کی کێ دخاپینیت!

کی کێ دخاپینیت!

ھەڤسەرۆکێ بەرێ یێ ھەدەپێ سەلاحەدین دەمیرتاش د گرتیگەھا سلڤر دا ب بەردەوامی ھەڤپەیڤینا ل گەل رۆژنەمەڤانا دکەت و گەلەک داخویانیان ددەت. ئەڤ یەک ب سەرێ خوە بوویە بابەتەکا گۆتوبێژێ د ناڤا ھەدەپێ دا، گەلۆ دەمیرتاش دخوازیت رۆلێ عەبدوللا ئۆجالان یێ دەمەکی بگێریت یان ژی ئارمانجا وی چیە؟ دیارە ئۆجالان ژ بەر ڤێ یەکێ قەت نەیێ ئارامە. لێ ھێژان دەنگێ ئۆجالان دەرناکەڤتیە. ل گۆرا داخویانیێن ھندەک سیاسەتمەدار و بەرپرسێن پارتیێن ترک، ھەڤدیتن بەردەوامی ل گەل ئۆجالان ھەنە و ئەڤ یەک نھا ب نھینی تێنە کرن و ژ مەدیایێ ڤەشارتینە.

دیارە ئاک پارتی پشتی هەلبژارتنان دێ یاریێ ب کارتا ئۆجالان کەت. ژ بۆ ڤێ یەکێ ژی، ژ نھاڤە ئامادەکاریەک ل سەر ئۆجالان ژ ئالیێ ئاک پارتیێ ڤە دهێتە کرن. ھەلوەستا ئۆجالان یا د ھلبژارتنێن شارەداریا دا دهێتە زانین. گەلەک کەسان د نرخاندنێن خوە دا دگۆت کو، ئێدی ھلبژێرێن ھەدەپێ گوھ نادەنە ئۆجالان. ھەتا رادەیەکێ نھا ژی د ناڤا بنگەھێ ھەدەپێ دا ئالۆزبوونا رۆلێ ئۆجالان دهێتە گۆتوبێژ کرن.

لێ ڤەکری دهێتە زانین کو، داخویانیێن دەمیرتاش و لەیزتکا دەستھلاتێ یا ئۆجالان بابەتەکێ گۆتوبێژایە و وەک سیناریۆیەکێ دهێتە نرخاندن. ھەری داوی دەمیرتاش ھەڤپەیڤینەک ل گەل ئاژانسا ئالمانی (DPA) ئەنجامدا و بەرسڤا پرسێن ئاژانسێ دان. دەمیرتاش د بەرسڤەکا خوە دا بەحسا پەیوەندیێن پەکەکێ و ھەدەپێ دکەت و دبێژیت: ب چ ئاوایا من و ھەدەپێ پێوەندی ل گەل پەکەکێ نینە و نەبوونە ژی. ھەدەپە پارتیەکە کو تەنێ ئاشتیێ دپارێزیت و پارتیەکا دەمۆکراتیکە.

نھا ل ڤێ دەرێ دڤێت مرۆڤ ل سەر ڤێ گۆتنا دەمیرتاش بسەکنیت. ژ بەر کو دەمیرتاش درەوا دکەت. نە ژ پەکەکێ بیت چ ھەدەپە نینە. ھەدەپە پارتیەکە کو ژ ئالیێ بەرپرسێن ترکیا و ئۆجالان ڤە ژ بۆ پێڤاژۆیا “چارەسەریێ” ھاتیە دامەزراندن. دەمەکێ دەمیرتاش دا خویاکرن کو ئەو دێ دەست ژ سیاسەتێ بەردەت لێ پەکەکێ رێ نەدا و ئەوی نەکاری ب ئیرادا خوە دەست ژ سیاسەتێ بەردەت. ھەرکەس دزانیت کو د دەما ھلبژارتنا دا بەربژێرێن ھەدەپێ ژ قەندیل تێنە دیار کرن. ھەروەھا د دەما ھلبژارتنان دا ب سەدان ئەندامێن ھەدەپێ ژ بۆ کو ببنە بەربژێر رێیا قەندیلێ دگرنە ەر خوە و تێنە باشوورێ کوردستانێ ژ بۆ کو ل گەل بەرپرسێن پەکەکێ ھەڤدیتنا بکەن دا کو ببنە بەربژێرێن پارلەمەنتۆیێ یان ژی یێ شارەداریا.

دەمیرتاش ب خوە دەهان جاران سەردانا ئیمرالیێ کریە و فەرمانا خوە ژ ئۆجالان وەرگرتیە. ھەروەھا دەمیرتاش گەلەک جارا سەردانا قەندیلێ ژی کریە دا کو بزانیت چ بکەت. واتە پەکەکە و ھەدەپە یەک تشتن.

پشتی ھلبژارتنا گەلەک جارا قەندیل بالا دەمیرتاش ژ بۆ داخویانیێن ددەت کشاندیە، یا راست کو سیاسەتا پەکەکێ چیە، دایە خویاکرن. واتە نابیت ب داخویانیێن پۆپولیستی ڤی ملەتی بخاپینن. پەیوەندیێن دەمیرتاش و ھەدەپێ ل گەل پەکەکێ ھەنە و د ئەساس دا یەک تشتن. رایا گشتی یا کورد ڤێ یەکێ دزانیت. دەولەت ڤێ یەکێ ژ ھەر ئالیەکی پتر دزانیت. ھەر جارا دەمیرتاش و ھەیەتێن ھەدەپێ سەردانا قەندیل کری، بەرپرسەکێ میتا ترکیا ل گەل وان بوو. ھەر جارێ نامەیێن ئۆجالان کو رێدکرن قەندیلێ ب دەستێ میتێ ددانە دەمیرتاش و ھەڤالێن وی. کی کێ دخاپینیت. ھەتا ژ خاپاندنێ پتر حەنەکێن خوە ل ڤی ملەتی دکەن.

رۆژەڤا کورد