پشتی بوویەرێن 8ێ تیرمەهێ یێن ناڤ یه‌نه‌كێ، بەحسا هەبوونا دەهان تۆنێن زێڕان د بن ئەردێ هۆتێلا لالەزار دهاتە کرن و چاڤکانییەکی ژی راگەهاند، هێزەکا سەر ب هەڤسەرۆکێ خوەدی بریار یێ ینکێ بافل تالەبانی کۆنترۆلا وان زێڕان کرییه.
د ڤێ دەربارێ دە چاڤکانییەکی ئاگاهدار ژ باسنیۆسێ را راگەهاند: ب سەدان قالبێن زێڕ کو تێ پێشبینی كرن زێدەتری 20 تۆنێن زێڕان بن و ئه‌ڤ زێڕ ل هۆتێلا لالەزار یا ل گرێ سەرچنار یا سلێمانیێ هاتبوون ڤەشارتن و ب وێ ئارمانجێ كو لاهور جەنگی بورهان و برایێن وی ببن دەرڤەیی وەلاتی، هێزێن نێزیکی بافل تالەبانی ب ناڤبەینکارییا رێڤەبەرێ دیارێ یه‌نه‌كێ دلێر سه‌ید مەجید، کارین وان زێڕان ژ ناڤ لەپێن لاهور جەنگی و برایێن وی دەربێخن.
هەروه‌ها هه‌تا ژ ئالیێ بافل تالەبانی و چاپەمەنییا نێزیکی وی چارەنڤیسا وان 20 تۆنێن زێڕان نه‌هاتییه راگەهاندن، گەلۆ دێ ژ بۆ خەزینەیا حکوومەتێ بێن ڤەگەراندن یان دێ ببن مولکێ یه‌نه‌كێ یان خەلکێ دن دێ دەستێ خوه دانیته سەر.
لاهور جەنگی ژی بەحسا ڤێ بوویەرێ ناکەت و ڤەشارتییە، ژ بەر كو ل گۆر گۆتنێن هەمان ژێده‌ری ئەگەر لاهور جەنگی بەحس بکەت وێ دەمێ ئاشکەرا دبیت کو ئەو زێڕ هاتنە دزین و ل هۆتێلا لالەزار هاتنە ڤەشارتن و دێ بیته بەلگەیەکا دی ل سەر لاهور جەنگی و برایێن وی.
بەری نها لاهور جەنگی و برایێن وی ب قاچاخچێتییا زێڕان د ناڤبەرا هەرێما کوردستانێ و وەلاتێن کەنداڤا عەرەبی دا ناڤێ وان دەرکەتبوو، هەروه‌ها قاچاخچێتییا ل سنۆران و دەست دانانا سەر کارێن بازرگانییا سلێمانیێ و ژێده‌رێن داهاتێ وی باژاڕی.
