چەکدارێن ئۆپۆزیسیۆنا سووریێ یێن تركیه پشته‌ڤانییا وان دكه‌ت، 15 کەسێن سڤیل ژ گوندەکی عه‌فرینێ رەڤاندن.
رێخستنا مافێن مرۆڤان ل عه‌فرینێ بەلاڤ کر، گرووپا چەکدارا ب ناڤێ پۆلیسا لەشکەری رۆژا 1 ڤێ مه‌هێ 15 کەسێن سڤیل ژ گوندێ مەملا یێ ناڤچەیا راجۆ رەڤاندن.
دیار کر، کەسێن هاتنە رەڤاندن ب توهمه‌تێن جودا یێن نەراست تێن توهمه‌تبار كرن و چەکدار ژ بۆی بەردانا هەر یەک ژ وان ژی داخوازا 1520 لیرەیێن ترکی دکه‌ن.
ناڤێن کەسێن هاتنە رەڤاندن ئەخمەد خەلیل فارس، ئەحمەد محەمەد ئیبراهیم، خەلیل ئۆسمان، شوکری عومەر، قادر سەبری فارس، سەلاح ئۆسمان، سوبحی عومه‌ر، محه‌مه‌د حسێن بکۆ، نەجیب کوردی، ئیبراهیم ئۆسمان حه‌سه‌ن، سەلاح محه‌مه‌د عه‌لی، مستەفا خەلیل ئیبراهیم، ئه‌حمه‌د محه‌مه‌د بەتال و زەردەشت کەمال کوردی نە.
د مەها بۆری دا ژی نێزیکی 20 وەلاتیێن گوندێ مەملا ژ ئالیێ چەکداران ڤە هاتبوون رەڤاندن، پشتی کو چەکداران فدیە ژ وان ستاندبوون، ئەو بەردا بوون.
