کا دو دەقەیان ل ڤی برایێ خوە یێ ههم پاشدەمایی، ههم هۆڤ و ههم ژی نەتەوهپەرەست گوهداری بکە، لێ بەری وێ، وێ قەرەواتا ل ستویێ خوە سست بکە و هەرە دەرپیەکێ فرههـ ل خوە بکە، دا کو تو بشێی ب رحەتی روونی، ئهڤه ژ قەولا رەحمەتیێ مامێ من مەحەمێ حەجی حسێنێ عیسایێ حەسێ عیسایه.
برایێ بابێ من!
بەری سالێن 80یان یی ئاپێ تە رێخستنەک دامهزراند و ل سەر ئەساسێ ئازادی و سەرخوەبوونا کوردستانێ مهنهفێستا وێ نڤیسا.
بەلێ، ئاپێ تە پشتی ئەو رێخستن ل سەر ئەساسێ ئازادی و سەرخوەبوونا کوردستانێ دامهزراندی، کەچ و لاوێن کوردان كۆم ب كۆمه خوە گههاندنێ و وهك داوەتەکێ ب دل و جان…
کوردستان بووکە و کورد بەربووكن!
ئەز بۆته وێ چیرۆکا کو ب هەزاران کەس دزانن ژ دهرزیێ ههتا كراسێ بووكێ نابێژم، لێ ب کورتی و کورمانجی، ئەز دێ بۆ برایێ خوە یێ نە ژ دایكا خوە بێژم:
فەدەرالیزم…کۆنفەدەرالیزم…خوەسەری…کۆمارا دەمۆکراتیک…و نزانم چ و نزانم چ و نزانم چ! و ئیرۆ ژی ئەم هاتینه د مهسهلهیا براتییا گهلان دا د ناڤ سنۆرێن میساقا مللی دا ئاسێ بووینه.
حەیف!
خوەزی براتییا وان ژی برا بایه!..
ب دەهان ههزار کەچێن گولسۆر و لاوێن وهكه عەگید و فێرسان د بەر براتییا گەلان دا ل سەر ئاخا خوە بوونه کولمەک ئاخ! و تهنێ ئاخ و نالینێن ژ كووراتییا كهزهبێ بۆ داییك و بابان مان!.
ئاخ! ئاخ!
لهوما ما تو شهرمێ و عهیبێ ناكهی تو ئیرۆ بهێی بپرسی و ببێژی «کورد چ دخوازن؟ ئەم چ دخوازن؟»
والله براکۆ، پشتی ئەو قاس ئێش و ژان و مرن، کورد تەنێ تشتەکی دخوازن؛ ئەو ژی کوردستانە، لێ ههر چهند ئهڤ ناڤه بۆ ههوه یێ غهریب ژی بیت، لێ هوون چ دخوازن؟ نزانم.
