د ھندەک قۆناغان دا ل ترکیا ناڤێ کوردستانێ دهێتە گۆتوبووژ کرن. تایبەتی سیاسەتمەدارێن ترک هەتا نها ناڤێ کوردستانێ نە قەبوول دکەن و نە ژی تەحەموول دکەن. ئەڤ یەک گەلەک ڤەکری ژ ھەست و ھزرێن وان یێن نژادپەرەستی دهێت. نە ھەوجەیە کو مرۆڤ بەحسا ناڤێ کوردستانێ بکەت و ڤێ یەکە بێخیتە د بابەتەکێ مناقەشەیێ. ژ بەر کو ئەم وەک کورد دبێژین کوردستان ھەیە و وەلاتێ کوردانە و کورد ل ل سەر ئاخا کوردستانێ دژین. ئەڤە راستیەکە کو نایێ ئینکار کرن. ئەو کەس یان ئالیێن ڤی ناڤی ئینکار دکەن نژادپەرەستن و ئەڤ ناڤ دێ ھەر دەمی وەک کابووسەکێ ل سەر سینگێ وان بیت.
نھا نە تەنێ ترک یان ژی ھندەک ئالیێن ترکیا ناڤێ کوردستانێ ئینکار دکەن یان ژی قەبوول ناکەن. ل ترکیا و باکورێ کوردستانێ سیاسەتا پەکەکێ ژی د پرانیا جھان دا ڤی ناڤی قەبول ناکەت و ژ بۆ ژ بیرکرنا کوردستانێ ناڤێن جودا ب کار تینیت. ل ترکیا ناڤێ کوردستانێ ھەر چقاس ب دەستووری نە قەدەغە بیت ژی، لێ د مەژیێ وان دا قەدەغەیە و گەلەک جارا دادگەھ ژ بۆ بکارئانینا ڤی ناڤی دۆزا د دەرحەقێ ھندەک کەسایەتێن کورد و دەزگەھان دا ڤەدکەن و گەلەک ژی ب ڤێ مەبەستێ ھاتنە سزادان.
د سالێن 70یان دا، ل ترکیا پرانی ژی چەپێن ترک هەبوون و نەبوونا کوردا مناقەشە دکر. کورد ھەنە یان نینە بابەتەکێ گەرمێ مناقەشەیان بوو. پشترا گۆتن کورد ھەبن ژی نە نەتەوەنە. ھەری داوی دگۆتن نابیت کو کورد ب سەرێ خوە، خوە رێخستن بکەن. ژ بۆ ڤێ ژی گەلەک رێخستن ب سیاسەتا قەومیەتێ ناڤ دکرن. ئەڤ یەک وەک تاوانەکێ و کێماسیەکا مەزن ددا نیشاندان. لێ چ جارا نژادپەرەستیا خوە مکوور نەھاتن.
ھەتا دەمەکێ ئەنجاما سیاسەتا پەکەکێ و دژتیا وان ل ھمبەر ئالایێ کوردستانێ، گەلەک کوردا ل باکور ئالا کوردستانێ کو سەمبۆلا نەتەوییە، وەک ئالا پەدەکێ یان ژی ئالایێ بارزانی ناسدکر. پەکەکێ د چ واران دا ئالایێ کوردستانێ ب کار نەئانیە. سالا 2012ێ ل رحایێ ھەموەلاتیەک ناڤێ زارۆکا خوەیا ھاتیە سەر دنیایێ کرە کوردستان و ئەڤ یەک بوو سەدەمێ کو دۆز ھاتە ڤەکرن، لێ داویێ ئەو ناڤە ھاتە قەبوول کرن.
د وارێ سیاسی و جڤاک دا جارا یەکەم ل دیاربەکرێ ھندەک جوانێن کورد ئالایێ کوردستانێ ل سەر سورا دیاربەکرێ دالقاندن و دان خوویاکرن کو وەلاتێ مە کوردستانە. ئەڤ یەک کەتە رۆژەڤا ترکیا دا و گەلەک ھاتە مناقەشەکرن. ئادارا 2011ێ دا جوانێن کوردستانێ ب مناسەبەتا وەفاتا بارزانیێ نەمر، ل قۆسەرا مێردنی چالاکیەک ل دارخستن و جاردن ئالایێ کوردستانێ ل ھەموو دەڤەران دالقاندن. ئەڤ یەک دەمەک درێژ د مەدیا ترکیا دا بوو بابەتەکێ سەرەکی یێ گۆتوبێژێن سیاسی. ھاڤینا 2012ێ ل دایاربەکر گەنجان دامەزراندنا کۆمەلەیا تەڤگەرا جوانێن کوردستانێ راگھاند و ناڤێ کوردستانێ جارەکا دی د مەدیا ترکیا و د ناڤا دادوەریا ترکیا دا بوو رۆژەڤ و 25ێ تەموزا 2013ێ ناڤێ کوردستانێ ھاتە قەبوول کرن و کەت ناڤا لتەرەتورا کۆمەلەیێن ترکیا دا. یان کۆمەلەیا تەڤگەرا جوانێن کوردستانێ ھاتە قەبوول کرن.
پشترا پارتیا دەمۆکراتا کوردستانا ترکیا، پارتیا ئازادیا کوردستانێ و پارتیا سۆسیالیستا کوردستانێ، ھاتن دامەزراندن و ئێدی ئالایێ کوردستانێ د گەلەک قادان دا ھاتە ب کارئانن. ھەتا وەک ئیرۆ ژی ناڤێ ڤان پارتیان ژ ئالیێ دادوەریا ترکیا ڤە ب ئاوایەکێ فەرمی نەھاتیە پەژراندن. دۆز ژ بۆ گرتنا ڤان پارتیان ھاتە ڤەکرن و ئەڤ دۆز بەدەوامن.
دەما کو ئەردۆگان سەرۆکوەزیر بوو، وی ژی د سەردانەکا خوەیا دیاربەکرێ دا ناڤێ کوردستانێ بکار ئانی. ئەڤ ھەلوەستا ئەردۆگان د وی دەمی ژ ئالیێ مەھەپێ و جەهەپێ ڤە گەلەک ھات رەخنە کرن. پشترا ئەردۆگان د پارلەمەنتۆیێ دا بەرسڤا ڤان ھەردو پارتیان دا و گۆت کو ھەرن د ناڤا ئارشیڤێن پارلەمەنتۆیێ بنێرن ئەڤ ناڤ گەلەک جارا ھاتیە ب کارئانین و دیرۆکا عۆسمانیان وەک میناک دا نیشاندان.
لێ جاردەکا دی د ڤێ قۆناغێ دا بایێ سیاسەتێ ھاتیە گوھارتن و ھەموو ب ھەڤرا رەدا ناڤێ کوردستانێ دکەن.
کورد گەرەک ل وەلاتێ خوە، چاندا خوە، دیرۆکا خوە ، ل ئاخا خوە خوەدی دەرکەڤن و ڤان بابەتێن بنگەھی بکەن بنگەھێ سیاسەتا خوە دا کو بکارن پێشەرۆژا خوە دیاربکەن.ھەتا دڤێت ئەڤ یەک ببیتە پیڤانا کوردستان بوویینێ ژی.
نھا دو میناکێن بەربچاڤ ھەنە. باشوورێ کوردستانێ و رۆژئاڤایێ کوردستانێ.
ل باشوور کوردستان ھەیە و ئالایێ کوردستانێ وەک ئالایێ نەتەوی ل سەر ئاخا کوردستانێ بلندە، ناڤێ کوردستانێ د قادا ناڤنەتەوێ دا تێ بکارئانین.
ل رۆژاڤایێ کوردستانێ بوو باکورێ سووریا و ناڤێ دەستھلاتا ھاتیە ئاڤاکرن ژی دا کوردستان نینە. ل رۆژئاڤا نە کوردستان ب کارئانیە و نە ژی ئالایێ کوردستانێ ھاتیە بلند کرن. نھا ھەر کوردەک ل سەر ڤان ھەردو میناکێن بەر بچاڤ بفکریت، دێ ھێسانتر د راستیا کوردستانێ و سیاسەتا دهێتە برێڤەبرن گەهیت.
رۆژەڤا کورد
