نوری چەلیک
دەم و دەزگەھێن خەلکی ژ بۆ خورتکرن و پاراستنا بەرژەوەندییێن مللەت و وەلاتێ خوە کار دکەن.
ژ بۆ لھەڤراگرتن و رێکەفتنا نەتەوا خوە کار دکەن و ھەول ددەن چارەسەرییان ژ بۆ ناکۆکی و پرسگرێکێن ناڤا جڤاکێ خوە دا ببینن.
ل دەرڤەیی وەلاتی و ل ئەورۆپایێ ژ بلی کوردان ھەما بێژن هەموو نەتەوەیان خزمەتا یەکیتییا خوە و بەرژەوەندی یێن وەلاتێ خوە دکەن.
گاڤا مژار دبیتە بەرژەوەندی یێن نەتەوی، ئالا و وەلات، ھەموو ناکۆکی و پرسگرێکێن ناڤخوەیی داتینن ئالییەکی و دبنە یەک دەست، دبنە یەک دەنگ و یەک ھێز.
بێگومان ئەڤ یەک ژ خورتبوونا ھەستێن وان یێن نەتەوی، ژ خوەناسکرن و ھزرا وانا وەلاتپەروەریێ دروست دبیت.
بەرەڤاژی خەلک و نەتەوەیێن دی، ئەم کورد چ ل وەلاتی بین و چ ل دەرڤە و ئەورۆپایێ بین، ئەم چ جارا نەبوونە خوەدییێن وان ھەست و گیانێ نەتەوی کو بکارین بەرژەوەندی یێن خوە یێن شەخسی، مالباتی و پارتایەتی دانین ئالییەکێ و ل دۆرا بەرژەوەندی یێن نەتەوی کۆم ببین.
ئەڤە ژی ھەلبەت ژ لاوازبوون، سستبوون، ژاربوون و ژ نەبوونا ھەست و ھزرێن نەتەوی دروست دبیت.
ھەست و ھزرێن نەتەوەیێن دی ژ دل و مەژییێ وانە، یێ مە کوردان ژی تەنێ ب زمان و ژ زمانێ مەیە.
نە ژ دل و مەژییە، نە ب دل و مەژییە. نەتەوپەروەرییا مە نەتەوپەروەرییەک خاڤە، بێ واتا و بێ ئارمانجە.
گۆتن ھەیە لێ د کرنێ دا چ کەس ئەرک و نرخێن نەتەوپەروەرییێ جێبەجێ ناکەت.
ب زمان ھەرکەس کوردپەروەر و نەتەوپەروەرە، لێ د کرن و ئەمەل دا بێھنا نەتەوپەروەرییێ ژ وان ناهێت.
بەرژەوەندییێن مە د سەر ھەر تشتی دانە و گاڤا بەرژەوەندییێن مە دکەڤنە مەترسییێ دا، نەتەوپەروەرییا مە ژی وەندا دبیت.
ھەلبەت بێدەولەتبوون و نەبوونا پەروەردەیەکا نەتەوی و نەتەوپارێزی د کەسایەتی و نەتەوپەروەرییا مە دا رۆلەک مەزن دگێریت.
لێ گاڤا ئەم ل خەلک و مڵەتێن دی دنێرین، یێن خوەدی دەولەت و بێدەولەت ژی نەتەوپەرەست نرخ و ھێژایی یێن وەلاتێن خوە نە و ھەست و ھزرێن وان یێن نەتەوی ژ یێن مە کوردان قات ب قات زێدەتر و خورتترن.
