مەمەت مێردینی

سیاسەتا پەکەکێ یا دروستکرنا کین و نەفرەتێ د ناڤبەرا کوردان دا بەردەوامە، پەکەکە هەول ددەت ب ڤان کارێن خوە پارچەیێن کوردستانێ ل دژی هەڤ هان بدەت، یا پەکەکە دکەت هەمان تشتە کو ژ دەما پارچەکرنا کوردستانێ د ناڤبەرا دەولەتێن داگیرکەر دا، ئەڤ دەولەتە ل دژی کوردان دکەن. پەکەکە خوە وەکە پارتیەک کوردی دبینە و ب ناڤێ کورد و کوردستانێ تەڤ دگەرە، لێ بەلێ د ئەساس دا تەڤ کارێن وێ ل دژی کورد و کوردستانێ نە.

پشتی کو شانۆیا ژنان یا کو ب فەرمانا پەکەکێ ل سێمالکا دهێتە نیشاندان ئەنجام ب دەست نەخستی، پەکەکێ دەست ب شانۆیەکە دن کریە، د شانۆیا نوو دە پەکەکێ ئەڤ جار رۆلا سەرەکە دا “جوانێن شۆرەشگەر” و ئەو شاندن دەریێ سێمالکا کو ب زۆرێ دەری دەرباس بکن و بکەڤن ناڤا باشوور دا.

بەرا سێ رۆژان پەکەکێ ل هەر یەک ژ باژارێن دێرکێ و قامشلۆیێ ب سەماعەیان بانگەوازیەک ژ بۆی کۆم کرنا گەلێ ڤان باژاران و ئەنجامدایینا چاکایەکێ ل سێمالکا کر، لێ بەلێ گەلێ هەرێمێ ل پەی ڤێ بانگا پەکەکێ نەچوون، ب نەچاری پەکەکێ بریار دا کو شانۆیا خوە ب جوانێن شۆرەشگەر بدەتە نماییشکرن، د ئەنجام دا ئیرۆ دەمژمێر 2 یێ پاش نیڤرۆژێ چەتەیێن شۆرەشگەر د بن ناڤێ “جوانێن رۆژئاڤا” ل بەر دەریێ سینۆری یێ سێمالکا خواستن ب نەیاسایی دەرباسی باشوورێ کوردستانێ ببن، لێ بەلێ، ژ ئالیێ هێزێن ئەولەکایا باشوورێ کوردستانێ ڤە رێگری ل وان هاتە کرن، جوانێن پەکەکێ ژی وەکە کارێ خوە یێ هەر دەم ب کێر و دار و مولوتوفان و کەڤران ئێریشی هێزێن ئەولەهیا باشوور کرن و پشترا مەدیایا پەکەکێ راگهاند “هیزێن پەدەکێ” ئێریشی جوانان کرنە!

گەلۆ “جوانێن شۆرەشگەر” کینە؟

«جوانێن شۆرەشگەر» نە رێخستنەکا سەر ب په‌كه‌كێ یە، بەلکو ئەو پەکەکە ب خوە یە، هەر کارەکێ کو پەکەکە ناخوازیت راستە راست ل سەر ناڤێ خوە ئەنجام بدەت، ژ گرتن، کوشتن، ئیشکەنجەکرن، رەڤاندنا زارۆکا، لیدانا چالاکڤانێن رۆژئاڤا، گەفخوارن و ترساندنا کادرێن پارتیێن نە نێزیکی پەکەکێ ب ڤان چەتەیێن خوە ددەتە ئەنجامدان.

میلیشیایێن چەکدار یێن ب ناڤێ جوانێن شۆرەشگەر ل رۆژئاڤا تەڤدگەرن، راستەراست ب قەندیلێ ڤە گرێداینە و گوھ نادەنە کەسەکێ ژ بلی قەندیلێ. فەرمانا خوە راستەراست ژ جەمیل باییک وەردگرن. ئەڤ جوانە نەزانن و پرانیا وان مادەیێن هشبەر ب کار تینن و ئەون کو ئێریشێ جھ و مالێن خەلکی دکەن. جوانێن شۆرەشگەر کۆمەک ژ جوانێن سەر هشک یێن پەکەکێ نە، ئەو مینا رۆبۆتانن، ریمۆتکۆنترۆلا وان د دەستێ جەمیل باییک دایە و وەکە ئەو دخوازیت وان بکار تینیت.  

پەکەکە ژ بۆ کو د قادا سیاسەتێ دا خوە نەئێخیتە تەنگاسیێ، رێخستنا ب ناڤێ “جوانێن شۆرەشگەر” بکار تینیت. د وانا دا نە ھەست، نە سۆز و نە ژی وەلاتپارێزی نینە، هەژمارەک جوانێن سەر ڕەق و نەزانن کو پەکەکە چ فەرمان ب وان بدەت ئەو بێ تەفکیر و ھزر ئەنجام ددەن.  

کەڤرێن وان، کێرێن وان و ھەموو ئاموورێن وانا یێن خەرابکرنێ ل سەر پەکەکێ نە. دەما دبێژنە وان ئێرشێ بکەن ئەو چەپ و راست ئێریشێ دکەن. ئەو ناپرسن کا وان ئێریشی چ کریە و ئەو ناپرسن بۆچی ئێرشێ دکەن. مینا رۆبۆتەکێ، گاڤا کو ئیشارەت پێ دهێتە دایین ئەو حەرەکەتێ دکن.  

 ب قاسی کو ڤان جوانان ئێریشی ئالایێ پیرۆزێ کوردستانێ کری، ب قاسی کو ڤان جوانان بێ رێزی ب پیرۆزیێن کوردستانێ کری، نە جوانێن عەرەب، نە یێن ترک و نە ژی یێن فارس ئەڤ بێ رێزییە ل همبەر پیرۆزیێن کوردان نەکرنە. جوانێن پەکەکێ و جوانێن چەتەیێن فاشیستێن دەولەتا ترک بەرھەمێن ھەمان زیھنیەتێ نە. ئەو ژ ھەڤدو جودا نینە. “ئوولکوو ئۆجاکلار”یێن ترکان و جوانێن شۆرەشگەرێن پەکەکێ خوەدی یەک سیستەم، تێگەھ و ئارمانجێ نە. پەکەکە کاریکاتوورا دەولەتا ترکایە، ژ بەر ڤێ یەکێ مینا ترکیێ تەڤدگەرە هەر وەک چەوا ترکیێ هەبوونا خوە ل سەر تونەکرنا کوردان ئاڤاکریە، پەکەکێ ژی هەبوونا خوە ل سەر تێکدانا یەکرێزییا کوردان ئاڤا کرییە. ب کورتی جوانێن شۆرەشگەر روویێ راستەقینەیێ پەکەکێ یە.

مەدیایا پەکەکێ و سەرڤیسکرنا نووچەیێن دەرەو ل سەر سێمالکا

وەکە کارێ خوە یێ هەر دەم، مەدیایا پەکەکێ ئیرۆ ژی دەست ب سەرڤیسکرنا دەرەوان و چێکرنا نووچەیێن دەرەو کر، هەر د زوو دا مەدیایا پەکەکێ راگهاند، ” پەدەکێ ل سێمالکا ئێرش بر سەر جوانان.” ئەڤ دەرەوکا دیارا پەکەکێ یە، ژ بەر کو هەر د وان دیمەنێن ڤیدیۆیی یێن کو وان ب خوە د رووپەلێن خوە دا پارڤە کری باش خوەیا دبیت یێن کو ئێریش کری، یێن کو دار و کەڤر و مۆلۆتۆف د دەستێ وان دا بوون جوانێن پەکەکێ بوون، جوانێن بێ رومەتێن پەکەکێ ئێریش برن سەر هێزێن ئەولەهیا باشوور و زرار گهاندن وەساییت و هیزێن ئەولەهیێ، یێن کو جوانێن پەکەکێ بریندار کری ژی، ئەندامێن پەکەکێ ب خوە بوون، پەکەکێ ئەڤ کار ب تەنێ ژ بۆی ڤێ یەکێ کر، داکو د مەدیایا خوە دە ببێژیت “هیزێن پەدەکێ ئیریشی جوانان کرن”، لێ چ راستی ژ بۆی ڤان نووچەیێن پەکەکێ نینە، هیچ هێزەکا پەدەکێ ژی ل وێ دەرێ نینە، یێن ل وێ دەرێ هێزێن ئەولەهیا باشوورێ کوردستانێ نە و فەرمانێن خوە ل حکوومەتا هەرێما کوردستانێ وەردگرن، نە ژ پەدەکەیێ.

مەشا چەتەیێن پەکەکێ یا د بن ناڤێ “وەرن جەنگا روومەتێ” و دوو روویی یا وان

ل گۆر زانیاریێن ژ هەرێمێ 98% ژ وان چەتەیێن جوانێن شۆرەشگەر کو ئیرۆ د بن ناڤێ “وەرن جەنگا روومەتێ” دخواست چالاکیەکی ل باشوورێ کوردستانێ پێک بینن عەرەب بوون، ژ بەر کو نها پرانیا گەلێ رۆژئاڤا ژی ب دەرەوێن پەکەکێ و راستیا جوانێن وێ دزانن و ناخوازن ببنە ئاموورێن پاراستنا بەرژەوەندیێن پەکەکێ.

جوانێن پەکەکێ ل جیهێ کو بچنە سەر سینۆرێ ترکیێ و ل دژی ترکیێ چالاکیان ئەنجام بدەن، ل شوونا بچن ل همبەر رەژیما بەشار ئەسەد چالاکیان ئەنجام بدەن، پر ب روو قاییمی هاتینە و دخوازن ل باشوورێ کوردستانێ د بن ناڤێن بالکێش دا چالاکیان ئەنجام بدەن و رەوشا باشوور تەڤلیهەڤ بکەن.

گەر جوانێن پەکەکێ راست دبێژن، گەر خوەدی روومەتن، بلا بچن و داخوازا رادەستکرنا جەنازەیێن کوردان ژ دەولەتا ترکیێ و سووریێ بکن، بلا بچن و داخوازا جەنازەیێ وان ولاتپارێزێن رۆژئاڤا بکن کو ب دەستێ پەکەکێ و پەیەدێ هاتنە تەسفیە کرن، گەر ب قاسی بێروومەتەک ترک ژی روومەتا وان هەبیت، بلا بچن و وان زارۆکێن کوردان یێن ژیێ وان د ناڤبەرا 11 هەیا 16 سالیێ دا کو پڕ ب بێروومەتی ئەو رەڤاندنە و د بەرژەوەندا پەکەکێ دا چەکدار کرینە ل مالباتێن وان ڤەگەرینن، لێ هەر کەس باش دزانیت، یێ نێزیکی پەکەکێ ببیت، یێ کو ببیتە مریدێ پەکەکێ، یێ کو مەژیکێ وی “هەلبەت گەر هەبیت” کار بکەت، ئەو نێزیکی پەکەکێ نابیت، ژبەرکو یێ نێزیکی پەکەکێ بوو چ روومەتا وی ژ بۆ پیرۆزیێن کوردستانێ نینە، ئەو دبەن کەسێن پڕ بێ روومەت وەکە چەتەیێن جوانێن شۆرەشگەر.

چ کەس ب ل خوە کرنا ناڤێن مەزن مەزن نابیت و نابیتە شۆرەشگەر، گەر دخوازی ببیە کەسەکێ مەزن، گەر دخوازی ببیە شۆرەشگەر چ پێویستیا تە ب رەڤاندن، ئیشکەنجەکرن، ئێریش، گەف، لێخستن و بێ روومەتیکرن ب هەڤ نەتەوەیێن تە نینە، یێن کو دخوازن شۆرەشێ بکەن پێدڤییە نەبنە مریدێن چ کەس و ئالیەکێ، نابیت ژ ئالیەکێ تو خوە وەکە شۆرەشگەر بدەیە ناسکرن و ژ ئالیەک دی بێ روومەتیێ ب شۆرەشگەرێن وەلاتێ خوە بکەی.

یێن وە ئیرۆ بێ روومەتی ل همبەر وان کری شۆرەشگەرێن کوردانن، ئەو، ئەو پێشمەرگەنە کو ل دژی تەڤ رەژیمێن داگیرکەر شەر کری، ئەون یێن کو هاتی و کۆبانی رزگار کری، ئەون یێن کو ب سایا سەرێ وان پەرچەیەک ژ کوردستانێ ئیرۆ ئازاد بوویی و بوویە سەیوانا پاراستنا تەڤ کوردەکێ.

جەنگا روومەتێ ل ئەنقەرێ، ل تەهرانێ و ل شامێ یە، نە ل بەر دەریێ سێمالکا، ژ کەرەما خوە هەرن و جەنگا خوە ل وێ دەرێ بکەن، لێ بەلێ، ڤێ یەکێ باش بزانن، ب درۆشم، کێر، کەڤر، دیلان، مەش، وێنەیێن ئۆجالان و ئالا پەکەکێ چ جەنگ نایێنە کرن. جەنگ ب مەژیک، چەک و تەکنۆلۆژییا سەردەم دهێتە کرن، نە ب قیرەقیر و مەشێن ساختە.