مەمەت مێردینی
ل ئێڤاریا 15ێ ڤێ مەهێ، پەکەکێ ل سەر ناڤێ “جوانێن شۆرەشگەر” کو رێخستنەکا جوانان یا گرێدایی پەکەکێ یە و راستەراست بریارێن خوە ژ قەندیلێ وەردگریت، ئێریشی دەریێ سینۆری یێ سێمالکا کر. جوانێن پەکەکێ ب دار، کەڤر، کێر و مۆلۆتۆفان ئێریش برە سەر هێزێن ئەولەهیا باشوور یێن کو دەریێ سینۆری یێ سێمالکا دپارێزن، د ڤێ ئێریشا جوانێن پەکەکێ دا هەری کێم 5 پێشمەرگە بریندار بوون، پشترا پەکەکێ د مەدیایا خوە دا دەست ب دەرەوان کر و راگهاند، “هێزێن پەدەکێ ئیریشی جوانان کریە”! لێ دیمەنێن ڤیدیۆیی یێن کو پەکەکێ ب خوە د مەدیایا خوە دا پارڤە کری تێرا ڤێ یەکێ دکر کو ئەڤ درەوا وان ئاشکەرا ببیت.
پشتی ئێریشا جوانێن پەکەکێ کو 98 ژ سەدێ جوانێن عەرەب بوون و دخواست ب زۆرێ دەرباسی باشوور ببن و ئەجیندایێن قرێژ یێن پەکەکێ جێبەجێ بکن، حکوومەتا هەرێما کوردستانێ بریار دا دەری بهێت گرتن، ب گرتنا دەریێ سینۆری گەلێ رۆژئاڤا رووبرویێ هندەک پرسگرێکێن وەکە کێم بوونا پێدڤیێن خوارنێ و ڤەخوارنێ د بازاری دا بوون، کەسێن کو نەخوەشیێن گەران هەیی و دخواست ژ بۆ چارەسەرکرنا نەخوەشییا خوە دەرباسی باشوور ببن ب گرتنا دەریێ سێمالکا نەکارین دەرباس ببن، هندەک کەسێن د ناڤا رێخستنێن مرۆڤی یێن ناڤنەتەوی دا د ناڤبەرا رۆژئاڤا و باشوور دا هاتن و چوونێ دکەن ژی ژ بۆ دەرباسبوونا باشوور نەکارین ژ رۆژئاڤا ڤەگەرن باشوور، گەلێ رۆژئاڤا یێن کو ژ بۆ بازرگانیێ دەرباسی باشوور بووی، یێن دخواست ژ بۆ سەرەدانا خزمێن خوە بچن باشوور، رۆژئاڤایی یێن ژ باشوور دخواست ڤەگەرن رۆژئاڤا…هتد تەڤ راستی پرسگرێکان هاتن. ئەڤ یەک ژی بۆ سەدەم کو گەلێ رۆژئاڤا پەکەکێ ب توندی رەخنە و شەرمەزار بکن.
دبیت ئەڤە یەکەم جار بیت گەلێ رۆژئاڤا ب ڤی ئاوا پەکەکێ رەخنە بکە، ل سەرانسەری رۆژئاڤا دەنگێ نەرازیبوونا ل همبەر ڤی کارێ پەکەکێ بلند بوو، هندەک ژ کادرۆیێن پەکەکێ ژی ئەڤ ئێریش نەراستەراست رەخنەکر، ژ بەرکو وان باش فێم کر ب ئێریشا ل سەر دەریێ سینۆری و گرتنا دەری دێ رەوشا ژیانا گەلێ رۆژئاڤا تێک چیت، ب تایبەتی ژ ئالیێ دابینکرنا کەرەستەیێن خوارن و ڤەخوارنێ کو 70 ژ سەدێ یا وان کەرەستەیان ژ باشوور دەرباسی رۆژئاڤا دبن.
ل همبەر ڤێ یەکێ پەکەکێ ل رۆژئاڤا چ کر؟
پشتی گرتنا دەریێ سینۆری یێ سێمالکا و زێدەبوونا گڤاشێن سەر پەکەکێ و رەخنەکرنا وێ ل سەر ئێریشا جوانێن شۆرەشگەر، پەکەکێ ل رۆژئاڤا دەست ب پارڤەکرنا دەراوان کر، پەکەکێ د سۆسیال مەدیایا رۆژئاڤا کوردستانێ دا دەست ب بەلاڤکرنا درەوان کر، وێ رگهاند کو گرتنا دەریێ سینۆری ل سەر بریارا ترکیێ بوویە! ب ڤێ درەوێ ب تەنێ ژی نەسەکنی، پەکەکێ ب رێیا جوانێن خوە د سۆسیال مەدیایێ دا راگهاند کو سازییا ئیستیخبارتی یا باشوورێ کوردستانێ یا ب ناڤێ “پاراستن” ب هەڤکاری لگەل میتێ دا، گرۆپەک ژ جوانان ب ناڤێ “شعلە-النیران” پیک ئانیە و ئەڤ گرۆپە دخوازیت ئێریشی سەر بارەگەهێن ئەنەکسێ ل رۆژئاڤا بکەت، بارەگەهێن وێ بشەوتینیت و ل سەر دیواران سلۆگانێن پەکەکێ بنڤیسینیت، داکو ووسا بهێتە فێم کرن جوانێن شۆرەشگەرئەڤ کارە ئەنجام دایە. ب پارڤەکرنا ڤان درەوان پەکەکێ نیازا خوە ئاشکەرا کر.
ووسا دیارە پەکەکە دێ د ڤان رۆژان دا ب رێیا جوانێن خوە یێن ب ناڤێ “جوانێن شۆرەشگەر” ئێریشی نڤیسینگەهێن ئەنەکەسێ و پارتیێن نە نێزیکی پەکەکێ کەت و وان بشەوتینیت، پشترا دێ ڤان ئێریشان دەتە پال ڤێ گرۆپا کو پەکەکێ د خەیالا خوە دا چێکری، نە دوورە پەکەکە ژ بۆی ئیسبات کرنا ڤێ درەوا خوە پشتی چەند رۆژەکێن دی هندەک ژ ئەندامێن جوانێن شۆرەشگر بگریت و بینیت سەر ئەکرانێن تەلەفزیۆنان و ب وان بدەتە گۆتن کو وان ب فەرمانا پاراستنێ و پەدەکێ ئێریشی نڤیسینگەهێن ئەنەکەسێ کریە و ئەو شەوتاندینە.
پەکەکە ژ بۆی کێم کرنا گڤاشێن ل سەر خوە و جێبەجێکرنا ئەجیندایێن دەولەتێن داگیرکەر خوە ژ چ تشتەکێ دوور ناگریت، تەڤ بێ ئەخلاقیەکێ دێ ئەنجام دەت ب تەنێ داکو بەرژەوەندیێن خوە بپارێزیت، ژ بۆی پەکەکێ نە گرینگە دێ چ قاس زرار ب گەلێ کورد بکەڤیت، نە گرینگە دێ دەریێ سینۆری مەهەک دی یان ژی سالەک دی هێت ڤەکرن یان نە، یا راست پەکەکە قەت ناخوازیت دەری بهێتە ڤەکرن داکو ب ڤێ یەکێ گەلێ رۆژئاڤا ل دژی حکوومەتا باشوور هان بدەت و وان بکەتە دوژمنێ باشوور، ئەڤ ژ ئالیەکێ، ژ ئالیەکێ دی پەکەکە ب ڤێ یەکێ دخوازیت بەرێ گەلێ رۆژئاڤا بدەتە رەژیما سووریێ و ئەڤ یەک دێ بەهانەیەک باش بیت ژ بۆ جێبەجێکرنا ڤێ ئارمانجێ.
درەوێن ب شاخ!
پەکەکە ب ڤان درەوان ب تەنێ نەسەکنی بەلکو هندەک درەوێن دی پارڤە کرن کو کەنیا مرۆڤی پێ دهێت، یێن ڤان درەوێن پەکەکێ د سۆسیال مەدیایێ دا پارڤە دکەن هەموو ئالیگرێن وێ نە، ئەڤە ژی دیار دکەت هەتا چ ئاست پەکەکێ ئالیگرێن خوە خاپاندینە کو باوەر ب ڤان دروێن ب شاخ بکەن، ژ ئالیگرێن پەکەکێ دەرباس ببیت باوەر ناکەم چ کەسەکێ دی ڤان درەوان باوەر بکەت. کەسەکێ مەژیکێ وی هەبیت دێ چەوا باوەر ژ ڤێ دەرەوا پەکەکێ کەت دەما دبێژە، “یەک ژ شێنیێن رۆژئاڤا کوردستانێ کو دخواست ژ باشوور ڤەگەرە رۆژئاڤا ژ ئالیێ پێشمەرگەیێن رۆژ هات ئارمانجکرن و ب گرانی بریندار بوو”! پەکەکێ نە ناڤ نە وێنە نە ژی هیچ زانیاریەکا دی ل سەر ڤی کەسی پارڤە نەکر، گەلۆ کەسێن ئەڤ درەوە پارڤە کری قەی گەر مەژیکێ وان هەبە دێ بکارن دەرەوەک ئەوقاس مەزن پارڤە بکن؟ نا، ب راستی ژی یێ پێچەکی مەژیکێ وی هەبە نکارە ڤێ دەرەوێ باهوەر بکە.
دەڤ ژ ڤێ یەکێ بەردە کو پێشمەرگەیێن رۆژ ل دەریێ سینۆری یێ سێمالکا تونەنە و گەر هەبن ژی چ جاران کارەک ب ڤی ئاوا ناکن، ل باشوور ب سەدان سازیێن مەدیایی هەنە کو گەر بوویەرەک ب ڤی ئاوا بقەومیت دێ ب سەدان نووچەیان ل سەر بنڤیسینن و قیامەتێ ل سەر سەرێ حکوومەتا باشوور راکن، ئالیگرێن پەکەکێ ووسا دفکرن باشوور ژی مینا رۆژئاڤایا د بن دەستهلاتا پەکەکێ دا یە کو ت مەدیایەکە ئازاد نەکارە تێدا کار بکە. هەر کەس دزانە ئەڤ نووچەیا ل سەر میزە هاتیە چێکرن ب تەنێ ژ بۆی کرێت کرنا پێشمەرگەیێن رۆژ هاتیە چێکرن، و چ راستی ژ بۆی ڤێ نووچەیێ نینە.
یەک دی ژ وان درەوێن کو پەکەکە پشتی گرتنا دەریێ سینۆری یێ سێمالکا بەردەوام د ناڤا ئالیگرێن خوە دا پارڤە دکەت ئەڤەیە کو دبێژیت، “گرتنا دەریێ سینۆری یێ سێمالکا ب بریارا ترکیێ بوویە، ژ بۆی لیدانا مەحبووبیەتا رێڤەبەریا خوەسەر!”، لێ ژ بلی ئالیگرێن پەکەکێ یێن کو مەژیکێ وان ژ ئالیێ پەکەکێ ڤە هاتیە شووشتن چ کەسەک دی باوەر ژ ڤان درەوان ناکە، هەر کەسێ مەژیکێ وی هەبیت باش فێم دکەت کو گرتنا دەریێ سینۆری یێ سێمالکا ب سەدەما کارێن ئیستیفزازی یێن پەکەکێ و ئێریشا جوانێن شۆرەشگەر یێن سەر ب پەکەکێ ڤە بوویە، ژ دەرڤەی ڤێ یەکێ هەر نرخاندنەکا دی ژ بۆی گرتنا دەریێ سێمالکا بهێتە کرن ژ بلی درەوک دیار یا پەکەکێ هیچ تشتەک دی نینە.
