تەسکەرا ژ بۆ دوو سالا و حەسابا 2023یێ..

تەسکەرا ژ بۆ دوو سالا و حەسابا 2023یێ..

نووری چەلیک

وەک دهێتە زانین، حوکمێ پەیمانا لۆزانێ د 2023یێ دا خەلاس دبیت. حوکمێن کو کوردستان 100 سالن پارچە کربوون ژ ھۆلێ رادبن. پشتی رابوونا حوکمێن پەیمانا لۆزانێ، دێ ل رۆژھلاتا ناڤین دا و ب تایبەت ژی ل سەر خاکا کوردستانێ پەیمان و حوکمێن نوو هێن سازکرن و ھەول دهێتە دان کو رۆژھلاتا ناڤین ب نەخشەیەکا نوو بهێتە خەملاندن کو کوردستان ژی د ناڤ وێ نەخشەیێ دا ھەبیت. ھەلبەت ئەڤ یەک گرێدایی یەکیتییا کوردان و گرێدایی داخوازێن کوردایە. ھەگەر کورد ھشمەند بن و بەرژەوەندییێن خوە یێن پارتایەتیێ نەکەنە ئاستەنگ، ھەگەر ل سەر ھندەک خالێن بنگەھین رێکەفتنا خوە چێکەن و د داخوازێن خوە دا زەلال بن، دێ ب ئالیکارییا ھێزێن ھەڤپەیمان و دەولەتێن وەک ئامەریکا و فرانسایێ بکارن تشتەکێ بدەست بێخن. ھەگەر دیسا بەرژەوەندییێن خوەیێن پارتایەتییێ ل پێشییا بەرژەوەندییێن کوردستانێ بکەنە ئاستەنگ، دێ دەولەتێن مەزن ژی ل گۆر وێ یەکێ حەسابێن خوە کەن، دێ ھێڤییێن خوە ژ کوردان و کوردستانێ قوت کەن و بدن دووڤ بەرژەوەندییێن خوە.

سەدەمەک ژ سەدەمێن ھەری مەزن یا ئێریشێن دەولەتا ترک ئەڤ یەکەیە، ئەڤ ترسەیە. ئانکو، ترسا رابوونا حوکمێن پەیمانا لۆزانێ و 2023یە. دەولەتا ترک و حکوومەتا وێ ژ زوو دا حەسابا خوە و ئامادەکارییێن خوە ژ بۆ 2023یێ دکەت. نە تەنێ ئەو، پەکەکە ژی ژ رۆژا رۆژ دا ژ بۆ 2023یێ ل باشوور و رۆژئاڤا ھاتیە بجیھ کرن و خزمەتا ھەمان ئارمانج و ترسێ دکەت. سەدەما کو پەکەکە پارادیگمایا ئەنتی “نەتەو-دەولەتبوونێ”، ئەم “کورد دەولەتێ ناخوازین”، “براتی و ھەڤژیانا گەلان و دەمۆکراتیک جوومھوورییەت” دا پێش 2023یێ رابوونا حوکمێن پەیمانا لۆزانێ یە. د ڤر دا پەکەکە و دەولەت ژ بۆ یەک ئارمانجێ تێدکۆشن و ئەو ژی ئەڤە کو کورد نکاربن پشتی 2023یێ ببنە خوەدییێن ستاتویەکا نەتەوی. سەدەما کو پەکەکە ناھێلیت پەیەدە و ئەنەکەسە ل ھەڤ بێن و رێکەفتنەک نەتەوی چێکەن ژی دیسا ئەڤەیە.

بێگومان، دەولەتێن وەک ئامەریکا و فرانسا ژی حەسابێن پشتی 2023یێ دکەن و دخوازن رۆژھلاتا ناڤین ل گۆر بەرژەوەندییێن خوە بنەقشینن. ژ بەر کو د رۆژھلاتا ناڤین دا تەنێ کوردان نێزیکی خوە و وەک دۆستێن خوە دبینن، حەسابێ خوە ل سەر وان دکەن و دخوازن وان نێزیکی ھەڤ بکەن، تفاقەکێ د ناڤبەرا وان دا چێکەن. سەدەما کو ماکرۆن سەرۆکێ کوردستانێ نێچیرڤان بارزانی ڤەخوەند پاریسێ ژی ئەڤ یەکە. ئامەریکا و فرانسا دخوازن ب ناڤگینی و قاسدییا نێچیرڤان بارزانی رێکەفتنا پەیەدێ و ئەنەکەسێ چێکەن دا کو بکارن پشتی 2023یێ ستاتویەکێ ژ بۆ کوردان دامەزرینن و حەتتا باشوور و رۆژئاڤا بکەنە یەک. ھەلبەت دەولەتا ترک ڤێ یەکێ دبینیت و دزانیت. ژ بەر ڤێ، پشتی چوونا نێچیرڤان بارزانی گرانییا خوە زێدەتر دا ئێریشێن سەر باشوور دا کو بەری تێکچوونا پەیمانا لۆزانێ بەشەک ژ خاکا باشوور و رۆژئاڤا داگیر بکەت و خەونا خوە یا میساقا مللی پێک بینیت. دەولەتا ترک دێ سەر کەڤیت یان نە تشتەکێ دییە. لێ دەولەتا ترک دێ وێ خاکا کو داگیر کری ل دژی ئامەریکا و فرانسایێ ژ بۆ خوە وەک “قۆز” ب کار ئینیت و ھەول دەت ببیتە شریکێ وان.

گەلەک ژ مە حکوومەتا باشوور رەخنە دکەن و دبێژن “چما دەنگێ خوە ل دژی دەولەتا ترک ناکەن”. بێگومان، ھەچیێ نە ل شەری بیت شێرە و کەس ب خوێیا گرارا کەسی نزانیت. ھەر چقاسی حکوومەتا باشوور د بریارێن ناڤخوەیی دا سەربخوە بیت ژی، د سیاسەتا دەرڤە دا گرێدایی حکوومەتا بەغدایێ یە و مافێ وێ یێ بریاردایینا سیاسەتا دەرڤە نینە. د بریارێن ناڤخوەیی دا ئازادە، لێ د بریارێن دەرڤەیی دا ئێخسیرێ بەغدایێ یە. ئەڤ یەک حکوومەتا کوردستانێ کەڕ و لال و کۆر دکەت و دەست و لنگێن وێ گرێ ددەت. ل دژ دەرکەتنا ئێریشێن دەولەتا ترک مافێ بەغدایێ یە و بەغدا ژی ل گۆر یاسایێن ناڤنەتەوی ڤی مافی ژ بۆ دەولەتا ترک رەوا دبینیت.

ب کورتی و کورمانجی؛ دەولەتا ترک ب دەرخستنا تەسکەرا ژ بۆ دوو سالا دا خویا کرن کو ئەو و پەکەکە شەرەکێ ب شێور و مشێور دکەن. ئێریشێن دەولەتا ترک و داگیرکرنا بەشەک ژ خاکا باشوور و رۆژئاڤا، پارچەیەک ژ حەسابا 2023یێ، تێکچوونا پەیمانا لۆزانێ و خەونا بەرفرەھکرنا میساقا مللی یە. ھەگەر ئامەریکا و فرانسا رێ ل بەر دەک و دۆلابێن پەکەکێ نەگرن و پەیەدە و ئەنەکەسە رێک نەکەڤن، نە ل رۆژئاڤا ستاتویەک نەتەوی چێدبیت، نە باشوور و رۆژئاڤا دبنە یەک، و نە ژی د نەخشەیا پشتی 2023یێ دا جھێ خوە دگرن. تفاق و یەکیتییا کوردان ھەم ل خێرا کوردانە، ھەم ل خێرا دەولەتێن رۆژئاڤا. پارچەبوون و بێتفاقی دێ مرنا کوردان و داگیرکرنا کوردستانێ بەردەوام کەت و دێ بیتە سەدەما لۆزانێن نوو.