دەولەتا تێرۆریستی یا ئیرانێ دو رۆژ بەرێ 12 مووشەکێن بالیستیک ئاڤێتن ھەولێرا پایتەخەت. ئەڤ بوویەرا تەرۆریستی پێڤاژۆیەکە کو دڤێت کورد ژ نێزیک ڤە بشۆپینن و ھەموو ھوورگلیان ب ھشیاری حەساب بکەن. ئیران دبێژیت؛ “د ئێریشا ھەولێرێ دا مە ئەندامێن مۆسادێ کرنە ئارمانج” لێ ڤێ ئێرشێ چ پەیوەندی ب ڤێ بانگەشەیا ساختەیا ئیرانێ ڤە نینە. ژ بەر کو ئیرانێ ئیدیعا کر کو وان 9 ئێندامێن مۆسادێ کوشتنە و ناڤێن 9 کەسان کو دبێژیت مە کوشتنە ژی ب سەناریۆیەکا ھێسان بەلاڤکر. ھنجەتا ئیرانێ ھێسانە، لێ ئارمانجا وێ گەلەک مەترسیدارە.
ب قاسی باندۆرا ستراتەژیکا ئێریشا رووسیایێ یا ل سەر ئوکراینایێ ئارمانجەکا ستراتەژیک ھات چێکرن. د ناڤبەرا ھەر دو بوویەران دا ژی پەیوەندیەک ھەیە. ئێریشا ئیرانێ یا ل سەر ھەولێرێ جارەکا دن ئاشکەرا دکە کو ل رۆژھلاتا ناڤین بەشەک ھێز ھەنە کو د ستاتویا داگرکەرییا ل سەر کوردستانێ دا ئیسرارێ دکەن.
ژ بەر ڤێ یەکێ ژی ھەلوەستا ل ھەمبەری ڤێ ئێرشا ئیرانێ ب راستی ژی ھەلوەستا ل ھەمبەری ستاتویا کۆلۆنیال یا کوردستانێیە. گەر ھوون ب راستی دخوازن فێم بکەن کو د ناڤ کوردان دا کوردستانی کی نە، ئەم دکارین ب دیتنا ھەلوەستا وان یا ل ھەمبەر 12 مووشەکێن کو ل ھەولێرێ کەتنە، فێم بکەین.
ھەلوەستا پەکەکێ یا منافقی
وەک میناک ئەم دکارین پەکەکێ و پێکھاتەیێن گرێدایی وێ د ڤی واری دا بنرخینن. تەڤی کو ئەڤ دو رۆژن د سەر بوویەرێ را دەرباس بووی ژی، نە پەکەکە و نە ژی رێخستنێن گرێدایی وێ چ داخویانی دەربارێ ڤێ بوویەرا دژمنکار دا نەدانە. ب ئیحتیمالەکا مەزن ل بەندا تەعلیماتانە. ژ بەر کو ھەموو پێکھاتەیێن پەکەکێ رێکەفتنا ستراتەژیکا ئیرانێ دزانن. ژ بەر ڤێ یەکێ نەوێرن ئیرانێ مەحکووم بکەن. هەگەر ژ نها و پێڤە ڤێ بوویەرێ شەرمەزار ژی بکەن ئێدی چ واتەیا خوە نینە. لێ ئەڤ بویەرە ھندەک راستیان نیشانی مە ددەت.
وەک میناک ل باکورێ کوردستانێ پەکەکێ دو پارتیێن سیاسی ھەنە: ھەدەپە و دەبەپە
«ھەدەپە» پارتیەکا سیاسییە کو ھەر کەس ناس دکەت. ل ئالیێ دن «بەدەپە» ژی پارتیەکە کو ھەری زێدە کادرۆیێن پەکەکێ تێ دا ب جی بوونە. «بەدەپێ» رۆژێن بۆری کۆنگرەیا خوە پێک ئانی و سەرۆکێن خوەیێن نوو ھلبژارتن. و ھەر دو سەرۆکان ژی بەحسا پێویستیا کوردان ب یەکیتیا نەتەوی و بانگا لدارخستنا کۆنگرەیا نەتەوی ژ بۆ کوردان کر. ل جھەکێ کو ئێریش ل سەر ھەرێما کوردستانێ دهێتە کرن، دڤێت کورد ستاتوویا ھەرێما کوردستانێ وەکە بیناھیا چاڤێن خوە بپارێزن، لێ مخابن هیچ ھەلوەستەکێ نیشان نادن. ب ھەمان ئاوایی تەنێ چەند پارلەمەنتەرێن «ھەدەپێ» بوویەر شەرمەزار کرن. ناڤەندا گشتییا «ھەدەپێ» بوویەرا کو بەریا 25 سالان ل «ترکیایێ» روودای و سڤیلان ژیانا خوە ژ دەست دان شەرمەزار کر و ل کو دەرێ جیھانێ تەقینەک چێببیت، ھەدەپە پێشییا ھەموویان دەنگێ خوە دەردخیت و شەرمەزار دکەر. لێ دژمن ئێریشی کوردان دکەت، ئەو دەنگێ خوە دەرناخن. وەرن ئەم وەک کورد شەرمەزارکرنا وان بدەینە ئالیەکێ، وەک ئینسان مووشەکان دئاڤێژن کەسێن سڤیل، دکارن وی شەرمەزار بکەن، لێ ئەو ھەلوەست ژی تونەیە. ئۆفیسا «ھەدەپێ» یا ھەولێرێ ژی ئەڤ بوویەرە مەحکووم نەکر.
پاشێ دێ چ روو دەت، ھندەک پارلامەنتەرێن ھەدەپێ یێن وەک «حوسەیین کاچماز» دێ سەردانا ھەولێرێ کەن و بێژن کو دڤێت یەکیتیا نەتەوی چێببیت، لێ دەما ئێریش ل سەر کوردان دهێتە کرن ئەو جەسارەت ناکەن کو تویتتەکێ ژی باڤێژن.
ناڤێ ڤێ رەوشێ چیە؟ ئەم دکارین بێژینێ رەوشا مونافقیێ. تشتێ کو باوەر پێ ناکەن وەکە کو باوەر پێ دکەن دیار دکەن. پەکەکە و جڤاتا خوە مونافقێن د ناڤا کوردان دا نە.
ھووداپارێ ب شەرمۆکی بوویەر شەرمەزارکر
ھەلبەت ئالیێ دن یێ ڤێ کوردایەتیا مونافقیا ل باکور کوردستانێ ژی «ھووداپار»ە. «ھووداپار» ل ھەمبەری مووشەکێن کو ئیرانێ ئاڤێتین کوردستانێ بێدەنگ ما. دەماکو مە ئەڤ نڤیس ئامادە دکر داخویانییا «ھووداپارێ» ژ نوو کەتە سەر مالپەرێن راگاھاندنێ. ب راستی د داخویانییا ھووداپارێ دا ھەلوەسەتەکێ کو ئیرانێ شەرمەزار دکەت نەبوو. «ھووداپار» دبێژیت «ئەم دژی وێنە کو کوردستان ببیتە گۆرەپانا شەری، لێ ئەو نابێژیت ئەو ئێرشا دژمناھییا کوردانە«.
چما؟ ژ بەر کو «ھووداپار» ژی مینا پەکەکێ گۆتن و پەیڤێن خوە ل سەر ئیرانێ ب پیڤان دبێژیت. ژ سالێن 1990ێ و ڤر ڤە دو تەڤگەرێن سیاسی یێن کو دژمنێن و خووندارێن ھەڤ خویا دکەن، د مژارەکا ستراتەژیک دا گەلەک ھەڤپارن، ھەلبەت ئەڤە مژارەکە کو دڤێت گەلەک ل سەر بهێتە فکرین. سەدەمێن وێ یێن ئۆنتۆلۆژیک ھەنە.
رەوشا رۆژئاڤا
یەک ژی رەوشا رۆژئاڤا ھەیە. هندەک کەس د ناڤ رێڤەبەریا رۆژئاڤا ھێڤییان دکەن کو “ھەولێر وێران ببیت و وەکی گوندەکێ قامشلۆ لێ بهێت”. ژ بەر ڤێ سەدەمێ ئەو ب مووشەکێن کو ئاڤێتین ھەولێرێ گەلەک کێفخوەش ببوون. لێ بەلێ مووشەکێن کو ئاڤێتنە ھەولێرێ دهێنە واتەیا کو ئاڤێتنە پێشەرۆژا ھەموو کوردان. گەر ھەولێر ئارام نەبیت، د مەترسیێ دا بیت، قامشلۆ ئارام نابیت. ئەو فکرا کو ب بنکەتنا پارچەک کوردستانێ وەکە سەرکەفتنا خوە دبنینن بێھشبوونە. لێ مخابن رۆژئاڤا خوەدی ڤێ راستییێ یە، لەوما ژی ھەمبەری ئێریشا ھەولێرێ بێدەنگ مان. قەدەرا ھەموو کوردان ب ھەڤرا گرێداییە.
د ئەنجامێ دا ئەم دکارین ببێژین کو ئێریشا ل سەر ھەولێرێ ژ بەر پەڤچوونێن ھەرێمی پێک ھات. رێزێن دۆست و دژمنا زەلال کر. خەمخوورێن کوردستانێ و یێن د ھەمبێزا داگیرکەران دا دژین ژ ھەڤ جوودا کرن.
