لەهیێن هەولێرێ و بێ ویژدانیا مەدیایا پەکەکێ

لەهیێن هەولێرێ و بی ویژدانیا مەدیایا پەکەکێ

سمکۆ عەبدولعەزیز

رۆژانە ئەز مەدیایا پەکەکێ ب تایبەتی ANFێ دشۆپینم، نە ژ بۆ کو بزانم د کوردستان و جیهانێ دا چ دقەومیت، بەلکو ژ بۆی کو بزانبم د رۆژەکێ دا چەند درەو، خەبەر، و ئاخافتنێن نە لایەق د دەرحەق کوردستانێ و کەس و ئالیێن ولاتپەروەر دا نڤیساندینە. ئیرۆ ژی نووچەیەک ب تایتلێ (ده‌سته‌ خوشكا پاریسێ جارەکا دی بن ئاڤ بوو) کو کەسەکێ ب ناڤێ (ژ. ت) ژ بۆی ANFێ نڤیساندیە پێش چاڤێن من کەت.

دەما من ئه‌و نووجە خواندى، من ووسا هه‌ست پێكر كو نڤێسه‌ر ل سەر سەرچەمکێ داوه‌تێیە وداوه‌ته‌ك بەرەڤاژی دكهت‌، هه‌ر وه‌كە داوەتا خوشكا وى بت و تلیلێن وى و‌ شاباشێن وى بچن‌ به‌ر ئاسیمانی.

لێ پشتى من گوتار ب داوى کری، ژ بۆی من خوەیا بوو كو ئه‌و نه داوەتا خوشكا وییه‌، به‌لكو یێ داوه‌تێ دكه‌ت ژبەرکو لەهی ل هه‌ولێرا پایته‌ختا کوردستانێ چێبوویه‌ و هنده‌ك ولاتى زەرەرمەند ‌بوونه‌. ئەو ژی شاگەشە بوویە كو نووچەیەکێ ل سەر لەهیا هەولێرێ بنڤیسیت و ب ڤێ یەکێ چه‌ند قوریشان ب دەست بێخیت، رووپەلا ANFێ ژی ئەڤ نڤیسە کو هیچ بنەمایەکێ نووچەیەکێ ئەکادمی تێدا نینە، وەکە نووچەیەک بێ هەمپا دیتیە و بێی دودلى پارڤەکریە.

ئەز فێم دکەم کو جوداهیێن فکری و سیاسی د نێڤبەرا پارتیێن کوردستانێ دا هەنە، ئەز فێم دکەم کو رووپەلا ANFێ و پەکەکە ب تەڤ هیزا خوە ل دژی حکوومەتا هەرێما کوردستانێ کار دکەن و چ جاران تشتەکێ باش دەربارا حکوومەتا هەرێما کوردستانێ پارڤە ناکەن، لێ بەلێ، چ جاران من باوەر نەدکر کو کەرب و کینا پەکەکێ گهایە ئاستەکێ ووسا کو دەما لەهی ژی ل باشوور چێدبن ب ڤی ئاوا شاگەشە بن و کەیفا وان بهێت و درەوێن هندە مەزن ل دژی تاکە حکوومەتا کوردی دا پارڤە بکەن.

یا ئه‌ز دزانم، ئه‌مەریكا هەیا سەر هه‌ستى دژاتیا ئیرانێ دكهت‌، ئیران ژی ب وی ئاوا، لێ ده‌ما ل سالێن رابۆری دا لەهی ل ئه‌مەریكایێ چێبووی، یەکسەر ئیرانێ بەرهەڤیا خوە ژ بۆی ئالیکاریا مرۆڤی لگەل ئەمەریکایێ دا دیار كر، هەر وەها ده‌ما ئەردهەژ ل هندەک باژارێن ئیرانێ روودای، ئه‌مەریكا ژی بەرهەڤیا خوە ژ بۆی گهاندنا ئالیکاریێن مرۆڤی ژ بۆی گەلێ ئیرانێ راگهاند، هه‌مان كار د ناڤبه‌را ئیسرائیل و توركیێ دا ژی روودا و ب سەد میناکێن دی یێن ب ڤی ئاوا هەنە.

ناخوازم هوون بێزار ببن، ئەز دێ كورتیا نووچەیا ANFێ ل ڤێرە نڤیسم، ژ کەرەما خوە هوون ب خوە ببن دادوه‌ر كا چه‌ند بێویژدانى و گوتنێن نه‌راست د ڤێ نووچەیێ دا رێز کرینە:

  1. حكوومه‌تا هەرێما کوردستانێ، نه ‌ژ دوور و نه‌ ژ نێزیک ئالیکاریا ولاتیێن زەرەرمەند نەکریە.

  2. حکوومەتا هەرێما کوردستانێ، هه‌ولێر ب خوشكا پاریسێ ب ناڤ کریە، لێ تەڤی کو باران ب رێژەیەک زێدەتر ل پاریسێ دبارن، لەهی چێنابن، بەرەڤاژی ب بارانەکا هەری کێم هه‌ولێر بن ئاڤ دبیت.

  3. حکوومەتا هەرێمێ گۆتیە خەلکی نابیت ب چ ئاوا هوون مە رەخنە بکەن، به‌لكو پێدڤیە هوون خوەدێ رەخنە بکەن، ژبەرکو ئه‌ڤ لەهیە خوەدێ ب سه‌رێ وه‌ ئانیە، نه‌ مه‌.

هوون ب خوە ڤان خالا شیرۆڤە بكە‌ن و هوون ب خوە بریارێ بدەن گەلۆ پەکەکە چەند كه‌رب و كینێ د ناڤا کوردان دا به‌لاڤ دكەت‌، هوون ب چاڤێ خوە لێ بنێرن کو پەکەکە چەند ده‌رحه‌ق ولاتیێن باشوورێ كوردستانێ وحکوومەتا هەرێما کوردستانێ دا نڤیسین و نووچەیێن نه‌راست پارڤە دکەت.

تەنێ دبێژمە ڤی سایتی و نڤیسەرێ ڤێ نووچەیێ، هه‌ولێر نه‌ ب تەنێ خوشكا پاریسێ یە،‌ به‌لكو هه‌ولێر باژارێ هۆلاكۆ به‌زێنه‌ و پایته‌ختا هەموو كوردستانیانه‌.

پوستێن ھەمان بەش