رایەدارێن پەکەکێ یێن خوەدی نەخوەشیێن گران ل بەندا ڤەکرنا دەریێ سینۆری یێ سێمالکا نە!

رایەدارێن پەکەکێ یێن خوەدی نەخوەشیێن گران ل بەندا ڤەکرنا دەریێ سینۆری یێ سێمالکا نە!

مەمەت مێردینی

یەک ژ رایەدارێن پەیەدێ-پەکەکێ یێ ل دەریێ سینۆری یێ سێمالکا کو نە ئەز ناڤێ وی دزانم و نەژی دخوازم بزانم، ژبەرکو چ تشتەک ب دەستێ وی نینە ژ ئاخافتنێ زێدەتر، نە دکارە بریارەکێ بدە، نە دکارە رێگریێ ل ئێریشا چەتەیێن جوانێن پەکەکێ بکە، نە ژی تشتەکێ بێژیت وان، د دەربارێ گرتنا دەریێ سینۆری یێ سێمالکا ژ ئالیێ حکوومەتا هەرێما کوردستانێ ڤە داخویانیەک دا.

د داخویانیا ڤی رایەدارێ پەکەکێ دا، ژ بەر شەپرزەییا وی رەوشا نها یا پەکەکێ ژی خوەیا بوو، ژبەرکو هەر تەڤرەک ل ئالیەکێ ددا، وی گۆت، “دەما ل رۆژا چارشەمبیێ جوانان مەشەک ژ بۆی بەر دەریێ سێمالکا لدارخستی، دەما گهشتی نیڤا پرێ ژ ئالیێ دن هێزێن ئەولەکاریا باشوور، یێن پەدەکێ، کەڤر ئاڤێتن و جوانن بریندار کرن، ئەڤ ژی بوو سەدەم کو جوان ژی کەڤران باڤێژن!”، ئەی هاوااار تو ل داخویانیێ بنێرە، تەڤ مەشا (جوانێن شۆرەش-کەر) ب ڤیدیۆ هاتیە تۆمارکرن و د مەدیایا پەکەکێ ب خوە دا ژی هاتیە پارڤەکرن، یێن ئێریش کری جوانێن پەکەکێ بوون نە هێزێن ئەولەکاریا باشوور، لێ ئەڤ نەجوامێر هاتیە و ل رۆژا رووهن و ل جیهێ بوویەرێ دەرەوان دکە! بسەکنە یاو ب بێژینکێ بەرێ رۆژێ نایێ گرتن، تو ب دەرەوان نکاری دیمەنێن ڤیدیۆیی ئینکار بکی. گەر ووسا بە وەکە تو دبێژی، گەلۆ ژ کەرەما نەیی یا جەمیل بایک رە ژ مە رە ببێژە، کیر، دار، کەڤر و مۆلۆتۆفان د دەستێ جوانێن پەکەکێ دا چ دکر؟!

وی گۆت، “ئەم دخوازن ئەڤ چالاکیا “دەمۆکراسی” یا جوانان نەبە بەهانەیەک ژ بۆی گرتنا دەریێ سینۆری، ژبەرکو پرانیا کەسێن نها ژ “باکور رۆژهلاتێ سووریێ” دچن باشوور ئەو کەسن کو ئێشێن گران هەنە و ژ بۆی تەداویێ دچن!” نزانم پەکەکەیی چەوا دەمۆکراسیەتێ فێم دکن، گەلۆ ل کۆ دەرێ ڤێ دنێ “چالاکیەک دەمۆکراسی” ب کەڤر، کێر، دار و مۆلۆتۆفان تێ کرن، یا “جوانێن شۆرەش-کەر” ئەنجامدایی نە ب تەنێ چالاکیەک دەمۆکراسی نەبوو، بەلکو چالاکیەک پڕ نە دەمۆکراسی و بێ ئەخلاقی بوو.

وان ب فەرمانا ئەلخماهۆیێ قەندیلێ ئەڤ کار ئەنجام دا و ئێریشی دەریێ سینۆری کر. گەلۆ چەوا دبە بێی دەستوورا حکوومەتێ بێی پرس و بێی چ تشتەک کەسەک بخوازیت دەرباسی ولاتەک دن ببیت؟! قەی دەمۆکراسی ئەڤە؟! دەمۆکراسی ئەڤە سێ رۆژان پێش ئیریشێ د سەماعەیان دا بقێری و ببێژی ئەم دێ چین “جەنگا روومەتێ”؟! کی باسی دەمۆکراسی و روومەتێ بکەت دڤێت هوون پەکەکەیی بێ دەنگ و لال ببن، گەلۆ گەر هوون ب قاسی ترکەک فاشیزم ژی ژ دەمۆکراسیێ فێم دکن، چما ئەوقاس ئینسانێ بێ گونەهـ نها د زندانێن وە دا نە؟! چما ئەوقاس ئالیگرێن پارتیێن دن تێن گرتن، نڤیسگەهێن وان تێن شەوتاندن و بێ روومەتی د دەرحەق کادرۆیێن وان تێ کرن؟! گەلۆ د کیژان جڤاکا دەمۆکراسی دە چێبوویە کەسەک ب تەنێ ژ بەر راکرنا ئالایێ وەلاتێ خوە ب دەستێ “برایێ خوە” د ناڤا خوینا خوە دا بگەڤزە؟! د کیژان جڤاکا دەمۆکراتیک دا ب تەنێ ژ بەر پیرۆز راگرتنا رۆژا ئالایێ وی ولاتی نڤیسینگەهێن پارتیەکێ تێن شەوتاندن؟ د کیژان ولاتێ دەمۆکراسی دا کەچ و کورێن د بن هەژدەسالیێ دا تێن رەڤاندن و ب زۆرێ تێن چەکدارکرن؟! نا هوون بێ دەنگ بمینن ژ وە رە باشترە، ژ بەرکو هەر کەس روویێ وە یێ راستەقینە ناس دکە، هەر کەس دزانە دەمۆکراسی ب ئالیەکێ دا دچە و هوون ب ئالیەک دن دا دچن.

ئەز ب تەنێ د یەک ئاخافتن دا لگەل ڤی بەرپرسێ “باکور رۆژهلاتێ سووریێ” دا مە، ژ بەرکو ب ئاخافتنا وی ب خوە پرانیا کەسێن ل ئالیێ دن دەرباسی باشوورێ کوردستانێ دبن کەسێن خوەدی نەخوەشیێن گرانن، دڤێ دەری وەرە ڤەکرن، لێ ل گۆری ڤێ ئاخافتنا وی بە دڤێت یەکەم جار دەری ل سەر تەڤ رایەدارێن “باکور رۆژهلاتێ سووریێ” بهێت ڤەکرن، ژ بەرکو هیچ یەک ژ خەلکێ رۆژئاڤا وەکە رایەدارێن پەیەدێ-پەکەکێ ب نەخوەشیێن گران نەکەتنە، هەلبەت دڤێت دەری ژ بۆی وان بێ ڤەکرن و هەموو ل نەخوەشخانەیێن دەروونی بێن داخلکرن.

 پەکەکەیی بوون گرانترین نەخوەشیە کو کوردەک تووش ببە، دەما تو ب نەخوەشییا پەکەکەیی بوونێ دکەڤی، ئێدی مەژیکێ تە ژ کار دکەڤە، تو نکاری ب وی مەژیکی بریاران بدی، ئێدی دێ کەسەک یان هنەک کەسێن دن ل شوونا تە بفکرن و بریاران بدن، ئێدی تو وێ وەکە تووتیان بپەیڤی، تشتا د شکەفتێن قەندیلێ ڤە تێ نڤیسین، تویێ بخوینی و ڤەبێژی، بریارا ل ور هات دایین، تویێ بێ تێفکرین وەکە کەسەکێ بێ مەژیک جێبەجێ بکی…هتد. بەلێ ب راستی ژی دڤێت دەری ل سەر رایەدارێن “باکور رۆژهلاتێ سووریێ” بهێت ڤەکرن و تەڤ بێن تەداویکرن، پەکەکە وەکە شیرپەنجەیێ د مەژیکێ وان دا بەلاڤ بوویە.

گازندا هەری مەزن یا ڤی رایەدارێ پەکەکێ ئەڤە بوو کو کەسێ دخوازیت بچیت باشوور، دڤێت فۆرمەکێ داگریت کو ئەڤ فۆرمە ژ 25 پرسیاران پێک دهێت، وی گۆت، “ئەم ناڤێن 100 کەسان دشینین لێ ب تەنێ رێ ب 40 کەسان تێ دایین”، گەلۆ قەی هوون نزانن چما ئەڤ یەک تێ کرن؟! گەر هوون نزانن ئەزێ ژ وە رە ببێژم، ژ بەرکو ژ سەدی 60 یا کەسێن دخوازن بچن باشوور کادرۆیێن پەکەکێ نە کو دخوازن هەرن و ل باشوور کارێن نە قانوونی بکن، ژ سەدی 40 یا دن کەسێن هەژار و بێ تاوانن کو ژ بۆی سەرەدان و تەداویکرنا نەخوەشیێن خوە دچن باشوور.

ئەڤ رایەدارێ پەیەدێ دبێژە، “ئەم نابێژن کو ئەم ڤێ یەکا ها شەرمەزار دکن، ژبەرکو چێنابە کورد کوردا شەرمەزار بکن، ئەم ب تەنێ دبێژن جیهێ رەخنێ یە، جهێ مخابنیێ یە کو پارچەیەکا کوردستانێ دەریێ خوە ل سەر پارچەیەک دن، ل بەرامبەر برایێ خوە بگرە، دڤێت رێ نەدین کێفا دژمێن گەلێ کورد وەرێ”، ئەز ژی دبێژم، گەر نابە کورد کوردان شەرمەزار بکن چما هەر رۆژ یەک ژ رایەدارێن قەندیلێ دەردکەڤە سەر مەدیایێ و نە جارەکێ ب هەزاران جاران حکوومەتا هەرێما کوردستانێ کو ب خوینا گەل هاتیە ئاڤاکرن ژ بۆی کارێن نەکری شەرمەزار دکن؟ گەلۆ ب قاسی کو رایەدارێن پەکەکێ د داخویانیێن خوە دا ئێریشی کوردان کری و کورد شەرمزار کری ئەوقاس ترک، عەرەب یان فارسەک شەرمەزار کریە؟! بەلێ، ئەز ژی دبێژم دڤێت رێ نەیێ دایین کەیفا دژمنا ب مە بهێت، ژ کەرەما خوە داکو کەیفا دژمنا ب مە نەیێ هەرن و ئەڤ شانۆیا ب ناڤێ داییکێن شەهیدان ب داوی بینن، هیچ کەسەک نەزانە تو باش دزانی ئەو گەریلا ب دەستێ پێشمەرگە شەهید نەکەتنە، بالەفرێن ترکیێ ل وان خستیە، لێ داکو کەیفا دژمنا ب مە بهێت رایەدارێن تە ب دەرەوێن خوە دایکێن رۆژئاڤا ووسا تێگهاندنە کو “پەدەکێ” زارۆیێن وان کوشتنە! رایەدارێ تە دخوازن روویێن خوە یێن رەش و داگرکەرێن کوردستانێ ب حکوومەتا هەرێما کوردستانێ و “پەدەکێ” سپی بکن. ژ کەرەما خوە ڤێ یەکێ ژ رایەدارێن خوە رە ببێژە، ژ بەر کو ت کەسەکی ب قاسی رایەدارێن تە کەیفا دوژمنا ب کوردان نەئانیە.

وی گۆ، “ئەڤ کارە نە د بەرژەوەندیا گەلێ کورد دانە، تەنێ دکەڤە د بەرژەوەندیا دژمنێ گەلێ کورد دا”، نا گرتنا دەریێ سینۆری ناکەڤە د بەرژەوەندیا دژمنێ گەلێ کورد دا، یا کو دکەڤە د بەرژەوەندیا دژمنێ گەلێ کورد دا، ئەڤە کو تو برایێ خوە ب تشتەکێ تاوانبار بکی کو دوژمنێ تە کربە، تو ب دار، کەڤر، کێر و مۆلۆتۆفان ئێریشی دەریێ سینۆری یێ باشوور بکی و نکاری ل دەریێ سینۆری یێ دکەڤە سەر سینۆرێ دژمنێ گەلێ کورد دەنگێ خوە دەرخی، یاکو دکەڤە د بەرژەوەندیا دژمنێ گەلێ کورد دا ئەڤە کو تو ب زهنیەتا وان ل دژی برایێن خوە یێن باشوور تەڤ بگەری، دایکێن شەهیدان ل شوونا ل سەر سینۆرێ باکورێ کوردستانێ ل دژی ترکیێ چالاکیان پێ بدی ئەنجامدایین بینی و ل سەر سینۆرێ باشوور دەرەوان ژ وان رە بکی و ژ وان رە ببێژی کورێن وە ب دەستێ پەدەکێ هاتنە کوشتن، د دەمەکێ دا کو بالەفرێن ترکیێ ئەو کوشتنە. یا کو دکەڤە بەرژەوەندیا دژمنێ کوردان دا ئەڤە کو ناڤێ کوردستانێ ژ پارچەیەک کوردستانێ ڤەکی و ناڤەک بێ واتە، وەکە “باکور رۆژهلاتێ سووریێ” ل سەر دانی، بەلێ ئەڤ کارانە دبن سەدەم کو کێفا دژمنێن گەلێ کورد ب کوردان بهێت، ژ کەرەما خوە ڤان کارانە راوەستینن و کەیفا دژمن ب مە نەیینن.

گەر تو وەک شەخس نیەت پاک بی و ناخوازی کەیفا دژمنێ مە ب مە وەرە، ژ بۆی نیەت پاکییا خوە، ب تەنێ ڤێ یەکێ بکە، “مافێ کارکرنێ ژ وی پەیامنێرێ سازیا مەدیایی یا پەکەکێ یا ب ناڤێ ANFێ بستینە، کو د ئامادەبوونا تە دا برایێن تە یێن باشوور ب “بێ ناموس” ب ناڤ کری و ژ تە پرسی “ئەڤ بێ نامووسانە چ دخوازن”. توویێ ژێرە ببێژی، بێ نامووس ئەوە یێ کو دەرەوان ژ دایکێن رۆژئاڤا رە دکە، بێ نامووس ئەوە یێ کو بەرێ چەکا خوە دایی سینگا پێشمەرگە، بێ نامووس ئەوە یێ کو کەتیە د خزمەتا دەولەتێن دژمن دە و بوویە پرەک ژ بۆی دەرباس بوونا وان بۆ کوردستانێ، بێ نامووسێ هەری مەزن ئەوە یێ کو ل دژی دەولەت بوونا کوردان بسەکنە و ب دەرەوا براتیا گەلان سینۆرێن دەولەتێن داگیرکار بپارێزە و ئاستەنگان ژ بۆی تاکە پارچەیا کوردستانا ئازاد کو باشوورێ کوردستانێ یە چێبکە. بەلێ بێ نامووس ئاها ئەڤە.

ل داویێ ئەز ژ ڤی رایەدارێ بێ ناڤ و نیشانێ پەیەدێ-پەکەکێ رە کو چ بریارەک ب دەستێ وی نینە و نکارە چ تشتەکێ بکەت رە دبێژم، ت برایەکی کوردێن باشوور ل “باکور رۆژهلاتێ سووریێ” تونەیە، برایێن کوردێن باشوور هەموو ل رۆژئاڤایێ کوردستانێ نە.