ئه‌نفالكری ژی ژ «بێئه‌خلاقیێن» په‌كه‌كێ رزگارنه‌بوون!
وه‌كه هه‌ر تم من دخوه‌ست بزانبم ت ئاگاهی، نووچه ل ده‌ربارێ گه‌ریلا هه‌نه، ره‌وشا وان چا‌وا دمه‌شه، ت سه‌ركه‌تن ب ده‌ست خستنه، ژ بۆ ڤێ من مه‌دیا په‌كه‌كێ د شۆپاند، من نه‌دی تشته‌ك ل سه‌ر ره‌وشا شه‌رڤانان هاتبه نڤیساندن، به‌ره‌ڤاژی پڕ بێئه‌خلاقیێن رێخستنێ ل سه‌ر ئه‌نفالكری و مالباتێن وان هاتن دیتن.
مالپه‌رێ رۆژ نیۆز یێ په‌كه‌كێ مژاره‌ك كو خوه‌دیێ وێ نه‌دیاره ل سه‌ر شه‌خسێ رێبه‌ر ئه‌حمه‌د وه‌زیرێ ناڤخوه یێ حكوومه‌تا هه‌رێما كوردستانێ و نامزه‌دێ په‌ده‌كێ ژ بۆ پۆستا سه‌رۆككۆمارییا ئیراقێ هاتییه پارڤه‌كرن.
وه‌ختا كو چاڤێ من ب ڤێ مژارێ كه‌تی، پڕ كێف خوه‌ش بووم، ئه‌ز فكریم كو ئه‌ڤ په‌كه‌كه یه وێ په‌سنا وه‌لاتپارێزه‌كی بكه، وێ په‌سنا كورده‌كی بكه كو ئه‌نفال ژیان كرییه و ئه‌ندامێن مالباتا وی تێده شه‌هیدبوونه. ئه‌ز فكریم په‌كه‌كێ ب جوانی ل سه‌ر ڤی شه‌خسی ئاخڤییه!.
لێبه‌لێ ته‌خمینا من شاش ده‌ركه‌ت، وه‌كه تێ گۆتن «ئه‌و واره، لێ نه‌ئه‌و بوهاره»، من دی كو په‌كه‌كێ هه‌ر چ گۆتنه‌ك نه‌جوان و دوور ژ راستیێ هه‌یه ل سه‌ر شه‌خسێ ڤى مرۆڤی نڤیساندییه، تشتا راست د وێ نڤیسا په‌كه‌كێ ده ته‌نێ ناڤێ رێبه‌ر ئه‌حمه‌د و رۆژا ژ داییك بوونا وی یه، تشتێن دن هه‌موو ده‌ره‌و و بێئه‌خلاقی نه كو ل سه‌ر ئه‌نفالكرییه‌كی هاتنه نڤیساندن.
یێ كو وێ نڤیسێ بخوینه، وێ دو كه‌ڤال كه‌ڤن به‌ر چاڤێن وی، یێك كادرۆیه‌كی حیزبا به‌عس كو به‌شداری د قه‌تلكرنا بارزانییان ده كربه، كه‌ڤالێ دویه‌مین ژی نڤیسكاره‌ك كورد ل مالپه‌ره‌ك كوردی و ب ناڤه‌ك كوردی!.
كه‌ڤالێ یه‌كێ:
وه‌ختا رژه‌ێما به‌عس بریارا ئه‌نفالكرنا بارزانییان گرتی، هه‌ر كه‌سێ ده‌ستێ ره‌ژیمێ ڤێرا گهیشت به، كو ب هه‌زاران بوون هه‌موو كۆم كرن و به‌ر ب جیهانه‌ك نه‌دیار برن كو هه‌یا رۆژا مه یا ئیرۆ چارنڤیسا وان نه‌دیاره، یێك ژ وان مالباتان، مالباتا رێبه‌ر ئه‌حمه‌د بوو.
وه‌ختا ڤێ مالباتێ ل ئه‌ره‌به‌یه‌كه ئارتێشا ئیراقێ سوار دكن، ل نێزى هه‌ولێرێ ئه‌ڤ ئه‌ره‌به ژ بۆی بێهنڤه‌دانێ د سه‌كنه، ژ نشكان ڤه داییكا رێبه‌ر ب گری و قێرین، بانگ ل كادرۆیێن به‌عس دكه و داخوازێ ژێ دكه كو ب ته‌نێ رێبه‌ر و برایێ وى كو هێژان زارۆك بوون ئازاد بكه، ئه‌ڤ كادرۆیێ به‌عسی ویژدانا وى د شوغله و ب گۆتنا داییكا رێبه‌ر دكه، رێبه‌ر و برایێ تێن ئازاد كرن و هه‌موو ئه‌ندامێن دن یێن مالباتێ تێن ئه‌نفال كرن.
رێبه‌ر و برایێ خو كو دوو زارۆك بوون ده‌ستێ هه‌ڤ دگرن و ده‌ست ب ژیانه‌ك زه‌حمه‌ت دكن و هه‌موو جورێن ئاسته‌نگییان دبڕن و خوه‌ندنا خوه د دۆمینن و كوردایه‌تییا خوه ب زاختر دكن ژ بۆ كو ل پاشه‌رۆژێ ته‌ڤلی شۆره‌شا رزگار كرنا باشورێ كوردستانێ ببن.
كه‌ڤالێ دویه‌مین:
مالپه‌ره‌ك ب ناڤ كوردی یه و كه‌سه‌ك ب زمانێ كوردى، ڤى شه‌خسێ كورد كو ته‌نێ ئه‌و و برایێ خوه ژ ساخ ئه‌نفالێ فه‌لتینه، ب شه‌خسه‌ك نه‌كورد په‌روه‌ر و زۆردار ناس دكه.
د ڤان دوو كه‌ڤالان ده گه‌هشتمه وێ باوه‌ریێ كو من فێم نه‌دكر پارتییا كاركه‌ران ئه‌و قاس ل دژى ده‌وله‌تا كوردى خه‌باتێ دكه و من فێم نه‌دكر كو ئه‌و قاس دژمناتى ب مالا بارزان ره هه‌یه و هه‌روه‌ها ل ئه‌وقاس ل دژى حكوومه‌تا باشووره و ئه‌وقاس ژی دۆستا ده‌وله‌تێن داگیركه‌ره.
ئێنجام ئه‌ڤه یێ كو ڤێ نڤیسا په‌كه‌كێ بخوینه و ل سه‌ر بسه‌كنه، وێ ژ بۆی وی وه‌كه چاڤێ رۆژێ ئه‌شكه‌ره به كو كادرۆیێ به‌عسی یێ كو ل په‌ی قێرینا داییكا رێبه‌ر هاتی، پڕ ب ئه‌خلاقتر ده‌ردكه‌ڤه به‌ر چاڤان ژ وی نڤیسكارێ كو خوه ب كورد د حه‌سبینه و ژ بۆی مه‌دیا ڤێ رێخستنا ب ناڤ كوردی د نڤیسینه.
