رێخستنا په‌كه‌كێ، ل ده‌ربارێ پێلا كۆچبه‌ریێ یا كو نها تێ ژیان كرن، داخویانی دا و ب ده‌ڤێ خوه دانپێدان كر كو ئه‌و سه‌به‌با بنگه‌هین یا ڤێ كۆچبه‌ریێ یه.
كۆمیته‌یا تێكلیێن ده‌رڤه یا په‌كه‌كێ، ل ده‌ربارێ كۆچبه‌رێن كو ل سینۆرێ بیلارووس و پۆله‌ندایێ ئاسێ مانه داخویانی دا و گۆتییه كو ئیریشێن ده‌وله‌تا ترك یێن ل سه‌ر باشوورێ كوردستانێ، سه‌به‌با بنگه‌هین یا كۆچبه‌ربوونا گه‌له.
چما په‌كه‌كێ راست گۆتییه!
رێخستنا په‌كه‌كێ، ل ڤان دو سالێن ده‌رباسبوویی ب ئاوایه‌كی سیسته‌ماتیك ستراته‌ژییا خوه یا شه‌ر گوهه‌راندییه، رێخستنێ هه‌ولێن مه‌زن دان ژ بۆ كو شه‌ر ئێدی ژ خه‌تا سینۆر ده‌رباسی گوند و سینۆرێ باژارۆكێن باشوور ببه، ئه‌و یێك ژی مه ب چاڤێ خوه دیت كانێ ژ داوییا سالا 2019ێ و هه‌یا رۆژا مه یا ئیرۆ چه‌ند گوندێن باشوور ژ شێنییان هاتن ڤالا كرن و شه‌رێ كو ده‌مه‌كێ ل سینۆرێ نێڤبه‌را باكور و باشوور دهاتییه مه‌شاندن، نها ل ناڤا گوندانه و ل ده‌ردوورا باژارۆكانه.
ل گۆری داتایێن فه‌رمی یێن حكوومه‌تا باشوورێ كوردستانێ، ل دو سالێن رابووری پێتری 50 گوندێن باشوورێ كوردستانێ، ب سه‌ده‌ما به‌رخوه‌دانا ساخته یا په‌كه‌كێ بوونه قادا شه‌ر و ژ شێنییان ڤالا بوونه، زرارێن هه‌ری مه‌زن ب سێكته‌رێن چاندنی، گه‌شتیاری و ئابوورییا باشوور كه‌تییه، ئه‌ڤ یێك ژی ب واته‌یا زرار گهاندنا ب شێنییان و ده‌ستپێكا كۆچبه‌ریێ هات.
سه‌ده‌ما بنگه‌هین یا كۆچبه‌ریێ په‌كه‌كه‌یه؟
رێخستنا په‌كه‌كێ، د ڤان دو سالان ده، ب ده‌هان گوند و ناڤچه‌یێن باشوور بێ شه‌ر ژ بۆی عه‌سكه‌رێ ترك هشتن، رووبه‌رێن هه‌ری به‌رفه‌ره‌هـ یێن سینۆرێ پارێزگه‌هییا دهۆكێ كرن قادا شه‌ر و بۆردۆمانا كو ده‌مه‌كێ ل سینۆر دهات ئه‌نجام دایین، ئیرۆ ل گوند و سینۆرێ باژارۆكان تێ ئه‌نجام دایین.
هه‌ر كورده‌ك دزانه كو رێخستنا په‌كه‌كێ سه‌ده‌ما سه‌ره‌كه یا له‌شكه‌ركێشییا تركیێ یه بۆ سه‌ر باشوورێ كوردستانێ، په‌كه‌كه ل ڤی ملی عه‌سكه‌رێ ترك كێشی ناڤچه‌یا به‌هدینان دكه و ل ملێ شه‌نگالێ حه‌شدا شه‌عبی و زه‌لامێن میحوه‌رێ مقاوه‌مێ.
رێخستنا په‌كه‌كێ نه ته‌نێ سه‌ده‌ما بنگه‌هین یا كۆچبه‌رییا به‌ر ب بیلارووسیێ یه، به‌لكو ل هوندر ژی ب ده‌هان هه‌زار ئینسان ب سه‌به‌با سته‌ما په‌كه‌كێ كۆچبه‌ر بوونه، هه‌ر وها ئه‌ڤ ده‌ما 6 سالانه په‌كه‌كێ رێ ل به‌ر كۆچبه‌رێن ئێزدی گرتییه و رێ ناده ئه‌و ڤه‌گه‌رن شه‌نگالێ.
په‌كه‌كێ ب قاسی داگیركه‌ران كورد كۆچبه‌ر كرنه
په‌كه‌كێ ب قاسی ده‌وله‌تا ترك و ده‌وله‌تێن دن یێن داگیركه‌ر كورد كۆچبه‌ر و بێ روومه‌ت كرنه، كوردێن رۆژئاڤا ل عه‌فرینێ، سه‌رێ كانیێ و گرێ سپی ب سه‌ده‌ما په‌كه‌كێ د كامپان ده نه، كوردێن شه‌نگالێ ئه‌ڤ 6 سالن د كامپان ده نه، ب هه‌زاران خێزان و مالباتێن باشوور ب سه‌ده‌ما سته‌ما په‌كه‌كێ گوندێن خوه هێلانه و كۆچبه‌ر بوونه.
ژ سه‌رجه‌ما كۆچبه‌رێن باشوورێ كوردستانێ یێن كو نها ل سینۆرێ بیلارووس و پۆله‌ندایێ، هه‌ری زێده ژ وان ناڤچه‌یانه كو په‌كه‌كه لێ یه، لۆما په‌كه‌كه ئیرۆ هاتییه و دبێژه: سه‌ده‌ما ڤێ كۆچبه‌ریێ ئێریشێن ده‌وله‌تا تركه!.
گه‌لۆ ئه‌م دپرسن قه‌ی ده‌وله‌تا ترك كێ هه‌ده‌ف دكه؟ ژ خوه لڤ و ته‌ڤگه‌رێن رێخستنا په‌كه‌كێ هه‌ده‌ف دكه و ژ به‌ر كو په‌كه‌كێ سینۆر هشتنه و ئه‌و داكه‌تییه د ناڤا گوندان و ده‌ردوورا باژارۆكان ده، ئێدی ئه‌ڤ گوند و باژارۆك دكه‌ڤن به‌ر ئێریشێن ده‌وله‌تا ترك یا داگیركه‌ر، واته په‌كه‌كه یه قادا خه‌باتێ و به‌رخوه‌دانێ ل باكور هشتییه و هاتییه هه‌رێما كوردستانێ دكه قادا شه‌ر.
ژ ده‌ما كو په‌كه‌كه كه‌تییه د باشوورێ كوردستانێ ده، هه‌یا رۆژا مه یا ئیرۆ ڤێ رێخستنێ ب دارێ زۆر پێتری 650 گوندان داگیر كرنه، زرارا كو حكوومه‌تا باشوور ته‌خمین كری، دگهیژه نێزی 6 ملیار دۆلاران.
40 سالن «به‌رخوه‌دانا ساخته» كورد مه‌حكوومی كۆچبه‌ری و ده‌ربه‌رده‌ریێ كرنه
ئیرۆ ژی ئه‌ڤ رێخستن ژ بۆ كو ڤان جینایه‌تێن خوه ب په‌چنه هاتییه و دبێژه په‌ده‌كه سه‌ده‌ما كۆچبه‌ریێ یه!، یا راست په‌كه‌كه رێخستنه‌كه سۆدێ ژ هه‌ر گرفته‌كێ دبینه، لوما ئیرۆ ئه‌و هاتییه دخوازه ل سه‌ر ناڤێ كۆچبه‌رێن ل بیلارووس روویێن خوه یێن ره‌ش سپی بكه، ل جیێ كو ئه‌و داخوازا لێبۆرینێ ژ شێنیێن باشوورێ كوردستانێ بكه كو 650 گوندێن وان كرنه قادا شه‌ر، هاتییه سووچێ د ئاڤێژه سه‌ر ملێ حكوومه‌تا باشوور و په‌ده‌كێ.
ب كورتاسی ب سه‌ده‌ما په‌كه‌كێ ب سه‌دان هزار ئینسان ل باكور، باشوور، رۆژئاڤا و رۆژهلاتا كوردستانێ كۆچبه‌ر بوونه، ئه‌ڤ رێخستن ژی ئیرۆ پڕ ب روو قایمی ناڤێ به‌رخوه‌دانێ ل ڤی كارێ خوه دكه و دبێژه ڤا ئه‌زم روومه‌تا گه‌ل د پارێزم، لێ یا راست ئه‌و سه‌به‌با سه‌ره‌كه یا بێ روومه‌ت كرنا گه‌له، ژ به‌ر كو د 40 سالێن رابووری ده، په‌كه‌كێ ل كو ده‌را به‌رخوه‌دان! لێ كربه، ل وێ ده‌رێ كورد مه‌حكوومی كۆچبه‌ری و ده‌ربه‌ده‌ریێ بوونه.
