وەک تێ زانین بەری چەندەکێ ل سەر ڤەخواندنا سەرۆکێ CHPێ کلچدارۆغلو 6 پارتیێن ترک ل سەر مێزەکێ گرۆڤەر جڤینەک ئەنجامدا. د جڤینێ دا، سەرۆکێ جەهەپێ کەمال کلچدارۆغلو، سەرۆکا IYI پارتیێ مەرال ئاکشەنەر، سەرۆکێ پارتیا دەمۆکرات گولتەکن ئویسال، سەرۆکێ پارتیا دەڤا عەلی باباجان و سەرۆکێ پارتیا پێشەرۆژێ ئەحمەد داوودئۆغلو ئامادە بوون. د رایا گشتی دا و تایبەتی دەردۆرێن سیاسی دا ژ ناڤەرۆکا جڤینێ پتر نە ئامادەبوونا ھەدەپێ د جڤینێ دا ھاتە گۆتوبووژ کرن. ھەروەھا گەلەک ئالیێن ترک نە ئامادەبوونا ھەدەپێ وەک نە ئامادەبوونا کوردان نرخاندن و د ڤێ دەربارێ دا رەخنە کرن. ژ ئالیێ ترکان ڤە مرۆڤ ب ڤێ ھەلوەستا ھێزێن سیاسی تێدگھیت، لێ ھندەک کوردان ژی ھەمان تشت ئانین رۆژەڤێ.
بابەتەک ھەیە کو، پێوستە تایبەتی ئالیێن سیاسی یێن کورد ڤێ یەکێ ب زەلالی ئاشکەرا بکەن. گەلۆ ھەدەپە ب تەنێ نوونەراتیا کوردا دکەت، یان ژی پرسیارەک هێشتا زەلالتر، گەلۆ ھەدەپە نوونەرتیا کوردا دکەت؟ ئەگەر ئالیەک بێژیت بەلێ ھەدەپە نوونەراتیا کوردا دکەت، گەرەک ئەو ئالی د جھ دا خوە تەسویە بکەت و بکەڤیتە د ناڤا رەفێن ھەدەپێ دا و سیاسەتێ بکەت. نا ئەگەر ھەدەپە نوونەراتیا کوردا ناکەت، دڤێت ھەلوەستا ئالیێن سیاسی زەلال بیت.
ھەدەپە پارتیەکە کو، ب سەر داخوازیا ئۆجالان و دەولەتا ترک ھاتیە دامەزراندن. د دەما “پێڤاژۆیا چارەسەریێ” دا، ھەدەپە ل ئیمرالیێ ب بریارا عەڤدللا ئۆجالان و سەرۆکێ میتێ ھاتیە دامەزراندن. د ھەمان دەمێ دا وەزیرێ دەولەتێ و ژ ئالیێ حکوومەتێ ڤە کۆاردیناتۆرێ “پێڤاژۆیا چارەسەریێ” «بەشیر ئاتالای» ل سەر ئەکرانا تەرەتێ گەلەک ڤەکری گۆت کو، ھەدەپە ژ بۆ ڤێ پێڤاژۆیێ ب بریارا ئۆجالان و دەزگەھێ دەولەتێ ھاتیە دامەزراندن. رۆژەک ژ رۆژان کەسەک ژ ھەدەپێ ل ھمبەر ڤێ داخویانیێ دەنگ نەکر . ئەڤ یەک راستیەک بوو کو، ھەرکەسەک دزانیت. لێ ھەر چ کەرامەت بیت مرۆڤ ژ ھندەک بەرژەوەندیێن تەنگ خوە نە بھیستی دکەن و پرسێن دن گۆتوبێژ دکەن.
ژ ئالیەک دن ڤە، ھەدەپە ب خوە دبێژیت “ئەو نە پارتیەکا کوردیە و ئەو پارتیەکا ترکیایە. ھەدەپە هەڤپەیمانیەکا ئالیێن چەپێن ترک و ھندەک ئسلامیایە. ئەگەر د ناڤا ھەدەپێ دا ھندەک ناڤ باش بێنە نرخاندن راستیا ھەدەپێ ژی دەردکەڤیتە ھۆلێ.
سەزا تەمەللی، فیگەن یوکسەکداغ، ئەرتوغرول کورکچو، ھودا کایا، ئایھان بلگەن و گەلەک ناڤێن دن مرۆڤ دکاریت ب رێز بکەت.
ئەڤجا نە ھەوجەیە کو ناسناما ھەدەپێ بهێتە گۆتوبێژ کرن. ھەدەپە نە ژ قەندیلێ بیت د ھلبژارتنان دا 1% دەنگان ناینیت. باشە دەما ئەڤ راستی ھەموو تێنە زانین ب چ ئارمانجێ ددەنە خویاکرن کو، کورد د کەسایەتا سیاسییا ھەدەپێ دا تێنە تەمسیلکرن؟
ل باکورێ کوردستانێ گەلەک پارتیێن کورد ھەنە، ھەرکەسەک ل گۆری خوە خوەدی بەرنامەیەک سیاسییە و ھەموو ژی خوە وەک پارتیێن کورد ددەنە ناساندن و ل گۆر خوە ئیدا دکەن کو سیاسەتەک کوردستانی رێڤەدبەن. لێ کەسەک بەحسا وان ناکەت و تەنێ ھەدەپێ ددەنە پێش. ترکا ب دەھان سالان گەلەک ب زانەبوون کورد ھەموو د کەسایەتا پەکەکێ دا دانە ناساندن و پەکەکە ژی ل جیھانێ وەک رێخستنەکا تەرۆرست دا ناساندن. دژمناتیا ھەری مەزنا کوردان ئەڤە بخوەیە. ھەتا ل باکور و بەشێن دنێن کوردستانێ ئەڤ یەک ب زەلالی نایێ دتین و ب ئاشکەرا نایێ گۆتوبێژ کرن، ھەتا کورد د ڤێ پرسێ دا نە زەلال بن پێشییا خوە ژی نابینن.
ئەگەر د راستیا خوە دا، ئالیێن ترک پیچەکێ ژی د پرسا کورد دا بخوازن گاڤا باڤێژن، دڤێت ل گەل پارتیێن کورد، پارتیێن کو خوە ئاشکەرا وەک پارتیێن کورد ب ناڤ دکەن دا بدەن و بستینن.
ھەروەھا ل باکورێ کوردستانێ سەردەستییا ھەدەپێ دڤێت ب ئاویەکێ بهێتە شکاندن دا کو کورد بکاربن خوە بدەنە فام کرن و بەحسا پرسگرێکا کورد بکەن و داخوازیێن خوەیێن نەتەوی بدەنە پێش. ل ترکیا و باکورێ کوردستانێ پارتیێن کو خوە کورد و کوردستانی ددەنە ناساندن ھەموو قانوونی نە، هیچ بەهانەیەک بۆ وێ یەکێ کو لگەل ڤان ئالیان دا دانووستاندن نەیێ کرن نەمایە.
چەوا کو سیاسەتا پەکەکێ گرێدایی دەولەتێ رێ نەدا کو تەڤگەرا کوردستانی ب ھێز ببیت و ھەر دەم بوونە ئاستەنگا ھەری مەزن و سەرەکی، د قادا قانوونی دا ھەدەپە ژی ھەمان تشتێ دکەت.
ئالیێن کو خوە کوردستانی ددەنە ناساندن، پیدڤییە راستیا ھەیی ببینن و د بن بانەک کوردستانی دا ھەڤکاریەک یان ژی پلاتفۆرمەکا نە ب تەنێ ب ناڤ بەلکو ب ناڤەرۆک یا کوردستانی ئاڤا بکەن.
23/2/2022
رۆژەڤاکورد
