د 15ێ ئادارا 2011ێ دا، گەلێ سووریێ ب ھەموو پێکھاتەیێن خوە ڤە داکەتن کۆلانان، و شۆرەش ل دژی رێژیما بەعس ئەنجامدا، ژ باژارێ «دەرعەیێ» کو ب لاندکا شۆرەشێ دهێتە ناسکرن دەستپێ کر، رۆژ ب رۆژ بەرفەرەھتر بوو، ل ھەر پارێزگەهـ، باژار، باژارۆک و ھەر گوندەکێ، گەلێ سووریێ خوە کرن یەک ل دژی رێژیما ئەسەد یا کو ژ 63 یێ دا ل سەر دەستهەلاتداریێ یە، و بانگا ھەلوەشاندنا رێژیمێ کر.
ل رۆژئاڤایێ کوردستانێ ژ دێرکێ تا عەفرینێ، ھەروەھا ل تاخێن کوردی یێن ل حەلەبێ مینا «شێخ مەقسوود، ئەشرەفیێ، و بوستان باشا» سەرەرای تاخێن کوردی ل «شاما» پەیتەختا سووریێ وەکە زۆرئاڤا و «روکنەدین» و ھندەک تاخێن دن، کوردان خوە ل دووری شۆرەشێ نەھشتن مل ب مل ل گەل باژارێن دن شۆرەش دەست پێ کر، و ب سلۆگانێن کوردی و ب ھلدانا ئالایێ کوردستانێ ل دژی رێژیما سووریێ راوەستیان.
ژ بەر کو رێژیما سووریێ بژاردەیا شەر ھلبژارت، ب گولـلە، تانک و بالافران ل ھەمبەر خوەپێشاندەران سەرەدەری کر، ب چ شێوەیی بیت ھەولا ڤەمراندنا ئاگرێ شۆرەشێ دا، دەستەک و ناندۆزێن خوەیێن ب ناڤێ «شەبیحە»، داخستن کۆلانان کۆمکوژی ئەنجام دان، ل باژارێن کوردی ژ بەر بەشداریا بھێزیا کوردان کو ل باژارێ «عاموودێ» پەیکەرێ «حافز ئەسەد» ھاتە ھلوەشاندن، و سێیەم ھەفتیێ ب ناڤێ ئەینیا ئازادی ل سەرانسەری سووریێ شۆرەش بەردەوام کر، رێژیما سووریێ کو بەرێ ژی ئەزموونا خوە ب کوردان د سالا 2004ێ دەما راپەرینێ دا هەبوو، و پشتراست بوو کو کورد دکارن پیڤانان بگوھرن و رێژیمێ بشکینن، لەوما ب رێکەفتنەکێ باژارێن کوردی رادەستی پەکەکێ کرن دا کو ب ھەمان ئەرکی رابن، و نەھێلن کورد بەشداری شۆرەشا ھلوەشادنا رێژیما دیکتاتۆر بکەن.
پەکەکێ ژ دەما دەستهەلاتداری وەرگرتی، ب ھەمان کارێ کو رێژیما سووریێ ئەنجام ددا، مژوول بوو، ژ بۆ رێژیمێ بوو پشتەڤان ل دژی ئۆپۆزسیۆنێ راوەستیا، و ل گەلەک دەڤەران وەک «نوبول، زەھرا، کاستیلۆ»، نەھشت رێژیم لاواز ببیت، ل سەر ئاستا ھوندرین ژی دەست ب ئارمانجکرنا سیاسەتمەدار، چالاکڤان، ئێل و مالباتێن ل دژی رێژیمێ کر. ھەروەھا ژیانا سیاسی تونە کر، و دەست ب ئالیگر و ئەندامێن ئەنەکەسێ و پەدەکە-سێ و کەسێن ل دژی رێژیمێ کر، کو تا نھا ب دەھان کۆمکوژی د دەرمافێ مالباتێن وەلاتپارێز و سیاسەتمەداران دا روو دانە، ھەروەھا ب سەدان ژ سیاسەتمەداران رەڤاندن، بنچاڤ کرن، و بێ سەوروشین کرن، تا نھا ب دەھان ژ خەباتکاران چارەنڤیسا وان نە دیارە.
ئەنجامێن بژاردەیا شەریا کوژارگەھا رێژیمێ ئەو بوو ب مەلیۆنان ژ خەلکێ سووریێ پەنابەر و دەربدەر بوون، و باژار و گوند ب تەمامی ھاتن ھلوەشاندن، ل سەر ئاستا رۆژئاڤایێ کوردستانێ ژی، ژ بەر کریار و بنپێکرنێن پەکەکێ و رێڤەبەریا پەیەدێ و سیاسەتا شاش، بەشەک مەزن ژ ھەرێمێن کوردی وەک «عەفرینێ سەرێ کانیێ و گرێ سپی» رادەستی تورکیێ کرن، ل باژارێن دن ژی ژیان ئاستەنگ کر و گوھەرتنەک دەمۆگرافی چێ کر، و خەلکێ ژ کریارێن رەڤاندنا زارۆکان و ئاستەنگکرنا ژیانێ بەرێ خوە دان دەرڤەیی وەلات، ل شوونا وان دق عەرەب و پێکھاتەیێن دن ب جی بوون.
پشتی 11 سالان ژ شۆرەشا سووریێ ژ بەر کریارێن رێژیمێ ب سەدان ژ کۆمێن توندرەو و تەرۆریست ھاتن مەیدانێ، ئۆپۆزسیۆنا سووریێ ژی ژ ڤێ گونەھێ بێپار نەمایە، د چارچۆڤەیا 11 سالان دا نکاریبوو دەنگێ گەلێ سووریێ بگھینیتە جیھانێ و چارەسەریەکا راستەقینە ببینیت، بەرووڤاژی وێ یەکێ کار ل سەر بەرژەوەندیێن خوە کر، ل شوونا یەک قەوارە و لاشەکێ سیاسی و لەشکەری ھەبیت، و ب سەدان کۆم و گرووپ و دەستە ھەنە، ھین ژی کوژارگەھا سووریێ و باندۆرا وێ ل ھەر دەڤەرەکێ بەردەوام دکەت.
ش.ە. ئارک
