ئیرانێ گرتیێ سیاسی یێ کورد «حه‌یده‌ر قوربانی» سێداره دا
گرتیێ سیاسییێ کورد «حه‌یده‌ر قوربانی» کو ب تۆمەتا پەیوەندییا ب په‌ده‌كا – ئیرانێ هاتبوو گرتن، ئیرۆ ل زیندانا سنه‌یێ هات سێداره دان.
گرتیێ سیاسییێ کورد «حه‌یده‌ر قوربانی»، ئیرۆ یەکشەمبێ د دەمژمێرێن سپێدێ دا، ل زیندانا ل باژارێ سنە یێ رۆژهلاتا کوردستانێ، هات سێداره دان، ئه‌و ب تۆمەتا پەیوەندییا ب پارتیا دەمۆکراتا کوردستانا ئیرانێ هاتبوو ده‌سته‌سه‌ر كرن، دادگه‌ها ره‌ژیما ئیرانێ ژی، جەزایێ سێداره‌دانێ بۆ ده‌رێخستبوو.
«حه‌یده‌ر قوربانی» تەمەن 47 سالی بوو، خەلکێ کامیارانا رۆژهلاتێ کوردستانێ یە، ل سالا 2016ان ب تۆمەتا هەڤکارییا په‌ده‌كا ئیرانێ، هاتبوو گرتن.
محەمەد سالح نکبەخت کو پارێزەرێ حه‌یده‌ر قوربانی بوو، نووچەیا سێداره‌دانا «قوربانی» پشتراست کر و ژ رووداوێ را ئەشکەرە کر، «سەرۆکێ دەستهلاتا دادوەری یا ئیرانێ، بریار دابوو پێداچوون ب جەزایێ حه‌یده‌ر قوربانی دا بهێته کرن».
د سه‌ر بریارا دادگەهێ دا هاته سێداره دان
محەمەد سالح نکبەخت، دوهـی ئێڤارێ ل گەل حه‌یده‌ر قوربانی ئاخڤی بوو و گۆت: «من بریارا سەرۆکێ دادگەها دەستهلاتا دادوەری یا ئیرانێ گهاند وی، ئه‌و گەلەک کێفخوەش بوو».
پارێزەرێ «حه‌یده‌ر قوربانی»، ئاماژە ب وێ ژی کر، سەرۆکێ دەستهلاتا دادوەری داخواز کربوو بریارا پێداچوونا ب جەزا و دۆسیەیا وی دا ب «قوربانی و مالباتا وی» بێ گهاندن، لێ تەنێ 8 دەمژمێران پشتی ڤێ بریارێ، حه‌یده‌ر قوربانی هات سێداره‌دان.
رێخستنا لێبۆرینا ناڤدەولەتی ئامنەستی، بەری نها داخواز ژ بەرپرسێن ئیرانێ کربوون کو جەزایێ دارڤەکرنا گرتیێ سیاسی یێ کورد «حه‌یده‌ر قوربانی» بهێته هلوەشاندن.
