ھەڤسەرۆکێ بێی ئەرک کری یێ یەنەکێ لاھور جەنگی بورھان داخویانیا داوی دا و راگھاند کو ئەو خوە نادەن پاش کو یێن دی سلێمانیێ بکێشنە ناڤا فەوزایێ دا. جەنگی ب ئاوایەکی نەراستەراست پەیام دا کو “ئەم دکارین سلێمانیێ ژ بۆ ھەر کەسەکێ بکەینە دۆژەھ”.

ئەو پێڤاژۆیا ناکۆکییا کو د 8ێ تیرمەھێ دا د ناڤا یەنەکێ دا دەست پێ کری، گەھشت وی ئاستی کو تەڤاھیا سلێمانیێ بسۆژن. لاھوور جەنگی بورھان بێی ئەرەک کرنا خوە ھەزم نەکرییە لۆما ژی ئەو و ھندەک لایەنێن دی دخوازن سلێمانییێ بکشینن ناڤ فەوزایێ دا.

 موراد کانی کوردەیی یێ نێزیکی لاھور جەنگی بورھان ھاتە کوشتن

کوشتنا فەرماندارێ لەشکەری موراد کانی کوردەیی کو ب نێزیکاتیا خوە یا لگەل لاھور جەنگی بورھان ڤە دهێتە ناسکرن و لگەل دو پاسەوانێن وی د رۆژێن بۆری دا، ل رانیا کو د پەڤچوونا لگەل ھێزێن ئەولەھیێ دا ھاتن کوشتن، ئالۆزی زێدەتر کرن. ھات دیارکرن کو موراد کانی کوردەیی دەستێ راستێ یێ لاھوور بورھان بوو. موراد کانی ل گەل ھێزێن کو دخواستن وی بنچاڤ بکەن پەڤچوون کر و د جھ دا ھاتە کوشتن. ڤێ بوویەرێ ئالۆزی گەھاندن ئاستا ھەری ژۆر.

لاھور جەنگی کو پشتی کوشتنا مراد کانی کوردەیی ل سەر حەسابا خوە یا مەدیایا جڤاکی پەیامەکە ڤیدیۆیی بەلاڤ کر و دیار کر کو یەنەکە ئێرشێن تەرۆریستی ل سەر لایەنگرێن وی دکەت و گەف ل کورێن مام جەلال کرن و گۆت کو وان دەرگەھێ جەهەنەمێ ڤەکرن و ئەو دێ باژارێ سلێمانی کاشی ناڤا مەترسیەکا مەزن کەن. لاھور جەنگی بورھان دا زانین کو ئەو د وێ باوەریێ دا نە کو دەربارێ کوشتنا مراد کانی کوردەیی دا چ لێکۆلین نایێن کرن و کوژەر ژی نایێن گرتن. لاھور جەنگی بورھان ئیدیعا کر کو دژمنێن وی ل سلێمانی، رۆژھلاتا ناڤین و ل ئیراقێ ھەنە.

گەلۆ دێ ئالۆزی زێدە بن؟

چاڤدێرێن سیاسی و ھندەک نڤیسکار و رەوشەنبیرێن ب ناسنامەیا خوەیا یەنەکێ تێن ناسکرن، پێشبینی دکەن کو ئەڤ پێڤاژۆ دێ بەر ب شەرێ چەکداری یێ ناڤخوەیی چیت. ھات دیارکرن کو لاھوور جەنگی بورھان هێژان ھێزەکا چەکدار ل دەردۆرا وی ھەیە و ھندەک ھێزێن ئالۆزیخواز ژی سۆز دانە وی کو ھاریکاریا وی بکەن.

چاڤدێرێن سیاسی دیار دکەن کو ئەو رێخستنێن هاریکاریا لاھوور جەنگی بورھان دکەن ھەول ددەن کو شەرەکێ ناڤخوەیی روو بدەت و ژ بۆ رەوش نەکەڤیتە بن کۆنترۆلا یەنەکێ دا، ب کۆۆردینە تەڤدگەرن. د داویێ دا، پسپۆر د وێ باوەریێ دا نە کو بێ شک ئەو پرۆسەیا کو وەکە داخوازا خوەندەکاران ل سلێمانیێ دەست پێ کریە، ژ شەوتاندنا ئالایێ کوردستانێ و ئێرشکرنا سەر ملکێن گشتی، ھەتا شەوتاندنا پەرتووکان د پرتووکخانەیان دا، ب بوویەرێن ناڤ یەنەکێ ڤە گرێدایی یە.

کی تێکدانێ چێدکەت؟

تەڤی ھەموو ناڤبەینکاریان کو یەنەکێ ژێرا شاندیە ژی، لاھوور جەنگی بورھان چ جاران ژ بۆ ڤەگەراندنا دەستھلاتێن خوە یێن بەرێ پاشڤە نەچوو. وی ژی ئەو پێشنیارا کو ژ بۆ وی ھاتبوو کرن کو دەمەکێ بچیتە دەرڤە رەد کر. تێ فکرین کو لاھوور جەنگی بورھان ب ڤان رەفتارێن خوە پالپیشتییا ھندەک ھێزان دکەت. سێ ھێزێن سەرەکی ئەڤەنە.

ئیران و بازرگنێن بەرژەوەندیپەرەست پشتگرییا تێکدانێ دکەن

 یەکەم؛ ژ بەر کو ئیران دزانیت کو ئالۆزییێن گشتی یێن سلێمانیێ دێ باندۆرێ ل ھەرێما کوردستانێ ژی کەن، لەوما ئاگرێ ڤێ تێکدانێ گور دکەن. ھەر وەھا د ناڤا ئاگاھیێن ھاتنە بدەستخستن دا، د ڤێ رەوشا ئالۆز دا ئیران دخوازیت، حکوومەتا ئیراقێ دەستوەردانێ د سلێمانیێ بکەت. ھەموو لایەن ژی دزانن کو لاھور بورھان خوەدی پەیوەندییێن گەرمە ل گەل حەشدا شەعبی دا.

دویەمین بازرگانیا نەیاسایی؛ د دەما لاھوور جەنگی بورھان دا ل باشماخ و دەریێن دی یێن سینۆرێ ئیرانێ را بازرگانیا نەیاسایی دھات کرن. ب تایبەتی ژ بلی قاچاخچیا نەفت و گازێ ب تۆنان تریاک د دەریان را دەرباس دبوو. ئەڤ مادێ ھشبەر ب رێکا بازرگانێن مەزن ڤە دەرباسی رۆژئاڤا و ئیراقێ د ھاتنە کرن. ئەو کەسێن کو ب ڤێ بازرگانیا نەیاسایی ڤە مژوول دبن، پشتگرییا لاھور جەنگی بورھان دکەن کو ئەو ڤەگەرنەڤە سەر سیستەمێ خوەیێ بەرێ. لۆما ژی ئالیگرێن تێکدانێ نە.

پەکەکە ژی ئالیگرێ کاۆسا سلێمانیێ یە

پشتگرێ سێیەمین و گرینگ پەکەکە یە؛ پەکەکە د دەما لاھور جەنگی بورھان دا ل سلێمانیێ ب ڤەکرنا گەلەک سازیان ل ھەرێمێ ب جھ بوو. د ڤێ سەردەما لاھور دا پەکەکێ ئەو پرۆژەیا سالێن 1990ێ دا چێکری کو پارچەکێ ژ یەنەکێ قودبکەت، دیسا خستە رۆژەڤا خوە. جەمیل بایک خواست کو د ناڤا یەنەکێ دا ئەو گرۆپا ژ سەرۆکاتییا یەنەکێ سل و عاجز ل دۆرا خوە کۆمبکەت. پەکەکێ ژ بۆ ڤانا رێک د ئاستا بازرگانیا دەرڤەیی سینۆر و ھەر جوورەکێ قاچاخچیتیێ دا ڤەدکر. ب چاپەمەنیا خوە پەکەکێ ئەڤ کەسە بلند کرن. ھەر وەھا دناڤا پێشمەرگەیێن یەنەکێ ژی خوە رێخستن کر. ب راستی د ناڤا یەنەکێ دا کۆمەکا بچووک ھەیە کو ب پەکەکێ ڤە یەکتیا بەرژەوەندیان ئاڤا کریە. ئەڤ کۆم و پەکەکە ژ بەر کو ھەبوونا خوە ل سەر لاوازبوونا یەنەکێ ئاڤا کرنە، ھەول ددەن ئالۆزی و تێکدانا سلێمانیێ کوورتر بکەن.

شێوازێ  پەکەکێ یێ کەتنا ناڤا خوەپێشاندانێن خوەندەکاران دا ڤێ باوەریا مەیا کو  پەکەکە ئالۆزییێ گوردکەت پاشراست دکەت. د چالاکیان دا پەکەکێ ب ناڤێ رێڤەبەریا خوەپێشاندەران بەلاڤۆک بەلاڤ کرن. د بەلاڤۆکێ دا ل سەر مژارێن وەکی مۆلۆتۆف چاوا بهێنە چێکرن، دژواری چاوا بهێتە بکارئانین، پێویستی ب ئێریش کرنا کیژان جیھا ھەیە؛ د ڤان بابەتێن تەکنیکی دا ئاگاھی دھاتنە دایین. و ھەر وەھا د خوەنیشاندانان دا توندی د ھاتە بکار ئانین.

ژەھریکرن بەشەک ژ دەستخوەڤە ئانینا دەستھلاداریا یەنەکێ یە

ژەھریکرنا کادرۆیێن سەرەکی یێن وەک مەلا بەختییار و هوستا حەسەن د ناڤ یەنەکێ دا ژی گرێدایی ستراتەژییا دەست دانانە سەر یەنەکێ یە. ژ بەر کو ب ڤی ئاوایی یەنەکە لاواز کرن ب رامانا وێ یەکێ دهات کو دا لاھوور جەنگی بورھان دکاریت دەست دانیتە سەر یەنەکێ. ئارمانج ئەڤە بوو. ژ بەر ڤێ یەکێ ژی مژارا ژەھریکرنێ نە تەنێ ل ھەمبەری شەخسان، ل ھەمبەری یەنەکێ ھاتییە پلان کرن.

ئیستیفزاز ژ بۆ کێ یە؟

پلانا دەست دانانە سەر یەنەکێ ژ لایێ لاھۆر جەنگی بورھان ڤە، پلانەکا کەسۆکی نینە، بەلکو پلانەکا ھەرێمی یە. د ڤێ پلانێ دا ئیران، ئیراق و ھەتا ب ئاوایەکێ نەراستەراست ترکیا ژی ھەیە، ئانکو ھەموو داگیرکەرێن کوردستانێ دناڤا ڤێ پلانسازییێ دا نە. لاھوور جەنگی بورھان د ناڤا یەنەکێ دا کو یەک ژ ئاکتۆرێن سەرەکی یێن سیاسی یێن ھەرێما کوردستانێ یە، وەکە ھەسپێ تروادایێ ھاتییە بکارئانین دا کو کوردستانا فدەرال لاواز ببیت.

د دەما کو یەنەکە د بن دەستھلاتا لاھۆر جەنگی بورھان دا بوو، ئەو هوستایێ رادەستکرنا کەرکووکێ ژ بۆ حەشدا شەعبی  و ھەموو بوویەرێن دژی-کوردستانێ بوو. ژ بۆ ڤێ ژی لاھوور جەنگی بورھان نە تەنێ  ژ بۆ یەنەکێ ژ بۆ چارەنوسا ھەموو کوردستانێ وەکە ھەسپێ تروادایێ ھاتە بکارانین.

ووسا تێ فکرین کو لاھۆر جەنگی بورھان ژ بەر ئەرکێن کو دەولەتێن ھەرێمی داینە وی و ژ بەر ھێرسا خوەیا دەستھلاتداریێ دێ ڤێ پێڤاژۆیا ئالۆزییێ، بەردەوام کەت. ل سەر ڤێ راستییێ ژی ب تایبەتی رەوشەنبیرێن ناڤ یەنەکێ ووسا دفکرن کو پرسگرێک بەر ب پەڤچونەک لەشکەری ڤە دچیت و لاھۆر جەنگی بورھان دکاریت سلێمانیێ بسۆژیت.

ل سەر ڤی باباتی چالاکڤان ھیوا میران داخویانیەک پارڤە کر و  گۆت؛ “پەیاما گەفخوارنێ یا لاھور جەنگی بێھنا خوینێ ژێ دهێت. ھێڤیدارم کو تشتەک خراب چێ نەبیت. لێ ئەز دترسم کو د ناڤا یەنەکێ دا شەرەکێ ناڤخوەیی دەستپێ بکەت” و بال کشاند سەر ڤان بوویەرێن سلێمانییێ.