جوانێن شۆره‌شگه‌ر، ره‌ڤاندنا زارۆكێن كوردان و فێلبازیێن په‌كه‌كێ

pkk-ciwan-zarok-revandin-kck-hpg-gerila-apo-ocalan-

د ناڤا په‌كه‌كێ دا هەر هەیڤ كۆمبوونا کادرێن په‌كه‌كێ دهێته‌ كرن، هەر 6 یان 3 هەیڤان ژی جارەکێ كۆمبوونێن بەرفرەهـ دهێنه‌ كرن، رۆژه‌ڤا هه‌یی دهێته‌ نرخاندن و پلان دهێنه‌ چێكرن، دیسا تشتێ گرنگ ته‌علیماتێن کۆنسەیا كه‌جه‌كێ دهێنه‌ خواندن، هەر سالێ جارەکێ ژی کۆنفرانسێن كادران دهێنه‌ ساز كرن.

د ڤان كۆنفرانسان دا، «ته‌حلیل و ته‌علیماتێن» ئاپۆی دهێنه‌ خواندن و پلانێن قەندیلی ژ بۆ رۆژئاڤا و پارچه‌یێن دی یێن کوردستانێ، ئه‌ورۆپا، ئەرمەنستان و وەلاتێن ئاسیایی وەک کازاخستان، قیرغیزستان، رووسیا و گورجستانێ دهێنه‌ دانان، هەر ویلایه‌ته‌ك راپۆرتێن چالاكیێن خوە یێن سالانە د نرخینن چ سەرکەفتن ئینابن‌ یان ژی نه‌، ئه‌ڤ هه‌موو تشته‌ دهێنه‌ نرخاندن و حه‌ساب دگه‌ل وان دهێته‌ كرن.

ژ بۆ پلانێن سالا نوو بەرنامە و ئارمانج دهێنه‌ ده‌ست نیشان کرن، سالانە یان ژی 6 مەهان جاره‌كێ چ کارێ بهێته‌ كرن، وه‌ك ئەندام چێکرن، شەرڤان تەڤلیکرن، پارە و هاریكاری کۆم کرن، چالاكیێن له‌شكه‌ری هەموو دهێنه‌ پلان کرن و بەرنامە بۆ دهێته‌ چێکرن.

کارێ کادێ هەره‌ سەرەکی تەڤلیکرنا زارۆکانە، هەر ویلایه‌ته‌ك پێدڤییه‌ سالانە ئەو هەژمارا کو بۆ هاتییه‌ ده‌ست نیشان كرن، پێویسته‌ هند شەرڤانان تەڤلی رێزێن هێزێن په‌كه‌كێ بكه‌ت، ئانكو بكه‌ته‌ گه‌ریلا، رێ و رێبازێن تەڤلیکرنێ ل سه‌ر كادری دمینیت كانێ دێ ب چ رێك بن، ئەگەر د وی وه‌ختێ كو بۆ هاتییه‌ ده‌ست نیشان كرن، وی كادری ئه‌و قه‌ده‌ر شه‌رڤان نه‌بربنه‌ د ناڤ رێزێن گه‌ریلایان دا، ب سه‌رنه‌كه‌فتی دهێته‌ هه‌ژمارتن و لێپرسین دگه‌ل دا دهێته‌ كرن، كادرێ سه‌رنه‌كه‌فتی ژی پێدڤییه‌ خوه‌ ره‌خنه‌ بكه‌ت و راپۆرتێن ره‌خنه‌یی ل سه‌ر خوه‌ بۆ كۆنسه‌یا كه‌جه‌كێ بنڤێسیت، هه‌ڤالێن خوه‌ ئیخبار بكه‌ت داكو جاره‌كا دی ببیته‌ جهێ باوه‌رییا كۆنسه‌یا كه‌جه‌كێ.

هه‌ر شه‌رڤانێ بۆ ناڤ رێزێن په‌كه‌كێ هاته‌ كێشان، نابیت ئه‌و داییك و بابێن خوه‌ ببینیت، ئه‌گه‌ر هات و پێدڤی كر كو داییك و بابان رازی بكه‌ن، دێ رابن وی زارۆكی داننه‌ به‌ر كامیرێ و وی ده‌قێ كو په‌كه‌كێ بۆ ئاماده‌كری دكه‌نه‌ د ده‌ستان دا و پێ دده‌نه‌ خواندن و پاشی ژی وێ ڤیدیۆیێ دئینن و نیشا مالا وی دده‌ن و د بێژنێ ئاها ئەڤە دەنگ و ڤیدیۆیا زارۆکێ وه‌ یه‌، ئه‌و ب خوه‌ گه‌هشتییه‌ رێزێن په‌كه‌كێ و نه‌ڤێت ڤه‌گه‌ریت مالێ.

گەلەک مالباتێن دلساخ هەنە ژ ڤێ تشتی باوەر دکه‌ن و نزانن کو ئەڤه‌ خاپاندنە، ئەو مالبات بێ چارە و بێ دەنگ ڤەدگەرنە مالا خوە.

«جوانێن شۆرەشگەر» نە رێخستنەکە ژ په‌كه‌كێ، کادرێن وێ جودانە، ئەڤ رێخستن عه‌ینی کادرێن په‌كه‌كێ ب خوە نە، ئەڤه‌ فێلبازیەکە په‌كه‌كە ل خەلکێ دکەت، هەر کادره‌كێ په‌كه‌كێ وه‌ختێ زارۆکەکی ده‌ست نیشان دكه‌ت پێدڤییه‌ ئه‌و ب خوه‌ وی زارۆكی ببه‌ت وبكه‌ته‌ د ناڤ رێزێن په‌كه‌كێ دا، هه‌گه‌ر نه‌شییا ڤی تشتی بكه‌ت،  دێ په‌یامێ بۆ «جوانێن شۆرەشگەر» هنێریت و چه‌كدارێن ڤێ رێخستنێ دێ چن ب سه‌ر مالا وی زارۆكی دا گرن و ره‌ڤینن.

ده‌مێ مالبات پێ دزانیت، دبێژنه‌ كادرێ په‌كه‌كێ كا زارۆكێ مه‌، ئه‌و دێ بێژنێ چ په‌یوه‌ندییا مه‌ پێڤه‌ نینه‌، هه‌رن ژ جوانێن شۆره‌شگه‌ر ببپرسن، له‌وما په‌كه‌كه‌ ب وێ فێلبازیێ و ل بن ناڤێ «جوانێن شۆرەشگەر» مالباتێن کورد ب ڤی شێوازی د خاپینیت.