ل باشوورێ کوردستانێ باژارێ سولەیمانیێ، ھندەک خوەندەڤانێن زانینگەھێ ژ بۆ بجیھ ئانینا ھندەک داخوازێن خوە یێن گرێدایێ خوەندەڤانیێ دەست ب خوەپێشاندانا کرن. د سەری دا پرانیا خەلکەکێ و ئالیێن سیاسی و ھەتا دەزگەھێن حکوومی داخوازێن خوەنداڤانا مەعقوول دیتن و حکوومەتا ھەرێما کوردستانێ ژ بۆ ڤێ یەکێ جڤیا و ھندەک بریارێن کو داخوازێن خوەندەڤانا پێکبینن ھاتنە دان.
لێ رەوشا خوەپێشاندانا ھاتە گوھەرتن و خوەپێشاندەران دەست ب شەوتاندنا ھندەک ناڤەندێن پارتیێن سیاسی و حکوومی کر. ھەروەھا ھندەک ئاڤاھییێن وەک پرتووکخانەیا شەوتاندن. گەلەک ڤەکری ھات خوویاکرن پەکەکە ب ئاوایەک چالاک د ناڤا خوەپێشاندانا دا جھ گرتیە و ھەولەک مەزن دا کو رێبەریا خوەپێشاندەرا ب تەمامی بکەت و بەرێ خوەندەڤانا دا توند و توژیێ. ھەتا ھندەک ئالیگرێن پەکەکێ د دەربارێ رێبەریا خوەپێشاندانان دا داخوویانی بەلاڤ کرن و تایبەتی دەستھلاتا کوردستانێ وەک دوژمن ب ناڤ کرن.
خوەپێشاندان گاڤ ب گاڤ بەر ب توند و توژیێ ڤە چوونێ بێرێزی ل ھمبەر نرخ و سەمبۆلا کوردستانێ کرن. خوەپێشاندەران ئالایێ کوردستانێ ئاڤێتن ئەردی و بن پێ کر و بێ ئەدەبیەکا مەزن ل ھمبەر ئالایێ کوردستانێ کر. ژ بەری نھا ژی ل چەند دەڤەرێن جودایێن کوردستانێ ھێزێن داگیرکەر بێ رێزی ل ھمبەر ئالایێ کوردستانێ کریبوون. ل باکورێ کوردستانێ د گەلەک جھان دا ئەفسەرێن ئارتێشا ترکا ئالایێ کوردستانێ شەوتاندن و دانا ئەردێ و ل سەر رێڤەچوون. دەما 16ێ ئۆکتۆبەرێ دا ھەرکەسی دیت کو، میلیشیایێن شیعە ل کەرکووکێ جاردەکا دی بێرێزیەکا مەزن ل ھمبەر ئالایێ کوردستانێ کر.
ئیرۆ د رۆژا مە دا پەکەکێ د خوەپێشاندانێن سلێمانیێ دا ل ھمبەر ئالایێ کوردستانێ بێرێزیا ھەری مەزن کر. بێرێزیا پەکەکێ ل دژێ ئالایێ کوردستانێ نە جارا یەکەمە. ل رۆژئاڤایێ کوردستانێ گەلەک جارا چەتەیێن چەکدارێن پەکەکێ ئالایێ کوردستانێ شەوتاندیە و ئانیە خوار و پێ ل سەر دانایە. تشتا کو ئارتەشا ترک و میلیشیایێن شیعە کرین پەکەکێ ژی ھەمان تشت ل ھمبەر نرخ و سەمبۆلا کوردان دکەت. لێ ئەو دژمن و پەکەکە “تەڤگەرەکا کوردستانی” دهێتە ناساندن.
ل ڤێ دەرێ ھەلوەستا خەلکێ کوردستانێ و ب ڤێ یەکێ ڤە گرێدایی ھەلوەستا حکوومەتا کوردستانێ گەلەک گرنگە.
پیدڤی بوو پشتی خوەپێشانداەرا دەست ب توند و توژیێ کری و ئالا کوردستانێ ئاڤێتی ئەردی، د جھ دا حکومەتێ ئەڤ خوەپێشاندانە قەدەغە کربا و ئەو کەسێن توند و توژی کرین و تایبەتی یێن ئالایێ کوردستانێ بن پێ کری و ئاڤێتیە ئەردی بێنە دەستنیشان کرن. دەستنیشان کرنا وان گەلەک هێسانە و د ڤێ دەربارێ دا گەلەک ڤیدیۆ و وێنە ھەنە. پشتی ئەڤ کەسە بێنە دەستنیشان کرن دڤێت دەزگەھێن ئەولەھیێ وان بگرن و یێن ھەموەلاتیێ باشوورێ کوردستانێ بن بێنە دادگەھ کرن و دادگەھ د دەربارێ وان دا بریارێ بدەت. لێ یێن کو نە ھەموەلاتیێن باشوورێ کوردستانێ نە، دڤێت د جھ دا ژ سنۆرێ کوردستانێ دەربێخن و وان دەرسنۆر بکەن.
پەکەکە تشتا دەمەکێ ل باکورێ کوردستانێ کری و رەوشا خەلکێ تێکبری، ئیرۆ ل باشوورێ کوردستانێ دخوازیت بجەربینیت. خوەندەڤانا بکار تینیت. سلێمانی کریە ناڤەندا تەڤگەرا خوە، ھندەک ئالیێن سیاسی پشگریا پەکەکێ دکەن. ئارمانجا پەکەکێ ھەلوەشاندنا حکوومەتا ھەرێما کوردستانێ و تێکبرنا ستاتوویا کو ئیرۆ ل باشوورێ کوردستانێ ھەیی و دەستکەفتیێن نەتەوی ل باشوورێ کوردستانێ یە..
دڤێت ڤێجا مەژییێن ژەنگ گرتی ڤێ یەکێ ببینن ئێدی رێ نەدەن کو پێتر پەکەکە پێ ل سەر روومەتا وان دانیت.
پیدڤییە نها ھەر ئالیەک سیاسی، تایبەتی مەدیا باشوورێ کوردستانێ یێن کو خوە ددەن نشاندان ئەو دەستکەفتیێن نەتەوی ل کوردستانێ دپارێزن دەست پێ بکەن و د سیاسەتا وەشانا خوە یا پرۆ پەکەکێ دا ل خوە مکور بێن و ل ھمبەر ھەموو جورێن توند و توژیێ دەرکەڤن و ئەوێن بێرێزی ل ھمبەر ئالایێ کوردستانێ کرین تەشھیر بکەن و سیاسەتا وان ئالیان یا قرێژ بدەن ناساندن.
ئەگەر ڤێ یەکێ نەکن ئەو مالا خوە ب دەستێ خوە خراب دکەن. بێ گومان د ڤێ دەربارێ دا گەلەک تشت ھەنە کو بێنە گۆتن. ھەر ئالیێ کو ب ئاوایەکی رێ دایە پەکەکێ ب رەنگەکێ شریکێ وان بوونە سەدەمەکا ڤان بوویەران و د ڤێ دەربارێ دا بەرپرسیاریا وان ھەیە. ھەروەھا ئەو مەدیا کو ب ئاوایەکێ بوویە ئالەتێ پرۆپاگاندا پەکەکێ ژی خوەدی بەرپرسیاری یە.
خالەکا دی، گەلۆ کا ئەم بەرێ خوە بدەینێ ئەو مەدیا باشوورێ کوردستانێ کو رۆژانە رووپەلێن مالپەرێن خوە ب نووچەیێن پەکەکێ، ھەدەپێ و دەزگەھێن گرێدایی پەکەکێ دخەملینن، دێ ل ھمبەر ڤان خوەپێشاندانا و بێ رێزیا ل ھمبەر ئالایێ کوردستانێ ھاتیە کرن چ بکەن. گەلۆ دێ داخوویانیێن ھەدەپێ و دەمیرتاش ل سەر ڤێ توند و توژیێ و بێرێزیا ل ھمبەر ئالا کوردستانێ بەلاڤکەن یان نە؟ گەلۆ دێ پەیامنێرێن وان ل دیاربەکر ڤێ پرسێ ژ بەرپرسێن ھەدەپێ کەن؟ دێ شێن ڤێ پرسیارێ ژ سانجار و بولدان پرسن دا دیتنا وان ژ بۆ رایا گشتی یا کوردستانێ ئاشکەرا بکەن؟
ئەڤ تشتە تێنە گۆتن ژ بەر کو ھەر ئالیەکێ سیاسی، ھەر دەزگەھەکێ مەدیایی کو ل ھمبەر سیاسەتا پەکەکێ یا دژێ کوردەواریێ لیبۆردەیی نیشاندایی بەرپرسیارە کو ل باشوورێ کوردستانێ پەکەکە ئانیە ڤی رادەیی و مخابن ئیرۆ پەکەکە بوویە گەفا ھەری مەزن ل سەر سەروەریا ھەرێما کوردستانێ.
رۆژەڤاکورد
