دەریێ سینۆری یێ سێمالکا یێ ناڤبەرا ھەرێما کوردستانێ و رۆژئاڤا دا، ژ ئیرۆ پێ ڤە ژ بۆ بازرگانیێ دێ هێتە ڤەکرن. د 15ێ کانوونێ دا ژ بەر ئێریشا ئیستیفزازی یا کۆما چەتەیێن ب ناڤێ «جوانێن شۆرەشگەر» یێن سەر ب پەکەکێ ل سەر دەرگەھی کری، دەری ھاتبوو گرتن.

پەکەکێ ل دەریێ سینۆری یێ سێمالکا ب کۆمەک خەباتکارێن خوە ڤە کو ئەڤە نێزیکی 4 مەهانە کۆم کربوون و دژی حکومەتا ھەرێما کوردستانێ ئیستیفزاز و ئاژاوەگێریەک دابوو دەسپێکرن. سەدەما ڤێ ئاژاوەگێریێ ژی ئەو شانۆیا پەکەکێ یا ب ناڤێ خەلیفانێ چێکری بوو.

تەڤی کو دەولەتا ترک داخویاکرن کو ئەڤ بوویەرە وان ئەنجامدایە، لێ دیسا ژی پەکەکێ پێشمەرگە تاوانبار کرن

پەکەکێ راگھاند کو ئەو 7 گەریلایێن د ئێریشا ھەوایی یا ئارتێشا ترکا دا ل 3یێ ئیلۆنێ دا ژیانا خوە ژ دەست دایی، ژ ئالیێ پێشمەرگەیان ڤە ھاتنە کوشتن. ژ ئالیێ دن ڤە رایەدارێن ھەرێما کوردستانێ راگھاندن کو بوویەرەکا وەھا چێنەبوویە و چ پەیوەندیا وان ب ڤێ بوویەرێ ڤە نینە. تەڤی ڤێ یەکێ ژی یا کو پەکەکێ دخواست پەیوەندیێن ناڤبەرا ھەرێما کوردستانێ و رۆژاڤایێ کوردستانێ دا ئالۆز بکەت، لەوما ژی بوویەر ب پێشمەرگەیێن رۆژ ڤە گرێدا و د مەدیایا خوە دا ژی نووچەیێن درەو بەلاڤ کرن.

دەولەتا ترک راگھاند کو ڤان گەریلایان د ئێریشا ھەوایی یا 3یێ ئیلۆنێ دا ژیانا خوە ژ دەست داینە و ناسنامەیا وان ژی ئاشکەرا کر بوو.  ل سەرەرای ڤێ راستییێ ژی پەکەکێ ھەول دا بوویەرێ ڤەگوھێزیتە دژمناتیا د ناڤبەرا کوردان. کۆمەک خەباتکارێن پەکەکێ و مرۆڤێن وان ل بەر دەریێ سێمالکا ب درشووما بێرێزی ل نرخێن گەلێ کورد وەکە تەڤگەرا پێشمەرگە و مالباتا بارزانی کرن و داویێ دا ژی ب کەڤران ئێرش کرە سەر دەرییێ فەرمی یێ سێمالکا. خواستن پاسەوان و کارمەندێن دەرییێ سینۆری بێ باندۆر بکەن. تەڤی ڤێ یەکێ ژی ھەرێما کوردستانێ گوھ نەدا ڤان فتنەخوازێن ل بەر دەری ئالۆزی دەرخستی.

پێشمەرگێ کوردستانێ چەک ب کار نە ئانی

د چارچۆڤەیا بریارا رێڤەبەریا رۆژئاڤا یا پەکەکێ یا 15ێ کانوونێ دا کۆما چەتەیا ب ناڤێ «جوانێن شۆرەشگەر» ب مۆلۆتۆفان ب ھەڤکارییا جوانێن عەرەب ئێریشی دەری کر و زییان گەھاندن وەساییتێن حکوومەتا کوردستانێ. مافێ پێشمەرگەیێن پاسەوانێن ل بەر دەرگەھی ھەبوو کو گەر بخوازن ب چەکان ژی بەرگرییا خوە بکن. ل گۆر یاسایێن ناڤنەتەوەیی مافێ رەوایێ پێشمەرگەیان ھەبوو کو ئەگەر پێویستی پێ ھەبیت چەکان بکار بینن و ڤێ کۆما چەتەیان بەلاڤ بکەن. ل گەل ڤێ یەکێ ژی، پێشمەرگە و رێڤەبەریا دەریێ سینۆری یێ سێمالکا ب خوینساری نێزیک بوون و بەرسڤا ڤان چەتەیان نەدا.

ھندەک شرۆڤەکارێن سیاسی پشتراست دکەن کو پەکەکێ دخواست بوویەرێ مەزن بکەت و خوینێ برێژیت، ژ بەر وێ ئارمانجێ ژی کۆمەکا چەتە یا ب ناڤێ «جوانەن شۆرەگەر» ئێریشی دەرییێ سێمالکا کر. ئانکو پەکەکێ  خواست ئاژاوەیێ گەلەک مەزن بکەت.

گەلێ رۆژئاڤا زەرەرمەند بوو

پشتی ئاژاوەگێریا پەکەکێ دەرییێ سینۆری ھات گرتن. نێزیکی 3 میلیۆن مرۆڤێن ل رۆژئاڤا دژین ب کریزەکا گرانا ئابۆری روو ب روو مان. بازار و سووک ڤالا بوون؛ بھایێ پێدڤییێن خوارن و دەرمانان زێدە بوون. نێزیکی دو ھەزار کەس ب قاچاغی ھاتن باشوورێ کوردستانێ. یێ کو ژ ئاژاوەگێریا پەکەکێ زرار دیتی تەنێ گەلێ رۆژئاڤا بوو.

ئەو ئارمانجێن پەکەکێ یێن سیاسی، ل پشت گەلان ڤەشارتی چ نە

زەرەرمەندبوونا گەلێ رۆژئاڤا ژ بەر سییاسەتا پەکەکێ نە جارا یەکەمە. پەکەکە ھەر دەم گەل تێخیت پێشییا خوە و خەباتەکا نە د بەرژەوەندییا گەل دا دمەشینیت. د راستیێ دا نە تەنێ گەلێ رۆژئاڤا زەرەرمەندێ تاکتیکا پەکەکێ یە کو گەل وەکە “مەرتالێن زندی” ب کار دئینیت. پەکەکە ل باکورێ کوردستانێ، ل کامپا مەخموورێ، د ناڤا پەنابەران دا، ل گەلەک دەڤەران ژیانا رۆژانە یا گەلێ کورد تێخیت بن مەترسییان و گاڤێن کو سبەرۆژا گەل تاری بکەت داڤێژیت. پەکەکە  پرۆپاگاندا و بەرژەوەندیێن خوەیێن سیاسی د سەر ژیان و پێشەرۆژا گەلێ کورد ددانیت. تشتا کو ل سێمالکا رووددا ژی دوبارەکرنا شێوازا خەباتا پەکەکێ یا کەمباخکرنێ بوو.

شانۆیا  سێمالکا ب داوی بوو

پشتی مەھەکێ کو گەلێ کورد د زەرەرمەندیەکا مەزن دا ژییای، پەکەکێ خواست ب ھاریکارییا ناڤبەینکاران دەری بدەتە ڤەکرن. ژ بەر کو پەکەکێ ئەڤ یەک دیت ھەگەر دەری مەھەک دن گرتی بمایا دا رۆژئاڤا ڤالا بیت. ژ دوھی ڤە حکوومەتا کوردستانێ بریار دا کو دەریێ سێمالکا ژ بۆ کارووبارێن بازرگانیێ بهێتە ڤەکرن. ئیرۆ پەکەکێ راگھاند کو چالاکیا خوەیا  شانۆیا خەلیفانا سێمالکا ب داوی کریە. لێ نھا ھێژ ئەڤ پرس مایە: ما مافێ پەکەکێ ھەبوو کو د بن ناڤێ شانۆیا خالیفان دا 3 ملیۆن گەلێ رۆژئاڤا برچی بھێلیت؟ پەکەکێ ب ڤێ چالاکیا بێ واتە یا ل سەر درەوان سازکری چ ب دەست خوە خست؟ پەکەکێ ژ بۆ خوە ئاموورێن پرۆپاگاندایێ پەیدا کرن لێ گەلێ رۆژاڤا بوو زەرەرمەندێ ڤێ شانۆیێ.

 رێڤەبەرییا ھەرێما کوردستانێ ب بەرپرسیاری تەڤگەرییا

تەڤی ھەموو ئاژاوەگیریێن کو ژ ئالیێ پەکەکێ ڤە ھاتن کرن، ھەرێما کوردستانێ ب سەبر و مەتانەتەکا مەزن رێ نەدا کو پرسگرێک بەر ب شەرەکێ د ناڤبەرا کوردان دا بچیت. د ماوەیێ 14 مەھێن بۆری دا پەکەکێ 9 پێشمەرگە شەھید کرن و 15 جاران ژی تەقەمەنی و کەمین ل سەر رێیێن پێشمەرگێ کوردستانێ داناینە. ل گەل ڤان ھەموو ئیستیفزاز و ئاژاوەگێریان ژی، ھەرێما کوردستانێ ھەلوەستا خوەیا کو ھەموو کوردان ھەمێز دکەت بەردەوام کر و مەجال نەدا ناڤمالا کوردی ئالۆز ببیت.