بنگەھی پەیوەندییان لگەل وەلاتێن عەرەبی دا چێبکەت.

بایک ھەموو کێم و کورتییان ب پەدەکێ ڤە ئیزاح دکەت. دبێژیت “ترکیایێ ب ھاریکارییا پەدەکێ ل ئیراقێ ھندەک دەڤەر گرتنە” لێ قەت راڤە ناکەت کو چما ل باکور یەک گولـلە ناتەقیت و پێنگاڤەکا بچووک ژی ل وێ دەرێ نکاریت پاڤێژیت. د مەدیایا عەرەبی دا کو جەمیل بایک دژمناتیا پەدەکێ دکەت، چ پەیوەندیا وێ ب ھەڤرکیا سیاسی ڤە نینە. ناڤێ ڤێ کریارا جەمیل بایک بێ ئەخلاقیا سیاسی، بێشەرمی، قەلەشی و ژ ھەموویان گرنگتر ژی خیانەتا ل ملەتێ کوردە.

پەکەکە ھێڤی دکەت کو؛ عەرەب، فارس، شیعە و ترک ئێریشی حکوومەتا ھەرێما کوردستانێ و پێشمەرگەیان بکەت دا کو جھ بۆ وێ ڤەبیت و روونە سەر دەستکەفتێن کوردستانا باشوور.

چما جەمیل بایک بەحسا بارەگەھێن ئامەریکایێ کر؟

د مەژیێ گەلێن رۆژھلاتا ناڤین دا ژ مێژ ڤە خوینساریا ل ھەمبەری شارستانییا رۆژئاڤاییان ھەیە. ژ بەر کاراکتەرێ ئیسلامێ، نێرینەکا دژە کرستیانی و رۆژئاڤایی ھەیە. ب تایبەتی ژی دەولەتێن ھەرێمێ گەلەک ڤێ پرۆپاگاندایێ دکەن.

تشتەکێ پارادۆکس ئەوە کو ھەموو دەولەتێن رۆژھلاتا ناڤین ژ ئالیێ رۆژئاڤاییان ڤە ھاتنە دامەزراندن، لێ دەولەتێن ھەرێمێ ب دژبەریا رۆژئاڤاییان ھەول ددەن کو جڤاکێ خوە د دەستێن خوە دا بگریت. ب تایبەتی نێزیکاتیا رۆژئاڤاییان لگەل گەلێن دی و ئۆپۆزسیۆنا دا چ جاران قەبوول ناکەن، میناک؛ ترکیا وەلاتەکی ناتۆیێ یە، ب ھەزاران پەیوەندیێن وێ یێن بازرگانی-ئەولەیی-سیاسی لگەل ئەورۆپیان دا ھەنە، لێ کوردان ب ھەڤکاریکرنا ھێزێن دەرڤە یێن رۆژئاڤایی ڤە تاوانبار دکەت.

وەلاتێن کو کوردستانێ داگیر دکەن، داخوازا ئازادیا کوردان وەکە ھەولێن کافربوونێ دبینن. تێکلیا کوردان لگەل رۆژئاڤا دا وەکە مەترسیەکا مەزن ل سەر خوە دزانن.

سەردانا ماکرۆن و پاپا بۆ ھەرێما کوردستانێ نەرەحەتیەکا مەزن ژ بۆ هەر چار دەولەتێن کۆلۆنیالیست چێکر. جەمیل بایک ڤێ دژبەرییا ھەرێمی دخوازیت ژ بۆ خوە بکەتە ھێز لەوما ژی بەحسا بارەگەھێن ئامەریکایێ دکەت. جەمیل بایک دبێژیت ئەمەریکا ب ڤان بارەگەھێن خوە یێن مەزن یێن ل ھەرێما کوردستانێ دکاریت ئێریشی ھەر دەڤەرەکا ئیراقێ بکەت، ئەو دخوازیت بێژیت ئیران و میلیشیایێن شیعە ئەم وەک پەکەکە دژی ھەبوونا ھێزێن نەڤدەولەتی و ئەمەریکا نە. ب ڤی ئاوایی، وی نیشان دا کو ئەو زارۆکەکێ ژیر و سادق یێ ڤان دەولەتێن کۆلۆنیالیستە.

گۆتنێن ل سەر جەنازەیێ 11.000 مرۆڤان و راستییا رۆژئاڤا-سووریێ

ئاخافتنا جەمیل بایک یا ھەری ب ژان، ئەو ئاخافتن بوون کو وی ل سەر رۆژئاڤا-سووریێ کری. ئەم ل بەندێ بوون کو ئەو ببێژیت ئەم ل رۆژئاڤا دەستھلاتدارین. لێ وی راستییەک گۆت کو ئەو کەڤن دا ھەڤالبەندێن مالباتا حافز ئەسەدن و پەسنێ مالباتا ئەسەد دا. ئەڤ راستییا جەمیل بەحس لێ کری جورەکێ دی یێ خیانەتکرنا ل کوردانە. ل رۆژئاڤا 11 ھەزار کەس شەھید کەتنە، 22 ھەزار ژی بریندار بوونە. ما هەگەر پەکەکە و ئەسەد ھند ھەڤالبەند و شریکن بلا ژ دەستپێکێ دا پەیمان گرێدابان و عەفرین، گرێ سپی، سەرێ کانی تەسلیمی رەژیما ئەسەد کربان. ب ھەزاران مرۆڤ کۆچبەر بوون، جڤاکەک ھات وێرانکرن و 11 ھەزار کەس شەھید بوون، جەمیل بایک ب سڤکاتیەک کو د شەرەکێ نۆرمال یێ د ناڤبەرا عەشیرەتان دا ژی نایێ نیشاندان ئەڤ یەک باس کر، وی ب بێشەرمی پەسنا سووریێ دا و دلسۆزی و گرێدانا خوە ژ بۆ مالباتا ئەسەد ب بیرخست.

د ناڤا شکەفتان دا دەڤخوارکرن ل دەولەتبوونێ

د ئاخافتنا جەمیل بایک دا ھەڤۆکەکا گرینگ ھەبوو “ئەم نە ب دەولەت و نە ب دەولەتبوونێ ل چارەسەریا پرسگرێکا کوردان ناگەرین.” گەر ھوون ل دەولەتبوونێ نەگەرن، ھوون تەنێ ھەول ددەن ڤان وەلاتان دەمۆکراتیک بکەن، چما ھەر رۆژ ب سەدان جوان ژیانا خوە ژ دەست ددەن. چما ھەر سال ژ ھەر بەشەکێ کوردستانێ د ناڤا پەکەکێ دا جانێ خوە ددەن، چما؟ کورد ژ بۆ چ قوربانیان ددەن؟

داخویانیا جەمیل بایک یا ب پێکەنۆکیا خوە باسی دەولەت بوونێ دکەت، د ئەسلێ خوە دا گۆتنێن کۆلۆنیالیستانە. دەما کو دبێژتە تاکە ستاتوویا کوردان یا فەرمی ل باشوور ئیسرایلا دویەم، دەولەتک، سیستەما فەئۆدالا پاشڤەروو، ئاساییشا پەدەکێ، رێڤەبریا پەدەکێ و ھێزا لەشکەری یا پەدەکێ… زمانێ رێڤەبەرێن پەکەکێ نازڤریت کو ببێژن حکوومەتا ھەرێما کوردستانێ. ئەڤە ژی ب رامانا دژمناتی کرنا باشوورێ کوردستانێ دهێت.

ترکان دەمەکێ دگۆتە مەسعوود بارزانی سەرۆکێ عەشیرەتێ، ژ بەرکو ترکان قەبوول نەدکر کو کورد ببن دەولەت لەوما ئەڤ سیفەتە بکار دئینا. جەمیل بایک ژی ب راستی ھەمان تشتی دبێژیت. کوردان بچووک و نەلایقی دەولەتبوونێ نیشان ددەت. دخوازەیت باشوورێ کوردستانێ ژی بێرێز و بچووک بکەت.

جەمیل بایک د کووراتیا وێ شکەفتا کو ئیرانێ ژ بۆی وی ئامادەکری دا حەنەکێن خوە ب دەولەتبوونا کوردان دکەت. د شکەفتا خوە دا روونشتیە و حکوومەتا ھەرێما کوردستانێ کو ژ ئالیێ ھەموو جیھانێ ڤە ھاتیە قەبوولکرن وەکە کەڤنەپەرەست ب ناڤ دکەت. حەنەکێن خوە ب دەستکەفتیێن کوردان دکەت.

جەمیل بایک گۆت کو عەرەب و کورد برایێن ھەڤن. ھوون ل وەلاتێن عەرەبان لگەل عەرەبان دا، ل ئیرانێ لگەل فارسان دا، ل ترکیایێ لگەل ترکان دا، ل شەنگالێ لگەل حەشدا شەعبی دا برایێن ھەڤن، لێ چما ل کوردستانێ لگەل کوردان دا نە برا نە ئەی پەکەکە؟ لگەل ھەموو گەلێن سەردەست دا برانە لێ لگەل کوردان دا دژمناتی، چما؟

چما ھوون قەبوول دکەن کو ئالایێ ئیراقێ ل سەر تابووتێن ئێزدیێن ل شەنگالێ بهێتە دانین، لێ ھوون ناھێلن ئالایێ کوردستانێ لسەر بهێتە دانین؟ چما ھوون ئارما حەشدا شەعبی دداننە  سەر ملێن گەنجێن ئێزیدی لێ ھوون قەبوول ناکەن و ئارما پێشمەرگەیێن کوردستانێ ل سەر ملێ وان بیت؟

پەکەکە ب چاڤنەباری، کین و ھێرسێ ھاتیە ژەھریکرن. پەکەکە ھاتیە ئاستەکێ کو ھەر کەس دکاریت وان ب کار بینیت. پەکەکە ژ نھا و پێ ڤە تەنێ خوەدی ئەرکەکێ یە ئەو ژی کو کورد نەگەھن ئاستا خوەرێڤەبەرنێ و دەولەتا نەتەوی یا خوە چێنەکەن، دخەبتیت. پەکەکە ڤێ دبێژیتە کەڤنەشۆپی و کۆلۆنیالیزما رۆژھلاتا ناڤین؛ گەر ھوون ناخوازن کورد ببن دەولەت، ھوون دکارن من بکار بینن. ئەز رێکێ ل بەر دەولەتبوونا کوردان دگرم. تەنێ ھوون دەستوورێ بدەن من.

کەسێن کو ھەڤپەیڤینا جەمیل بایک یا لگەل ئەل-نەھار دا راست فێم دکەن، ب زەلالی دبینن کو ئەڤ ئاخافتن بەلگەیا خیانەتا ل ھەمبەری گەل و نەتەوایا کوردە. ئەو ئاخافتنا جەمیل بایک بەلگەیەکا دیرۆکی یە، بەلگەیا خیانەتا ل ھەمبەری گەلێ کوردە.

پوستێن ھەمان بەش