ل رۆژئاڤایێ کوردستانێ چەکدارێن پەکەکێ زۆرداری و تەعداریێ ل سەر جڤاتێ ب ئاوایەکێ سیستەماتیک د چارچۆڤەیا پرۆژەیەکا کو بکاربن ترسێ ل سەر خەلکێ فەرز بکەن دا دکەن.
ل رۆژئاڤایێ کوردستانێ ژ بۆ کو پەکەکە بکاریت ھێزێن چەکدار کۆم بکەت بریارا لەشکەریا ئیجباری دا. ل رۆژئاڤا ھەر گەنجەک دەما تەمەنێ وی بهێت ناچارە بچیت لەشکەریا ئجباری بکەت. ژ بۆ ڤێ بریارێ ب ھەزاران جوانێن کورد دەست ژ وەلاتی بەردان و بوونە کۆچبەر. خەلک ژ بۆ کو زارۆکێن خوە رێنەکەن لەشکەریا ئجباری ئەو ڤەدشارتن و ب ئاوایەکی ھەولددان وان ژ رۆژئاڤایێ کودستانێ دەرێخن. پەکەکێ د ڤێ پرۆژەیا خوە دا سەرنەکەت و دەست ب رەڤاندنا زارۆکێن تەمەن بچووک کر.
میلیشیایێن چەکدار یێن ب ناڤێ جوانێن شۆرەشگەر ل رۆژئاڤا تەڤدگەرن و ئەو راستەراست ب قەندیلێ ڤە گرێداینە و گوھ نادەن کەسەکێ ژ بلی قەندیلێ. فەرمانا خوە راستەراست ژ قەندیل وەردگرن. ئەڤ جوانە نە زانانە و پرانیا وان مادەیێن هشبەر ب کار تینن و ئەون کو ئێریشێ جھ و مالێن خەلکی دکەن. جوانێن شۆرەشگەر ل کۆلانێن باژاران و ل گوندا دگەرن، کەچ و کورێن تەمەنێ وان بچووک، 11،12،13،14،15 ھەتا 16 سالی درەڤینن و دبەن کامپێن لەشکەری و وان پەروەردە دکەن و رێدکەن ئەنیێن شەر.
ئەڤ بابەتە و زۆرداریا چەتەیێن پەکەکێ، ژ ئالیێ دەزگەھێن پاراستنا مافێن زارۆکان ڤە و ژ ئالیێ گەلەک دەزگەھێن ناڤنەتەوی ڤە دهێتە شۆپاندن و ژ ھەسەدێ دخوازن کو کەسێن تەمەن بچووک و زارۆکا نەبن لەشکەریێ و ڤێ یەکێ وەک تاوانەکا ناڤنەتەوی یا شەری دحەسێبینن. ھەسەدە جار جار یەک ددویان ئازاد دکەت و دخوازیت نیشان بدەت کو بریارێن دەزگەھێن ناڤدەولەتی ب جھ تینیت. لێ راستی نە ئەڤەیە. ئەو ب زانابوون ب سەدان زارۆکان ب چەک دکەن.
رۆژانە ھەزێن موخالفێ پەکەکێ ل رۆژئاڤایێ کوردستانێ ڤێ ھەلوەستا چەتەیێن چەکدار رەخنە دکەن و بەحس دکەن. گەلەک ئالی ڤێ یەکێ شەرمەزار دکەن.
ب دەھان مالباتێن زارۆکێن رەڤاندی ل بەر دەریێ ئاڤاھیا نەتەوەیێن یەکبوویی ل باژارێ قامشلۆ، کۆم دبن و ژ ھەسەدێ داخوازیا ڤەگەراندنا زارۆکێن خوە دکەن.
ھەرکەس دزانیت کو رەڤاندنا زارۆکێن تەمەن بچووک کریارەکا پەکەکێ یە ل ھەموو بەشێن کوردستانێ و دەڤەرێن کو کورد لێ دژین. د زەمانێ خوە دا ل ئەورۆپا دەھان زارۆک ب ناڤێ کامپێن ھاڤینێ دبرن پەروەردە دکرن پشترا رێدکرن چیا. مالباتا ل گەلەک وەلاتێن ئەورۆپا سکالا ل سەر پەکەکێ تۆمار کرن و گەلەکان ژی ب رێیا پاران زارۆکێن خوە ڤەدگەراندن.
ل باکورێ کوردستانێ پەکەکێ ب ھەزاران زارۆک رەڤاندنە و ئەو چەکدار کرنە و رێکرنە مرنێ. گەلەک زارۆکێن کو ھەولا رەڤینێ دایە ژی ھاتنە کوشتن.
ئەڤ شێوەیا کو چەتەیێن پەکەکێ زارۆکا درەڤینن و وان ب چەک دکەن، بەشەکە ژ ئیدەۆلۆژیا وان و ستراتەژیا وان یا خەباتێ یە. پەکەکە چ جارا گوھ نادەت رەخنا و دەنگێ خەلکێ، ئەو یا خوە دکەن و جڤاتێ ب ئاوایەکێ مەحکومێ سیاسەتا خوەیا قرێژ دکەن. ژ خوە ئەڤ یەکەیە کو بوویە سەدەمەک بنگەھین یا تەھریباتبوونا جڤاکا کورد.
گەلەک ئالیێن سیاسی د ڤێ دەربارێ دا ھەلوەستا پەکەکێ شەرمەزار ناکەن و ل ھمبەر ڤێ کریارا پەکەکێ دەرناکەڤن. ل رۆژئاڤایێ کوردستانێ ئەنەکەسێ وەک مەرجەکا ھەڤدێتنێن یەکرێزیێ دا دبێژیت کو، دڤێت لەشکەریا ئجباری رابیت و زارۆک نەیێن رەڤاندن و نەیێن چەکدار کرن.
لێ مخابن ل بەشێن دی یێن کوردستانێ پرانیا ئالیێن سیاسی بێ دەنگن. بێ دەنگی دبیتە سەدەمەک پەکەکە پێتر خرابیا دکەت و ھەروەھا کریارێن خوەیێن خراب دا ئیسرارێ دکەت.
کورد ل زارۆکێن خوە خوەدی دەرنەکەڤن پەکەکە دێ نڤشەکێ ژناڤ بەت…
رۆژەڤا کورد
