تێگەھشتن و شرۆڤەکرنا بوویەرێن کو د ڤان رۆژێن داوی دا ل ھەرێما کوردستانێ دقەومن، گەلەک گرنگن. شانۆیا کو پەکەکێ ل شەنگالێ و ھەری داوی ل سێمالکا ل پشت کۆمەک جوانان چێکری، شانۆیەکا قریژ بوو. پەکەکێ ئەڤە دەمەک درێژە سەناریۆیەک دنڤیساند و نھا وێ سەناریۆیێ دکەتە شانۆ و بەرچاڤ دکەت. پەکەکە ھەر رۆژ شانۆیەکا نوو و ب سەناریۆیەک نوو دنڤیسیت، ژ بەر کو چ کەس و راگاھاندنا ھەرێما کوردستانێ ژی د ناڤ دا، روویێ پەکەکێ یێ راست ئاشکەرا ناکەن. ھەر رۆژ ل دەرەکێ کێشەیەکێ دروست دکەن. لێ بەلێ ھەیا کو ب ئاوایەکێ ئاشکەرا تێکلیێن پەکەکێ و حەشدا شەعبی ژ بۆ رایا گشتی نەھێتە زەلالکرن، چ کەسەک نکاریت رێگریێ ل فتنە و فەسادییێن پەکەکێ بکەت. لێ ئەم دێ بێژینە پەکەکێ، ھوون چ دکەن بکەن، گەنجێن عەرەب کۆم بکەن و بەر دەرییێ سینۆری بلەیزینن، ژ رۆژئاڤا ھێزێ بشینن شەنگالێ و خوەپێشاندانا بکەن، ھوون چ بکەن ژی، ھوون نکارن “کا بۆچی ھوون ب جل و بەرگێن حەشدا شەعبی دگەرن” شرۆڤە بکەن.
راستی ئەڤەیە، پەکەکە چ بکەت و کێ تاوانبار بکەت ژی نکاریت ھەڤپەیمانیا خوەیا لگەل حەشدا شەعبی دا یا ل دژی کوردستانێ راڤە بکەت. دڤێت ئەڤ روویێ پەکەکێ بهێتە ئاشکەرا کرن، ئیفشا کرن. نەخوە شێوازا پەکەکێ وەکی عەزۆیا ھەری یە. ئانکو شێوازێ عەزیمایا ھەری. ھەلبەت ھوون نزانین عەزیما ھەری کێیە.
عەزیمایا ھەری ژنەکا ناڤسالە یا گوندێ مە بوو. ئەو ژن سێ جارا زەوجی بوو و ھەر سێ مێرێن وێ ژی مری بوون. ئەو لگەل کورێ خوەیێ کێم ئەندام دا دژیا. پیرەمێرا و پیرەژنا دگۆت ھەموو مێر ژ بەر کو عەزیمێ ئەو “کولەجەرگی کرینە” لەوما مرینە. ناڤەکێ دی یێ وێ ژی عەزۆیا قەرەچە. ھەموو گوند ژێ دترسیا و کەسێ نەدخواست روویێ عەزۆیێ ببینیت. ھەتتا مەلایێ گوندی ژی جارەکێ گۆتە وێ “ھەرییە و ھەم ژی ھەرییا سۆرە” گوندییان ژ بەر کورێ وێ یێ کێم ئەندام و بێکەس بوونا وێ چ گۆتن نەدگۆتنە وێ. لێ عەزۆیێ وە دزانی کو قەی ھەر کەس ژ وێ دترسیت.
عەزیمایێ قیرەویر دکر، بانگ دکر، خەبەر دگۆتنە خەلکی و دکەتە کۆلانا. ژ کولکێن مریشکا ھێک ددزین و تشتێن کو ل بەر هەتاڤێ ھاتبوون راخستن ژ بۆ ھشک کرنێ، ددزین. لێ بەری کو تو تشتەکێ بێژییە عەزۆیێ، ئەو دکەتە کۆلانا و ئێریشی جیرانان دکر، دگۆت یەکی ھێکێن من دزینە. سەرەرای کو ژ ھەر کەسی کێمتر کار دکر ژی، دەخل و دانێ وێ یێ زڤستانێ ژ یێ ھەموو گوندییان زێدەتر بوو.
د ناڤ گوندی دا گۆتن دگێراند، شەر دەردخست، گۆتەگۆت بەلاڤ دکرن. تشتێ کو ھوون ژ عەزۆ فەھم بکەن ئەوە کو گەلەک تشتێن نەباش و سالوخەتێن خراب عەزۆیێ ھەبوون.
لێ ئالیێ وێ یێ ھەری بەرچاڤ ئەو بوو دەما کو ئەو دکەت جڤاتەکێ دا د سەرێ دیوانێ، د کونجیکی دا جیھ ژ بۆ خوە چێدکر. ھێدی ھێدی دکەتە ھوندورێ ژوورێ، پاشێ نێزیکی کەسێن ل کونجکی روونشتی دبوو و وەکە کو تشتەکی بپرسیت خوە خوار دکر، پاشێ چۆکەکا خوە ددانا عەردی و ھێدی ھێدی جیھ ژ بۆ خوە ڤەدکر. جەبلخانەیا وێ یا بنگەھین ژی قوونمەزنیا وێ بوو. ئەوێ ب قوونا خوە ئەو ژنێن روونشتی چەپ و راست پالددان. ئێدی مرۆڤا ژ نەچاری خوە ڤەدکشاند. دەما کو عەزۆیێ ھەموو قوونا خوە ل سەر دۆشەکێ ددانا و پشتا خوە ددا بالیفکێ، نەفەسەک کوور هەلدکێشا و ب ھەوایا فەرماندارەکێ سەرکەفتی ب پۆزبلندی بەرێ خوە ددا مرۆڤان. ئەز قەت ژ بیر ناکەم، وێ جارەکێ ل مالا تازییێ ژی ھەمان تشت کر. وەکە کو سەرساخیێ ل مالباتا خوەدێ ژێ رازی بکەت خوە نێزیکی خوەدیێ تازیێ کر، پشترا ژی ب ھەمان تاکتیکێ ئەو ژنێن ل سەر دۆشەکێ روونشتی، ھەموو ل سەر دۆشەکێ هاڤێتن.
دەما ئەز ل رێ و رێبازا پەکەکێ یا ژ بۆ خوە جیھ ڤەکرنێ دنێرم شێوازێن عەزۆیا قوون مەزن دهێتە بیرا من. پەکەکە ل بەر دەرییێ سێمالکا مرۆڤان دجڤینیت و دبێژیت ئەم تەرمێن گەریلایێن کو ل خالیفانێ هاتنە کوشتن دخوازین. لێ ئەو گەریلا ژ ئالیێ بالافرێن شەری یێن ترکیێ ڤە ھاتبوون کوشتن و دڤێت جەنازەیان ژ دەولەتا ترک بخوازن. ئەم وێ ژی دەرباز بکەین پەکەکە دێ ب کیژان روویی داخوازا جەنازەیان کەت؟ بەرۆڤاژی دڤێت حکوومەتا ھەرێما کوردستانێ داخوازا رادەستکرنا کوژەرێن غازی سالح ئالیخان بکەت. پێدڤییە ژ پلانگێرێن جینایەتا غازی سالح ئالیخان ئانکو فەرماندارێ بریارگەھا ھەپەگێ، بەرپرسێ ھەرێمێ پلنگ سوروچ و کوژەرێن کو ئەڤ تاوانە ئەنجام دای ئانکو جەسوور رۆبۆسکی و پلنگ سووروچ تەسلیمی دادگەھا ھەرێما کوردستانێ بھێنە کرن. پیدڤی بوو وێنەیێن بکوژێن غازی سالح ئالیخان ل سەر رێیا ھەموو چیایێن مەتینا بھاتبانە دالقاندن و بھاتبا گۆتن “ئەم ل ڤان بکوژان دگەرین” ژ بەر کو ھوون ڤێ نەکەن، دێ پەکەکە ژی مینا عەزۆکا گوندێ مە پیستر و ھەریتر ببیت. ئەو دێ ب وە ڤە زەلقیت و ھوون نکارن خوە ژ ڤێ ھەرییێ خلاس بکەن.
گەر ھوون ھەر رۆژ ل ناڤ چاڤێن پەکەکێ نەقیرن و نەبێژن بۆچی ھوون ھەڤکارێن حەشدا شەعبی نە، بۆچی ھوون جل و بەرگێن چەکدارێن حەشدا شەعبی ل خوە دکەن… و ھتد دێ پەکەکە چەتەیێن خوەیێن ب ناڤێ جوانێن شۆرەشگەر راھێلیتە وە. پاشێ ژی ب جل و بەرگێن حەشدا شەعبی مینا عەزۆکا قوون مەزن دێ جیھی ژ بۆ خوە فرەهکەت و دێ ھەول دەت کو خوەدییێ مالێ ژ مالێ دەر بکەت.
ھەلبەت من ژ بۆ وە بەحسا داویا عەزۆیا ھەری نەکر. رۆژەکێ عەزیمایێ خەبەر گۆتنە ژنەکێ کو د بەر گوندی را دەرباس دبوو، ژنکێ ژی ئێدی تەحەمل نەکر و نەکاری خوە بگریت و خەبەر ل عەزۆیێ ڤەگەراند. پەڤچوون دەرکەت و گاڤ ب گاڤ مەزن بوو. ئەز ھێ 12 سالی بووم و مە ل مزگەفتێ نڤێژ دکر. دەما نڤێژ ب دوماهی هاتی، جماعەت ھەموو چوون جھێ پەڤچوونێ. عەزۆیێ تژی کوشا خوە کەڤر کربوون و ب لەزوبەز دهاڤێژتنە وێ ژنکێ و بێ ناڤبەر خەبەر دگۆتنێ. دووڤرا کەڤرەک ھات و ب سەرێ مەلایێ گوندی کەت و سەرێ وی شکەست. ئێدی گوندی ژی نەکارین ھێرسا خوە بگرن و کەتنە سەر کەلەخێ عەزۆیێ و حەتا کو ئەو بێ روح کری ل وێ دان. پشتی دەمەکێ عەزۆ ل مەیدانکا گوندی مر و مەلایێ سەرشکەستی ژی شاشکا خوە یا بخوین هاڤێتە سەر تەرمێ عەزۆیێ. بێ کو حەلالی ژ گوندیان بهێتە خواستن عەزۆ هاتە بنئاخکرن. ئەز وە تەخمین دکەم کو داوییا پەکەکێ ژی دێ وەک یا عەزۆکا گوندێ مە بیت.
ئەنجامێن ژ ڤێ چیرۆکێ ب دەست مە دکەڤن 1: ھەر چەند ھوون تێرا خوە ژێھاتی بن و ھوون ب قوونا خوە ژ بۆ خوە جیھی چێکەن ژی، گاڤا سەبرا مرۆڤان پەقی ھوون نکارن خوە بەر پێلا وێ بگرن و ھوون دێ ب داوی هێن.
ئەنجامێن ژ ڤێ چیرۆکێ ب دەست مە دکەڤن 2: ھوون چقاس ب روومەت و ھشمەند ژی بن، پێویستە کو ھوون رێگریێ ل وان کەسێن کو خوەدان رێبازێن قرێژ و گەمارن بگرن و دەرسەکا باش بدنە وان.
