پەکەکە ب دەرەوان ئێریشێ رێڤەبەرێن کوردستانێ دکەت

پەکەکە ب دەرەوان ئێریشێ رێڤەبەرێن کوردستانێ دکەت

پەکەکێ ل سەر گۆتارا سەرۆکوەزیرێ ھەرێما کوردستانێ مەسروور بارزانی ل پانێلا دیالۆگا مەنامە 2021ێ داخویانیەک راگھاند و د داخویانیا خوە دا پشتی گەلەک دەرەو و دەزەنفارماسیۆنێ دبێژیت کو؛ “گۆتنا، ترکیێ پرسگرێک ل گەل کوردان دا نینە، لگەل پەکەکێ دا پرسگرێکێن وێ ھەنە، دڤێت رۆژئاڤا پەیوەندیێن خوە لگەل پەکەکێ دا ببریت یان نە ترکیا ژ ڤێ دکاریت عاجز ببیت و ئێریشێ بکەتە سەر، نیشان ددەت کو ب دەڤێ دەولەتا ترک دئاخڤیت.” (ANF)

ژ بەری ھەر تشتەکی سەرۆکوەزیرێ کوردستانێ ئەڤ گۆتنا ب ڤی ئاوایی کو پەکەێک ئیدیعا دکەت نەگۆتیە. مەسروور بارزانی وەک سەرۆکوەزیرێ ھەرێما کوردستانێ ل پایتەختا بەحرێین باژارێ مەنامێ، تەڤلی فۆروما مەنامێ بوویە و د ڤێ چەرچۆڤێ دا گەلەک ھەڤدیتنێن گرینگ لگەل بەرپرسێن وەلاتێن جیھانێ دا ئەنجامدانە و ھەروەھا تەڤلی پانێلا بوویە و بەحسا رەوشا باشوورێ کوردستانێ کریە و بەرسڤا گەلەک پرسیاران د دەربارێ کوردستانێ و رەوشا سیاسی دا دایە. مەسرور بارزانی بەحسا پرسگرێکا کوردا و چارەسەریەکا دادپەروەرانە یا پرسا کورد ل ھەموو دەڤەرێن کوردستانێ کریە. د پانێلەکێ دا سەرۆکوەزیرێ کوردستانێ بەحسا رۆژئاڤایێ کوردستانێ ژی دکەت.

ل سەر پەیوەندیێن ناڤبەرا ھەرێما کوردستانێ و رۆژئاڤایێ کوردستانێ ژی مەسروور بارزانی نەڤەشارت کو ئیدارەیا رۆژئاڤا نوونەراتیا ھەموو کوردێن رۆژئاڤایێ کوردستانێ ناکەت و نابیت ب ناڤێ نوونەراتیا ھەموو کوردان لگەل شامێ دانووستاندنان بکەت و تەکەز کر: “ئەم پشتەڤانیا دیالۆگا کوردی – کوردی دکەین.”

مەسرور بارزانی دبێژیت کو؛  “ژ بەر دەستوەردانێن پەکەکێ، پەیوەندیەکا ئاسایی یا حکوومەتا ھەرێمێ لگەل رۆژئاڤایێ کوردستانێ نینە.” گەلۆ د ڤان گۆتنێن بارزانی دا ژ بلی راستیێ چ ھەیە؟

ھەروەھا د سەری دا پەکەکە و ھەموو کورد دزانن کو سەدەمێ ئێریشێن ئارتێشا ترکیا یێن ل سەر باشوورێ کوردستانێ پەکەکە و سیاسەتا پەکەکێ یا دژێ نرخێن نەتەوی و کوردستانیە. پەکەکە گەلەک ڤەکری، زانابوون و د چەرچۆڤەیا پلانەکا دیزاینکری دا بەرێ ئارتێشا ترک ددەتە باشوورێ کوردستانێ. د بنگەھێ خوە دا پەکەکە ھەمان تشتێ ل رۆژئاڤایێ کوردستانێ ژی دکەت. پەکەکێ عەفرین رادەستی ئارتێشا ترکیە کر. ل سەرێ کانیێ و گرێ سپی پەکەکێ و سیاسەتا وێ یا نە کوردستانی ترکیا کشاند ھەرێمێ و خوە دا ئالیەکێ.

یانی ب کورتاھی ئەگەر پەکەکە ل رۆژئاڤایێ کوردستانێ، دەست ژ ڤێ سیاسەتا قرێژی بەرنەدەت چارەنووسا رۆژئاڤایێ کوردستانێ نە دیارە. بلا پەکەکە رۆژئاڤا بھێلیت ھێڤیا کوردێن رۆژئاڤایێ کودستانێ ڤە. بەرپرسێن پەکەکێ ل رۆژئاڤایێ کوردستانێ دبنە سەدەما ھەموو ئێش و نەخوەشییا.

رێیا یەکەم کو، رۆژئاڤایێ کوردستانێ بکەتە خوەدی ستاتویەکا کوردەواری یەکرێزیا د ناڤبەرا ئالیێن کورد ل رۆژئاڤایێ کوردستانێ دایە. قەندیل دخوازیت ڤێ یەکرێزیێ ئاستەنگ بکەت، دا کو جاردەکا دی بەرێ رۆژئاڤایێ کوردستانێ ب تەمامی بدەتە شامێ و ھێزێن چەکدارێن پەیەدێ بکەتە میلیشیایێن رەژیما بشار ئەسەد. ژ ئالیەک دی ڤە ژی سەدەما ئێریشێن ترکیا ل سەر خاکا رۆژئاڤایێ کوردستانێ کارێن ئیستیفزازی یێن پەکەکێ نە.

نابیت پەکەکە ب ڤی رەنگی ب ئەرزانی ب دەرەوان ئێریشێ کەسایەتێن دی یان ژی بەرپرسێن حکوومەتا کوردستانێ بکەت. پەکەکە تەنێ ژ بۆ کو کریارێن خوەیێن دژێ نرخێن کوردەواری ڤەشێریت شەرێ دەستکەفتیێن کوردا دکەت.

دهێتە زانین کو ئەڤە دەمەک درێژە پەکەکێ ب ھەموو ئاوایی ئێریشێ پەدەکێ دکەت و ھەموو کێماسی و خەلەتیێن خوە دکەتە ستویێ پەدەکێ دا. پەکەکە ل شنگالێ ل گەل بەغدایێ تەڤدگەرە و بوویە بەشەک ژ سیاسەتا حەشدا شەعبی ل دژێ دەستکەفتیێن کوردستانێ. پێوەندیێن پەکەکێ لگەل دەولەتێن کو کوردستان داگیر کری دا گەلەک ڤەکری و ئاشکەرانە. لێ کەسەک ناخوازیت ڤێ یەکێ ببینیت و راستیا ھەیی بێژیت.

ئەگەر ھندەک باوەر بکەن دێ رۆژەکێ ژ رۆژا پەکەکە ب کوردبوونا خوە حەسیت و ژ بۆ بەرژەوەندیێن کوردستانی کار کەت، ئەو خوە دخاپینن و دبنە هاریکارێن سیاسەتا چەوتا پەکەکێ.

رۆژەڤاکورد