سمكۆ عه‌بدولعه‌زیز:
ئیرۆ من پێگه‌ها رۆژنیوز ئا رێخستنا په‌كه‌كێ د شۆپاند، مانشه‌ته‌ك ئینابوو پێش و تێده نڤیساندبوو: ل شه‌نگالێ ژن فێری زمانێ داییكێ دبن!!
ڤی مانشه‌تی بالا من كشاند و فكارێن من كوور برن، من ژ خوه پرسی، قه‌ی ژنێن شه‌نگالێ زمانێ خوه یێ ره‌سه‌ن وه‌ندا كرنه و رێخستنا په‌كه‌كێ خوله‌كه په‌روه‌ردێ ژ بۆی وان چێكرییه كو وان جاردن فێری زمانێ داییكێ دكن؟ یا راست ماتمایی مام.
تشتا كو ئه‌م دزانن و مه ژیان كری، ئه‌ڤ نێزی 40 سالانه ل شه‌نگالێ مه، گه‌لێ شه‌نگالێ ب ته‌یبه‌ت ژن ته‌نێ زمانێ داییكێ دزانن، ئه‌و ژ چ زمانێن دن فێم ناكن، شه‌نگالا كو ب واته‌یا ناسنامه‌یا كوردایه‌تی و ره‌سه‌ناتییا زمان، چاند و هونه‌را كوردی تێ، چما ئیرۆ په‌كه‌كه لێ خوه‌دی ده‌ركه‌تییه و ژنێن شه‌نگالێ فێری زمانێ داییكێ دكه؟! قه‌ی ما دبه كو ل ڤان سالێن ل ژێر ده‌ستهلاتا په‌كه‌كێ ژنێن شه‌نگالێ زمانێ خوه وه‌ندا كربه؟
ل ڤر دو راستی هه‌نه و هه‌ر كه‌س دزانه:
یێك: خوه‌یایه رێخستنا په‌كه‌كێ ته‌نێ زمانێ تركی دزانه و ئه‌شكه‌ره یه كو زمانێ فه‌رمی یێ قه‌ندیلێ تركی یه.
دو: د 100 سالێن رابووری ده، حكوومه‌تێن یێك ل په‌ی یێك یێن ئیراقێ هه‌ول دانه كو شه‌نگالێ ته‌عریب بكن و زمانێ ره‌سه‌ن ژ بیرا گه‌لێ وێ ببن و وان د ناڤا عه‌ره‌بان ده ئاسمیله بكن، لێ به‌لێ ئه‌ڤ هه‌ولێن وان هه‌موو راستی شكه‌ستنێ هاتنه، ژ به‌ر كو ته‌ڤی ڤان هه‌موو هه‌ولێن داگیركه‌ران، گه‌لێ شه‌نگالێ زمان و چاندا خوه پاراست و نه‌هشت هنه‌كی ژی لاواز ببه، به‌لكو گه‌لێ شنگالێ موكر هات و شه‌نگال كره كانییا ره‌سه‌ناتییا زمان، ستران و دیلانێن كورده‌واریێ.
چما ئه‌م ژ په‌كه‌كێ ره دبێژن ده‌ستێن وه خوه‌ش
ل ڤر و پاش خوه‌ندنا وێ نووچه‌یا كو رۆژ نیۆزێ پارڤه‌كری، ئه‌م ب خوه‌ره كه‌تم نیقاشێ و گه‌هشتم وێ باوه‌رێ كو دڤێ مرۆڤ ژ په‌كه‌كێ ره ببێژه ده‌ست خوه‌ش بن، ژ به‌ر كو تشتا ئه‌و دكن دارێ سحری ژ بۆی لازمه، ئانگو تشتا كو داگیركه‌ران نكاری ب 100 سالان ئه‌نجام بدن، وان ب 3 هه‌یا 4 سالان ئه‌نجام دا.
لێ به‌لێ پاش كو من جار دن ته‌عقیبا وێ نووچه‌یێ كری و دیمه‌نێن ڤیدیۆ یێن كو پێره هاتنه پارڤه‌كرن، تشته‌كا دن خوه‌یا بوو، كۆمیدیایه‌ك ره‌ش خوه‌یابوو!!
ئه‌شكه‌ره بوو كو ئه‌ڤ خول نه ژ بۆی فێربوونا زمانێ داییكێ یه، لێ به‌لێ ئه‌ڤ خول ژ بۆی فێركرنا رێنڤیسا ب پیتێن كورمانجی یه، گه‌لێ شه‌نگالێ ب ئه‌لف و بێیا ئارامی دنڤیسینن، لێ به‌لێ رێخستنا په‌كه‌كێ هاتییه و خوله‌كه فێربوونا كۆرمانجیێ ب ئه‌لف و بێیا لاتینی ژ بۆی وان چێكرییه.
ئارمانج ژ ڤێ خولێ ئه‌ڤه ژ بۆ كو گه‌لێ شه‌نگالێ بكارن ئه‌ده‌بیاتێن رێخستنا په‌كه‌كێ بخوینن و په‌كه‌كه بكاره ب هێسانی ل سه‌ر مه‌ژیكێ وان ب شوغله.
چما ئه‌ڤ مژار هات نڤیساندن؟
كورد دبێژن: د كه‌ڤن ده ده‌ما كو مرۆڤ نه‌خوه‌ش دبوو، ئه‌و دبرن سه‌ر مه‌زارێ ئومه‌ر مه‌ردان، لێ كه‌سه‌كی گۆ پا هه‌گه‌ر ئومه‌رمه‌ردان نه‌خوه‌ش بوو وێ وی ب كوده‌رێ ببن؟
گۆتنه‌كه دن یا پێشییان هه‌یه دبێژه: زمان خوه‌شه، لێ زك ره‌شه، مه‌دیا په‌كه‌كێ ژی ژ بۆ كو ل سه‌ر خاپاندنا گه‌لێ شه‌نگال بدۆمه، ژ بۆ كو ئایدۆلۆژییا رێخستنێ ب گوهێ شێنیێن شه‌نگالێ ده ده‌وام ببێژه و ب وان بده خوه‌ندن، خولێن ووسا چێدكه، هه‌ول دده ئه‌ده‌بیاتێن خوه یێن قرێژ ب زمانه‌كێ خوه‌ش ب ئاڤێژن، لێ به‌لێ تشتا عه‌جێب ژی ئه‌ڤه كو مه‌دیا په‌كه‌كێ نڤیساندییه خولا زمانێ داییكێ، لێ به‌لێ د راستی ده خول یا فێربوونا رێنڤیسێ یه، واته مه‌دیا په‌كه‌كێ ژ به‌ر كۆكا زمانێ وان تركیه، ئه‌و هێژان جوداتیێ ل نێڤبه‌را زمانی و رێنڤیسێ ده ناكن.
