لەیلا زانا ل کویە و چما بێدەنگە؟

لەیلا زانا ل کویە و چما بێدەنگە؟

من گومان د ڤێ یەکێ دا نینە کو پەکەکە ژ بلی خوە چ پارتیەکا دی قەبوول ناکەت و ژ عەبدوللا ئۆجالان پێڤەتر ژی چ کەسی وەک سەرۆک و رەوشەنبیر و فەیلەسۆف قەبوول ناکەت. لێ من چ جاران باوەر نەدکر سیاسەتمەدارا کورد و خەباتکارا ب ناڤ و دەنگا باکورێ کوردستانێ لەیلا زانا تەھدید بکەن و بێژنێ بێدەنگ بە و داویێ ب ژیانا خوە یا سیاسی بینە!

ب راستی لەیلا زانا ل کویە؟ چما دەنگ و باسێ وێ نینە و چما ھەتا نھا جارەکێ ژی داخویانیەک نەدایە دەزگەھەک مەدیایی؟ گەلۆ دکەڤیتە سەرێ کێ کو لەیلا زانا ل ھەمبەر ڤان ھەموو پێشھات و گوھەرتنان دا و د ھەیاما پێنج سالێن بۆری دا تەنێ داخوانیەکێ ژی نەدەت!؟

لەیلا زانا ئەو ژنا وێرەکە کو ل ترکیا و د مەدیایا وی وەلاتی دا سەمبۆلا وێرەکی و خەباتکاریێ دهێتە ناسین و ژ گۆتنا نێرینێن خوە ژی ناترسیت. لێ نھا بێدەنگە و چ دەزگەھەکا مەدیایی یا پەکەکێ و ھەدەپێ ژی نکارن تشتەکی ل سەر بێژن و بنڤیسن.

سیاسەتمەدار و نڤیسکارێ باکورێ کوردستانێ، سەلیم چوروککایا کو پشتی کوودەتایا سەربازی یا 1980یێ ل ترکیێ ژ بەر ئەندامەتیا پەکەکێ 10 سالان ھات گرتن و پشتی کو ھاتە بەردان ژی چوو با ئۆجالان ل گەلیێ بەقایێ (لوبنان)، گۆت، ئەز ب خەلەتی کەتبووم خەفکا پەکەکێ و من ئۆجالان و ئیدەۆلۆژیا وی خەلەت فام کربوو.

چوروککایا دبێژیت، ئۆجالان پەیایێ دەولەتا ترکیێ یە و د چەندین پرتووکێن خوە دا ژی ڤێ یەکێ تینە زمان، لێ راستی و نەراستیا ڤێ مژارێ نە خەما منە. پەکەکە دکاریت بەرسڤا ڤێ یەکێ بدەت. ژ خوە جەمیل بایک جارەکی ب توندی بەرسڤا چوروککایا دابوو. لێیا کو بۆ من گرینگە، ئەڤە؛ لەیلا زانا ل کویە؟

سەلیم چوروککایا د بەرسڤا ڤێ پرسێ دا گۆتە من، ئۆجالان ب رێیا وان کەسێن کو ل گرتیگەھا ئیمرالیێ دچوون دیتنا وی، پەیامەک ژ بۆ لەیلا زانا شاندبوو و گۆتبوو، بێژنە لەیلا زانایێ، کو دخوازیت بهێتە دیتنا من، بلا چ جاران ڤێ یەکێ نەکەت، ئەگەر ووسا بکەت دێ باجا وێ ب جانێ خوە دەت!

من ژ چوروککایا پرسی، ئەم چاوا بزانین ئەڤ گۆتنە راستن یان نە؟ گۆت، چما دەرەو بیت. زێدەتری 5 سالانە لەیلا زانا چ تشتەکی نابێژیت و بێدەنگە. ئۆجالان گۆتبوو وێ، بلا بچیتە گوندێ خوە و داویێ ب ژیانا خوە یا سیاسی بینیت و نابیت ب چ رەنگا داخویانیان بدەت و دەرکەڤیتە دەرڤە.

ئەگەر گۆتنێن سەلیم چوروککایا ژی راست نەبن لێ دیسا ژی ئەڤ پرسە ھەر د جھێ خوە دا دمینیت؛ لەیلا زانا ل کویە؟

ما قەی دبیت، ل ئالیەکی ھەدەپە د بن فشارەکا مەزن دا بیت و ب دەھان خۆرتێن کورد بێنە گرتن و مەدیایا جیھانێ بەحسا کوردێن باکور بکەن لێ لەیلا زانا، ئەو سیاسەتمەدارا مەزن و وێرەک تشتەکێ نەبێژیت!

ترکیا ب ھەموو فشار و مەدیایا خوە نەکاری دەڤێ لەیلا زانا بگریتە و بێدەنگ بکەت لێ مخابن ئۆجالان ب یەک تەھدیدێ ئەو بێ دەنگ کر!