تاھر ئەلچی د 6ەمین سالڤەگەرا قەتلکرنا وی دا ب چالاکی و مەراسیمان هات ببیرئانین

تاھر ئەلچی د 6ەمین سالڤەگەرا قەتلکرنا وی دا ب چالاکی و مەراسیمان هات ببیرئانین

سەرۆکێ بارۆیا دیاربەکرێ پارێزەرێ کورد تاھر ئەلچی 28ێ مژدارا 2015ێ د دەما جڤینەکا رۆژنامەڤانی دا، ل سەر منارەیا چارلنگا دیاربەکرێ، ھاتبوو کوشتن.

ئیرۆ 28ێ مژدارێ د 6ەمین سالڤەگەرا کوشتنا تاھر ئەلچی دا چالاکیێن بیرئانینێ هاتن لدارخستن و ب چالاکی و مەراسیمەکا گرسەیی تاھر ئەلچی هات ببیرئانین.

سەردۆزگەریا کۆمارێیا ئامەدێ، دەربارێ کوشتنا وی دا دۆسیە ئامادە کر و د چارچۆڤەیا کۆمکرنا بەلگە و لێکۆلینان دا سێ پۆلیس و چار سڤیل ب تۆھمەتا کوشتنا ئەلچی، ھاتن تۆھمەتبارکرن و داخوازا جەزایێ زیندانکرنا سێ ھەتا نەھ سال و جەزایێ 45 سال زینداکرنا کەسەکێ دی ب ناڤێ ئوگور یاکشر کر کو رەڤیایە دەرڤەیی وەلات و د ھەمان رۆژێ دا بکوژێ دو پۆلیسان بوویە.

3ێ نیسانا 2020ێ 10ەمین دادگەھا جەزایێن گرانا ئامەدێ، دۆسیەیا تاوانا بکوژێن تاھر ئەلچی پەسەند کر و رۆژا 21ێ جۆتمەھا 2020ێ روونشتنا یەکەما دادگەھکرنا بکوژێن تاھر ئەلچی ھات کرن.

دەستەیا دادوەران د ڤێ روونشتنێ دا ب بەهانەیا “خەمساریا بقەست کو بوو سەدەما کوشتنا تاھر ئەلچی” بریارا ھشتنا دۆسیەیا جەزاکرنا سێ پۆلیس و چار سڤیلان دا و بریارا ئازادکرنا وانا ب مەرج ھات دایین ھەتا روونشتنا دویەما دادگەھکرنێ. بریارا دادگەھێ بوو سەدەما نەرازیبوونەکا زێدە یا بارۆیا دیاربەکرێ و پارێزەرێن تاھر ئەلچی.

سێیەمین روونشتنا دۆزا تاھر ئەلچی ل 10ەمین دادگەھا جەزایا گرانا دیاربەکرێ ھات دیتن. داخوازا بارۆیێن ئێلھ، بەدلیس، ئاگری، مێردین، وان، مووش و کۆمەلەیا رۆژەڤا مافێن مرۆڤ ژ بۆ بەشداربوونا دۆزێ ژ ئالیێ دادگەرێ دۆزێ ڤە ھات رەدکرن. دۆزێ ب ئیفادەیا شاھدێن بوویەرێ و ئاخافتنێن پارێزەران دەوام کر.

پشتی ئاخافتنا پارێزەر و شاھدان دادگەھێ ژ بۆ کێماسیێن د دۆسیەیێ دا سەبارەت دیمەنێن کامیرایێ یێن ھاتنە ژێبرن و کێماسیێن دی بهێنە تەمامکرن دۆز ژ بۆ 12ێ چلەیا 2020ێ پاش خست.

پارێزەر تاھر ئەلچ د سالا 1966ێ دا ل جزیرێ ژ دایک بوویە. پەروەردەیا سەرەتایی و ناڤەندی ل ناڤچەیا جزیرێ دیتیە. د سالا 1991ێ دا ژ فاکولتەیا یاسایێ یا زانینگەھا دیجلەیێ یا دیاربەکرێ دەر چوویە. تاھر ئەلچی، ژ سالا 1998ێ ھەتا سالا 2006ێ د رێڤەبەریا بارۆیا دیاربەکرێ دا جھ گرتبوو و سالا 2012ێ ژی وەکە سەرۆکێ بارۆیا دیاربەکرێ ھاتبوو ھلبژارتن.

ئەلچی بابێ 2 زارۆکان بوو و زمانێن ئنگلیزی، ئالمانی، ترکی و کوردی دزانی و وەک چالاکڤان و پارێزڤانێ مافێن مرۆڤان دھات ناسکرن کو د ڤی واری دا ھەژمارەک خەلات وەرگرتبوون.

خەلاتا وەقفا دەمۆکراسیا جڤاکی  (2015)

خەلاتا وەقفا  ناڤنەتەوی یا ھرانت دنک (2016)

خەلاتا ئۆدەیا پزیشکان یا ئامەدێ یا دەمۆکراسی، دۆستایەتی و ئاشتیێ (2016)

خەلاتا کۆنسەیا بارۆیێن ئەورۆپا یا ب ناڤێ خەلاتا مافێن مرۆڤ (2016)

خەلاتا شاخا ستەنبۆلێ یا مافێن مرۆڤ (2016)