پشتی مرنا مەروان بەدەل پیدڤییە ئێزدی جارەکا دی هزر بکەن

پشتی مرنا مەروان بەدەل پیدڤییە ئێزدی جارەکا دی هزر بکەن

بالەفرێن بێ پیلۆی یێن دەولەتا ترک بەری دو رۆژا ل کۆمەلگەها خانەسۆرێ ل شنگالێ ئێریش برن سەر ترۆمبێلەکێ و ھاتە دییار کرن کو کەسێ د ترۆمبێلێ دا ژیانا خوە ژ دەست دایی مەروان بەدەل حەجی یە. مەروان بەدەل ھەڤسەرۆکێ رێخستنا پەکەکێ یا کو ل شەنگالێ ھاتیە دامەزراندنە. شوکر کو ھەر دوو زارۆکێن مەروان بەدەل یێن کو د ترۆمبێلێ دا بوون ب ساخی دەرباس بوون. ب تایبەتی د سالا داوی دا، مە مەروان بەدەل گەلەک جاران ب ئاخافتنێن خوەیێن پرۆپاگاندەیی ل سەر ئەکرانێن تەلەڤزیۆنان دیت. ئالیگرێ سەرەکی یێ پەکەکێ و دژمنێ ھەرێما کوردستانێ بوو. تێگەهێن کو د ئاخافتنێن خوە دا بکار دئانین و ئاوایێ دەربرینا پرسگرێکان ددەتە خویاکرن کو دەمەکێ درێژ د قۆتابخانەیێن پەکەکێ دا پەروەردە دیتییە.

ئاخافتنا مەروان بەدەل یا کو د بیرا مە دا مایە ئاخافتنا سێیێ جۆتمەھێ یە. د ڤێ ئاخافتنێ دا بەحسا رێگریکرنا ل نامزەدێن پەدەکێ دکەت د دەما ھلبژارتنێن ئیراقێ دا کو دخواستن ژ بۆی بانگەشەیێ بچنە شەنگالێ. وی گۆتنێن وەھا دگۆتن: “پەدەکە دخوازیت بارەگەھەکێ ئاڤا بکەت، شەنگال دێ بەرخوەدانێ کەت، مە ئارتێش ھەیە، ئەم دکارین خوە بپارێزین، ئەم ب ئیراقێ ڤە گرێدایی نە.”

ئەم دزانین کو فکرێن سیاسی یێن مەروان بەدەل ب تەڤاھی شاشن و تەڤگەرا کو ئەو تێ دایە تەڤگەرەکا دژی کوردستانێ یە. لێ ب چ ئاوا نابیتە سەدەم کو ئەم ب مرنا ڤی کەسی شاد ببین. ئەڤە نە خەتا مە یا سیاسی یە. جیاوازییا ھەری مەزن د ناڤبەرا مە و پەکەکێ دا ژی د ڤێرە دایە. ئەم ل دژی کوشتنا هەر کوردەکێنە ژ ئالیێ داگیرکەرێن مە ڤە ل کو دەرێ بیت بلا ببیت، ئەم دێ ل دژی دەرکەڤین. تەبەقەبەندییا کوردان، پارچەکرنا وان، کێمکرنا وان و دژمناتیا وان نە ئەو رێبازە یا کو مە باوەری پێ هەیی. ژ بەر ڤێ یەکێ ئەم چ کین و کەربێ ل کەسایەتی و ژیانا مەروان بەدەل ناگرین. ژ بەر کو مەروان بەدەل قوربانیە. ئەو بوویە قوربانێ ئەجیندایێن پەکەکێ یێن ڤەشارتی. پێشبینیا وی یا سیاسی، کووربوون و زانینا وی تێرا ناسکرنا خەتا سیاسی یا راستا کو ئێزدیان ژ مرنێ رزگار دکەت نەدکر و ل پەی پۆپیلزما پەکەکێ دبەزی. دبیت کو ئەو ژ بەر بەرژەوەندییێن دارایی، ژ بەر ناڤوودەنگ، و پۆپولەربوونێ کەتبوو پەی پەکەکێ. د ئەنجامێ دا چ دبیت بلا ببیت وی ژیانا خوە ژ دەست دا و دو زارۆک ژی سێوی مان. ھەر وەھا ئەڤە ژ بۆ جڤاکەکێ مینا ئێزدیان کو قرکرن دەرباس کری، گەلەک زێدەیە. لێ یێن کو دکارن ڤێ رەوشێ راوەستینن ھەر ئێزدی بخوە نە.

دڤێت ئێزیدی دەست ژ فەداکرنا گەلێ شنگالێ د ناڤا فانتازییا یێن پەکەکێ بەردن. ژ بۆ ئێزدیان رێیا ھەری باش ئەوە کو داویێ ل رەوشا نە دیارا شنگالێ بینن. ژ بەر کو شنگال ب رەوشا خوە یا ئیرۆ ڤەگوھەریە قادا شەرێ دەستھلاتداریێ یا د ناڤبەرا ترکیا و ئیرانێ دا و دێ ھێژ زێدەتر ژی بەردەوام بیت. پەکەکە د ڤێ لیستکێ دا ئیرانێ دپارێزیت. کارێ حەشدا شەعبی ل شەنگالێ تەنێ  پاراستنا بەرژەوەندیێن شیعەیانە. گەلێ ئێزدی نە خوەدیێ تەجروبەکا سیاسی و لەشکەرییە کو رێ ل بەر ئیران و ترکیایێ بگریت دا کو شنگال نەبیتە قادا شەری. پەکەکە ل دژی پەدەکێ، پێشمەرگە و ھەرێما کوردستانێ د سەکنیت، جل و بەرگێن خوەڤەشارتنێ ل بەر خوە دکەت، ژنان ژ مالان کۆم دکەت و چادرێن پرۆتەستۆیی ئۆرگانیزە دکەت، زارۆک و خۆرتان کۆم دکەت و ل بەر ئاساییشێ حەرەکەتێن ئیستیفزازی پێک تینیت. مرۆڤێن ل دۆرا وان. لێ ئەو نە تشتەکن. ئەو تەنێ ئاموور و حەرەکەتێن پۆپولیست یێن پەکەکێ نە. ئەڤ یەک ژی نایێ وێ واتەیێ کو گەلێ شنگالێ خوەدی ھێزا پاراستنا خوەیە. ب دو دەبابە و دو بالافران دێ شنگال دیسا هێتە ھەلوەشاندن. پەکەکە ڤێ ھێڤی دکەت؛ بلا شنگال ببیتە قادا شەری، سڤیل بمرن، دا کو ھێزێن خوە ژ رۆژئاڤا بینن شنگالێ بجیهـ بکەن و ھەر رۆژ ژ وێرێ گەفان ل سەر ھەرێما کوردستانێ بکەن.

باشە، برایێن مە یێن ئێزیدی، ئەم ژ وە دپرسین، ئەڤ پلانێن پەکەکێ دێ چ مفا گەهینیت وە؟ دەما ھوون رابن و ژ بۆ عەڤدلا ئۆجەلان کۆنا ڤەددەن ما چ دبیت؟ قەت نەتشتەک ژی. مەروان بەدەل ژی ھەمان تشت دکر، چ چێبوو؟ نەکاری خوە ژی خلاس بکەت؟ نھا کۆمەک گەنجێن کو دخوازن وێنەیان بکشینن، ژ بۆ کامیرەیان باخڤن و لگەل کۆمێن کەچ و خۆرتان دا کەیفێ بکەن، مادێ ئەو قەدەرا شنگالێ دیار کەن؟ ئەڤ گەنجە نکارن بەرپرسیاریا ژیانا خوە بگرن سەر ملێ خوە. گەر کلیبەکا وان ل چرا تیڤی بهێتە وەشاندن، ھندەک ئێزیدی دفکرن کو دێ رزگار بن. تشتەکێ وەسا نینە قوربان. پەکەکە دخوازیت ئێزیدیان بکەنە قوربانیێن ناکۆکیێن ھەرێمی یێن د ناڤبەرا ترکیا و ئیرانێ دا.

مەروان بەدەل ژی یەکی قوربان بوو، پەکەکێ د گۆت ئەز دێ تۆلا سەعید حەسەن ڤەکەم و لەوما ژی مەروان ئانی شوونا وی. نھا دێ یەکێ دی ژی، ژ بۆ شوونا مەروان ئەرکدار کەت. ئەڤ زنجیرە دێ وەھا بەردەوام بیت، دێ ئێزدی جارەکا دی بینن کو ئەو بێ مال مانە. پەکەکە راستیا شنگالێ ژ جڤاکی ڤەدشێریت. رێڤەبرێن پەکەکێ سۆزدار ئاڤێستا و یێن دی دێ سبەهی رەڤنە تەھرانێ و شامێ. لێ دڤێت کەسایەتێن ناڤدار، سیاسەتمەدار و ئۆلدارێن ئێزدیان گەلێ ئێزدی ژ ڤی شەری بپارێزن. ستاتویا شنگالێ و چارەنووسا ئێزدیان ب ھەیەجانا چەند گەنجان نابیت ببیتە قوربانا ئەجیندایا ڤەشارتی یا پەکەکێ و ئیرانێ. د ئەنجاما بوویەرا مەروان بەدەل دا دڤێت ئێزدی ئەنجامەکێ باش دەرخن.