جانۆ ئامەدی
ل گۆری نووچەیان ل 44 باژارێن رووسیا ل دژی داگرکەرییا ئووکراینا خوەپێشاندن و چالاکیێن پرۆتەستۆیی چێ بوویە. 2000 ئاکادەمیسیەن و رەوشەنبیرێن روسی زێدەتر ل دژی شەری ب داخویانییەکا ھەڤبەش ھەلوەستێن خوە دییار کرن. ب ھەزاران کەسان ل دژی شەری نەرازیبوونا خوە نیشان دان و ھاتن گرتن.
ل ئووکراینا ھەموو بەشێن سیاسی ل دژی داگیرکەرییا رووسیا ل گەل حکوومەت و ئارتێشا خوە راوەستانە و نەتەویبوونا خوە نیشان ددەن و ئەرکێن وەلاتپارێزییێ ب جیھ تینن. ب سەکن و ھەلوەستێن خوە بالا رایا گشتییا جیھانێ دکشینن سەر خوە.
د دەما داگیرکرنا کەرکووک، عەفرین، سەرێکانیێ و گرێ سپی دا، ل باژارێن ترکیایێ ب گرسەیێن مەزن، گەلێ ترک پشتگریا داگیرکەرییێ کرن. د مزگەفتان دا سۆرەتا فەتح ھات خواندن. د مزگەفتان دا گۆتارێن نژادپەرەستیێ ب فەرمانا ئەوقافا ترکیێ ل ھەموو باژاران ھاتن داین. ب سەدان تەریقەت، پارتی و رێخستنێن سیاسی، جڤاکی پشتگریا داگیرکەرییێ کرن.
چەپ، راست، لیبەرال، موحافزەکار ب کورت و کورمانجی ھەموو ئالیان ب ئاوایەکێ پشتەڤانییا خوە نیشان دان. ڤێ یەکێ ب تەنێ تێرا نەکر، ھندەکان ژی ل سەر مۆشەک و بۆمبەیێن کۆمکوژیێ ناڤێ خوە نڤیساند.
ل کوردستانێ چ بوو؟
ھشمەندییەکا ب چ رەنگی دەستھلاتدار بوو.
چما ل دژی ھێزێن مێتینگەھ و داگیرکەرێن ھۆڤ ھەلوەستێن نەتەوی یێن ھەڤبەش چێ نەبوون؟
چما ب یەک دەنگی، ب یەک رەنگی ل دژی داگیرکەران ھەلوەستێن نەتەوی پێک نەھات؟
چما ل دژی داگیرکەران ھشمەندییەکا نەتەوی لاوازە؟
چما ھشمەندیا بەعسی و کەمالیستان ئەوقاس ب باندۆرە؟
چما خوەندن و نرخاندنێن تەخا سیاسی یا کوردی لاواز، سەقەت و کۆرە؟
چما تۆڤێ خیانەتێ ئەوقاس زوو شین دبیت؟ چما پشتگیر و ئالیگرێن داگیرکەران ئەوقاس ب ھێزن؟
گەلۆ سەدەمێن دیرۆکی، چاندی، سیاسی و جڤاکی چ نە؟ سەدەمێن تێکچوونێ چنە و چما رێگری لێ ناهێتە کرن؟
