مانشیت رۆژهلات

هەولێرا پایتەختا باشوورێ کوردستانێ و کەلها ئیرادەیا نەتەوی یا کوردستانییان، جارەکە دن بوویە ئارمانجا ئێریشەکە مووشەکی یا ترسنۆکانە و تەرۆریستی و زرارێن مادی گهیشتن هندەک تاخێن باژاری. ئاژانسێن سەر ب سوپایێ پاسداران و رەژیما ئیرانێ راگهاند کو وان دو بنگەهێن “مووسادێ” هەدەف گرتنە.

ئیرۆ یەکشەمێ 13/3/2022، دژە تەرۆرا کوردستانێ دەربارێ ئێریشا مووشەکی یا ل سەر هەولێرا پایتەخت داخویانیەک پارڤەکر و تێدە راگهاند: “ساعەت 1ی شەڤا دەرباسبوویی ب رێیا 12 مووشەکێن بالستیک، تاخەکی باژارێ هەولێرێ بەر ب کۆنسۆلخانەیا ئەمەریکایێ ل هەولێرێ هات هەدەف گرتن، ژ بلی زرارێن مادی ت زرارەک جانێ نەبوو”.

هەر وەها راگهاند کو ان زانیاری د دەست دە هەنە کو “ئەڤ مووشەک ل دەرڤەی سینۆرێن ئیراقێ و هەرێما کوردستانێ و ژ ئالیێ رۆژهلاتێ بەر ب هەولێرێ هاتنە تەقاندن”.

هەمان دەم مەسروور بارزانی، سەرۆکێ حکوومەتا هەرێما کوردستانێ دەمەکی پاش ئێریشی د داخویانیەکێ دە راگهاند، “هەولێر خوە ژ بۆی ترسۆنەکان ناچەمینە” و گۆت ژی “ب توندی ئێریشا تەرۆریستی یا ل سەر هندەک جیهێن هەولێرێ هاتیە کرن شەرمەزار دکم، ئارامیێ بپارێزن و رێنمایێن سازیێن ئەولەکاریێ جیبجی بکن. ئەز بەرخوەدانا وە سپاس دکم”.

ئێریشا مووشەکی یا ل سەر هەولێری کارڤەدانێن هەرێمی و ناڤنەتەوی یێن مەزن ل پەی خوە ئانین و د ناڤا ئیراقێ دە هەر یەک ژ کازمی و سەدر ب دو داخویانیێن جودا ئەڤ ئێریش ئیدانە کرن، هەمان دەم د ئاستا ناڤدەولەتی دە ژی ژ ئالیێ نەتەوەیێن یەکبوویی و ولاتێن رۆئاڤا ئەڤ ئێریش هات ئیدانەکرن و پشتەڤانیا ناڤنەتەوی ژ بۆی هەولێرێ تەکەز کرن.

هەر وەکە د داخویانیا دژە تەرۆرا کوردستانێ دە هاتی و هەڤ دەم بەشەک ژ مەدیایا جیهانێ وەکە “FOX news” ئێماژە پێ کری، ئێریش ژ ئالیێ ئیرانێ ڤە هاتیە کرن. وەکە دیار چەوانییا ئێریشێ ژی خوەیا دکە کو ئەنجامدەرێ ئێریشا ل سەر هەولێرێ، رەژێما ئیسلامی یا ئیرانێیە و مەدیایێن بەرنیاس یێن سەر ب سازییا ئیستخباراتیا ئیرانێ یا ب ناڤێ ئیتیلاعات و سوپایێ پاسداران یێن رەژێما ئیرانێ ب ئاوایەک نەراستەراست دانپێدان کرن کو ئەڤ ئێریش ژ ئالیێ ئیرانێ ڤە هاتیە ئەنجامدایین.

چاڤکانیێن نووچەیان ل رۆژهلاتێ کوردستانێ ژی ب پارڤەکرنا ڤیدیۆیێن دەما ئاڤێتنا مووشەکان ژ ئیرانێ، ئەشکەرە کرن 10 ژ وان مووشەکێن کو ئاراستەی هەولێرێ هاتبوون کرن ل بنگەهەکی مووشەکی یێ ئیرانێ، ل نێزی گوندێ “رەزەوەر” (سالائاوا) یێ سەر ب پاریزگەهییا کرماشانێ بەر ب هەولێرێ ڤە هاتنە تەقاندن. گوندێ “رەزەوەر” دکەڤە د نێڤبەرا هەرسێ باژارێن کرماشان، سونقۆر و کامیاران یێن رۆژهلاتێ کوردستانێ، رەژیما ئیرانێ یەک ژ بنکەیێن خوە یێن مووشەکی ل نێزی ڤی گوندی ب جی کریە.

 هێژایی گۆتنێ یە مووشەکێن دن ژی ژ بنگەهەکێ مووشەکی یێ ئیرانێ ل نێزی باژارێ تەڤرێزێ بەر ب هەولێرێ هاتنە ئاراستەکرن.

ئەڤ جارا یەکەمین نینە کو رەژیما ئیرانێ هەولێرێ ئارمانج دکە، پێش نها ژی چ ب رێیا مووشەکان و چ ب رێیا میلیشیایێن شیعە ل ئیراقێ ب کاتیۆشا و هاوەنان ئێرشی سەر هەولێرێ کریە و هەر جارێ ژی ژ بۆی ئێریشێن خوە هندەک دەرەو و سەدەمێن بێ رامان رێز کرنە و خوە ژ باسکرنا سەدەمێن سەرەکە یێن ئێریشی دوور گرتیە. کانالا تەلیگرامێ یا ب ناڤێ “سابرین نیۆز” یا سەر ب سوپایێ پاسدارێن ئیرانێ و ئاژانسا “تسنیم” یا سەر ب رەژێما ئیرانێ ڤە راگهاندن کو “بنگەهەکی ئامەریکا و ئیسرائیلێ ل هەولێرێ ب 14 مووشەکان هاتنە ئارمانجکرن” و باس ل ڤێ یەکێ کرنە کو دو بنگەهێن پەروەردێ یێن سەر ب سازییا ئیستخباراتی یا ئیسرائیلێ “مووساد”ێ ل هەولێرێ هاتنە ئارمانجکرن.

بەرا کو ئەم باسی سەدەمێن ڤێ ئێریشێ بکن نوقتەیەک هەیە کو خەراب نیە ئەم باس بکن ئەو ژی ئەڤە کو رووپەلێن نێزی رەژیما ئیرانێ دبێژن 14 مووشەک بەر ب هەولێرێ هاتنە ئاراستەکرن لێ د راستیێ دە 12 مووشەک گهشتنە هەولێرێ و خوەیا نینە دو ژ مووشەکێن دن ل کو دەرێ کەتنە. ئەڤ ژی ئەشکەرە دکە کو شیانێن مووشەکی یێن ئیرانێ پر لاوازترن ژ وێ یا کو ئیران ئیدیعا دکە.

ئارمانجا ئیرانێ ژ ئێریشا ل سەر هەولێرێ

پرانیا شیرۆڤەکارێن ئۆپۆزسیۆنا ئیرانێ هەول ددن هەڤکێشەیێن ناڤدەولەتی ب سەدەما سەرەکە یا ئێریشا مووشەکی یا ئیرانێ ل سەر هەولێڕێ بدن ناسکرن و دخوازن ببێژن کو ئیران ژ بۆ هەدەف گرتنا کۆنسۆلخانەیا نوو یا ئەمەریکایێ و بارەگەهێن دن یێن ئامەریکایێ ل باشوورێ کوردستانێ، مووشەک ئاراستەی هەولێرێ کرن.

دبە سەکناندنا دانووستاندنێن ڤییەن ل سەر کریزا نۆکلەرییا ئیرانێ و خوە پرۆسەسا جڤین و دانووستاندنێن د نێڤبەرا تەهران و ریازێ، بەشەک ژ سەدەمێن ئێریشا مووشەکی یا ڤێ جارێ یا رەژیما ئیرانێ بن، لێ بەلێ، ب نەرینا من سەدەما سەرەکە یا ئیریشا ئەڤ جارە و تەڤ ئێریشێن رەژیما ئیرانێ بۆ سەر پایتەختێ یەکانە پەرچەیا ئازادا کوردستانێ تشتک دنە و سەدەمێن تێن باسکرن سەدەمێن نەسەرەکەنە.

جڤینێن تایبەت ب پرسگرێکا نۆکلەری یا ئیرانێ نکارە سەدەما سەرەکە یا ئێریشا مووشەکی یا ل سەر هەولیرێ بە ژ بەر کو د راستیێ دە جڤین ژ بەر ئیرانێ ب خوە هاتنە سەکناندن و ئەڤ یەک ژی تێکلداری سیفەتێ کۆلەبوونا رەژیما ئیرانێ یە. خامەنەیی ل سەر داخوازا پۆتین و حکوومەتا رووسیێ، جڤینا دەولەتێن 5+1 یێن تایبەت ب پرسگرێکا چەکێ نۆکلەری یێ ئیرانێ راگرتیە. د راستیێ دە رووسیێ فەرمان دایە رەژێما ئیرانێ کو دانووستاندنا راوەستینە هەیا کو پۆتین ئێریشێن ل سەر ئۆکراینایێ ب کێفا دلێ خوە بەردەوام بکە و دخوازە کارتا ئیرانێ بەردەوام وەکە فەشارەکێ ل دژی رۆژئاڤا بکار بینە.

پشتی راوەستاندنا جڤینێن “ڤییەن”، رووپەلا فەرمی یا “جڤاتا بلندا ئاساییشا ئیرانێ” ب ناڤێ “نوور نیوس” راگهاند کو دانووستاندنێن د نێڤبەرا ئیرانێ و عەرەبستانا سعوودی دە کو ب ناڤبەینکارییا ئیراقێ ب رێڤە دچوون، تەک ئالی ژ ئالیێ ئیرانێ ڤە هاتنە سەکناندن.

دبە ئیران بخوازە ب رێیا خوەیاکرنا هێزا مووشەکی یا خوە و ب ئارمانجکرنا بەرژەوەندیێن سعوودیێ، د دانووستاندنێن خوە یێن ب وی ولاتی رە ب دەستەکی تژی و ب هێز بەشدار ببە، لێ بەلێ، ئەڤ ژی نکارە ئارمانجا سەرەکە یا ئێریشا ئیرانێ یا ل سەر هەولیرێ بە، ژ بەر کو ژ ئالیەکی هەولێر یەکانە پارێزەرا بەرژەوەندیێن کوردانە و نە بەشەکە ژ شەرەنیخێ د نێڤبەرا سعوودیێ و ئیرانێ، هەر وها تەهران و ریازێ ب سالانە یەمەن کریە قادا شەر و شەرەنیخێن خوە و ئەگەر بخوازن دکارن ل ور هێزا خوە نیشانی هەڤدو بدن.

هەولیرا پایتەخت، کەلەمێ چاڤێ دژمنان

گەر ئەڤ سەدەمێن سەرەکە یێن ئێریشا نەبن، گەلۆ چ دبیتە ئەگەر کو رەژیما ئیرانێ هەولیرێ بۆمبەباران بکە؟

رەژیما ئیرانێ و تەڤ داگیرکەرێن کوردستانێ پر باش دزانن کو حکوومەتا هەرێما باشوورێ کوردستانی و هەولێرا پایتەخت، هێوێن و گارانتۆرێن دامەزراندنا دەولەتەکە سەربخوە یا کوردن و دکارن د دەما بێ دە کۆشکێن داگیرکەران ئیمها بکن و داویێ ب دەستهلاتداریا وان یا داگیرکەر ل کوردستانێ بینن. داگیرکەرێن کوردستانێ ب باشی ئەڤ راستیێ فێم کرنە  کو د نها دە هەولێر بوویە ستارگەهـ و کەلها بەرەڤانیکرن ژ ناسنامەیا نەتەوی یا کورد و کوردستانێ و هەیا کو هەولێر وەکە پایتەختا یەکانە پەرچەیا ئازادا کوردستانێ ل سەر لنگان بسەکنە و خوە نەچەمینە، هزرا نەتەوی گەشتر، ئالا کوردستانێ بلندتر و سروودا نشتیمانی یا ئەی رەقیب بهێزتر وێ کۆشکێن داگیرکەرێن کوردستانێ بلەرزینە.

 هەولێرێ ئالا هزرا نەتەوی و سەربخوەخوازی و سەربخوەیی خوازانەیا کوردان راکریە و رەژیما تەهرانێ و داگیرکەرێن دن یێن کوردستانێ دزانن کو تەڤی ب رێیا هندەک خایینان و کوردێن خوەفرۆش یێ  د ناڤا “میحوەرێ مقاوەمێ” کارین دژاتیا ئەنجامێن رەفراندۆما سەرخوەبوونا کوردستانێ بکن و کەرکووکا کوردان و ناڤچەیێن دن یێن باشوورێ کوردستانێ جارەکە دن داگیر بکن، لێ بەلێ قەت نەکارینە ئارمانجێن رەفراندۆمێ ل هزر و دلێ کوردان بینن دەر و هەر دەما کوردان دەرفەتەک باش هەبە دکارن کارتا رەفراندۆمێ ئاکتیڤ بکن، ب نەرینا من ترس ژ دامەزراندنا دەولەتەک سەربخوە یا کوردان سەدەما سەرەکە یا ئێریشا شەڤا دەرباسبوویی یا ل سەر هەڤلێرێ و تەڤ ئێریشێن دنە کو ژ ئالیێ داگیرکەران ڤە ل سەر هەولێرێ و هەرێما کوردستانێ دهێن کرن.

سەدەما دویەمین ژی کو گرێدایی سەدەما یەکەمینە، سەنگا نەتەوەخوازێن باشوورێ کوردستانێ یا ب رێبەرتیا هەولێرا پایتەختە کو د داوی هلبژارتنێن پارلامانتۆیا ئیراقێ دە ب زەلالی خوەیا بوو و ڤێ سەنگێ ژی باندۆرەک مەزن ل سەر پێشەرۆژا سیاسی یا ئیراقێ هەیە.

هەر وەک هەر کەس دزانە، ئیران و کرێگرتیێن وێ (میلیشیایێن حەشدا شەعبی و پەکەکە) د هلبژارتنێن پارلامانتۆیا ئیراقێ دە راستی شکەستنەک دیرۆکی بوون و هەیا نها تەڤ هێزا خوە بکارئانیە کو رێ نەدن حکوومەتا نوو یا ئیراقێ ب هەڤپەیمانیا د نێڤبەرا (سەدر، سوونە و کوردان) پێک وەرە. دەما فێم کری ب گەفخوارن و بریارێن سیاسی یێن دادگەها فەدەرال یا ئیراقێ و قوتکرنا بودجە و مووچە و هود….نکارن رێ ل بەر کوردستانێ بگرن وێ دەمێ مووشەک بکارئانین و دخوازن ب ڤێ رێیێ ئیرادەیا کوردان ل سەر داخوازێن وان ێێن رەوا تێک بشکینن. لێ بەلێ، هەر وەکە دیرۆکێ هندەک جاران ئەشکەرە کریە، ئیرادەیا رزگاریخوازانەیا کوردان خوە ژ داگیرکەر و ترسۆنەکان رە ناتەوینە.

 رەژیما ئیرانێ ب ئاوایەکی نەراستەراست و ب رێیا رووپەلێن وەکە تەنسیم و تابناک و ….. ئێماژە ب ڤێ یەکێ کریە کو د ڤێ ئێریشێ دە دو بنگەهێن مووسادێ ل هەولێرێ هاتنە هەدەف گرتن! لێ بەلێ وەزارەتا تەندروستیێ یا هەرێما کوردستانێ و تەڤ ئاژانسێن نووچەیان ژی ئەڤ یەک تەکەز کریە کو ئێریشێ ت زرارەک جانی ل پەی خوە نەئانیە و د راستیێ دە هندەک تاخێن هەولێرێ و سازییا مەدیایی یا (کوردستان 24) ب سەدەما ڤ ئێریشێ زرارێن مادی دیتنە.

بێ گومان ئیران دەرەوان دکە و دخوازە هێنجەتا ژ بۆی ئێریشێن خوە بگرە، گەر نا هەگەر راست دبێژە و دخوازە ل ئیسرائیلێ بدە بلا ب رێیا وان هەموو پەرەیێن ل سووریێ و لبنانێ یێن جینارێن ئیسرائیلێ خەرج کری دو مووشەکان بەر ب ئیسرائیلێ بهاڤێژە، گەلۆ ئەو مووشەکێن کو هەرتم ب وان گەفێن ژناڤبرنا ئیسرائیلی دکە ل کو دەرێ نە؟ مەرەما رەژیما ئیرانێ نە ئیسرائیلە گەر نا ئەو باشتر ژ هەر کەسی دزانە بارەگەهێن مووسادێ ل باشوورێ کوردستانێ و ل گوندێ “مەلا عۆمەر” تونەنە.