رۆژئاڤا كوردستانێ ژ خیانه‌تا ئامه‌ریكا به‌ر ب خیانه‌تا رووسیایێ

rojava-kurdistan-war-turkey-russia (1)

ده‌وله‌تێن تركیێ و رووسیا، ژ بۆی دەرێخستنا هه‌سه‌دێ ژ کۆبانێ دانوستاندنان دکه‌ن، ئه‌نقه‌ره‌ دخوازیت هه‌رێمێ رۆژئاڤایێ كوردستانێ یێن د بن كۆنترۆلا وێ دا ب هه‌ڤ ڤه‌ گرێبده‌ت، مۆسكۆ ژی رێیا M4 یا ستراتیژی دخوازیت‌.

مالپه‌رێ «میدێل ئیست ئای» کو ناڤەندا وێ ل له‌نده‌نێ یە، دیار کر هه‌ر یێك ژ ترکیە و رووسیا ل سەر «ئۆپەراسیۆنەکا لەشکەری» دانووستاندنان دکه‌ن دا کو هێزێن سووریایا دەمۆکراتیک هه‌سه‌دێ، کو یەکینەیێن پاراستنا گەل یه‌په‌گێ، هێزا سه‌ره‌كی یه‌ تێدا، ژ کۆبانێ یا رۆژئاڤایێ کوردستانێ دەرخینن.

د نووچه‌یا «میدێل ئیست ئای» دا گۆتنێن سەرۆککۆمارێ ترکیێ تایپ ئاردۆگان «ئەم دێ ل سووریێ د زووترین دەم دا گاڤێن پێویست هاڤێژن» هاتن ببیر ئینان.

هه‌روه‌ها ده‌ست نیشان كر، رایەدارێن ترکیێ و رووسیایێ ژ بۆ نه‌رینێن ترکیێ یێن دەربارێ یه‌په‌گێ دا کو ئەنقەرە وێ وەک «تەرۆریست» و راستەراست گرێدای په‌كه‌كێ دبینیت، دانوستاندنان دکه‌ن.

د نووچەیێ دا هات دەستنیشانکرن «ترکیە ب گرتنا کۆبانێ دخوازیت‌ هه‌رێمێن رۆژئاڤا كوردستانێ یێن د بن كۆنترۆلا وێ دا، ب هه‌ڤ ڤه‌ گرێبده‌ت».

کۆبانی ژ سالا 2012ێ ڤە ل بن کۆنترۆلا یه‌په‌گێ یە، پشتی ئۆپەراسیۆنا ترکیێ یا ل دژی رۆژئاڤا ل سالا 2019ێ، لەشکەرێن سووریێ و رووسیا دەرباسی ناڤا ڤی باژاری بوون.

تركیه‌ دێ كۆبانێ ب هاریكارییا رووسیا داگیر كه‌ت

ل گۆری چاڤکانیێن کو بۆ «میدێل ئیست ئای» ئاخڤینه‌، ئەگەر هەردو ئالی رێككه‌فتن، دێ هەبوونا لەشکەری یا رووسیایێ ل کۆبانێ به‌رده‌وام بیت، لێ ترکیە ژی دێ هەرێمێن دەردۆرا رێیا M4 یا ستراتەژیک کۆنترۆل کەت.

ترکیە دێ ئێمناهییا بارەگەها رووسیایێ یا ل سارینێ مسۆگەر كه‌ت، ل همبه‌ر ڤێ رووسیا دێ گارانتیێ ده‌ته‌ تركیێ كو شەرڤانێن یه‌په‌گێ بەر ب باشوور ڤە بهێن ڤەکێشان.

ل گۆری هەمان چاڤکانییان، قه‌ره‌بوویا رووسیایێ ل سەر ئۆپەراسیۆنا کۆبانی د ب باژارۆکێ ئەریحا یێ ئدلبێ بیت کو دکەڤیتە سەر رێیا M4ێ.

بێ رێككه‌فتن ئۆپەراسیۆن ناهێته‌ کرن

چاڤکانیێن بۆ «میدێل ئیست ئای» ئاخڤینه‌ دیار کرن کو دانوستاندن هێژان به‌رده‌وامن و ئەردۆگان بەرییا کو فەرمانا ئۆپەراسیۆنەکا لەشکەری بده‌ت، ل بەندێ یە کو رێككه‌فتن ل گه‌ل رووسیا بهێته‌ ئیمزا كرن.

هەروها چاڤکانیێن ئەولەهیێ یێن ترکیێ بۆ مالپەرێ «میدێل ئیست ئای» ئاخڤین و دیار کرن کو هێزێن سوپایێ ترکیێ ئامادەکاریێن خوە ژ بۆ ئۆپەراسیۆنا لەشکەری یا ل سەر رۆژئاڤایێ کوردستانێ كرینه‌.