دژمناھیا ھەری دژوار ئەوە یا کو د ناڤا مالا مرۆڤی دایە. ئەگەر مرۆڤ د ناڤ مالا خوە دا پشتکول بیت، هاریکارێن دژمنێن مرۆڤی ژ مالێ بن زەحمەتە. مارێ ناڤا مالێ ژەھریترە.
سێ رۆژ بەرێ، شەڤا شەمبیێ سەر یەکشەمبێ رەژیما ئیرانێ 12 مۆشەک ئاڤێتن سەر ھەولێرێ. وەسا بانگەشە کر کو وان ئەو مۆشەک ئاڤێتینە سەر دەزگەھەکێ سەهیۆنیستان، مۆئسادێ! ژ خوە ئەڤە درەوە، ئەڤجا درەوەکا ژ ئاقل دوور! ژ بلی خوەدیێ درەوێ، چ ئالیان چ قیمەتەک نەدا ڤێ درەوێ و ئەو ب خوە روورەش بوون.
ئەو روورەش بوون، لێ ھندەک کورد بەزین ھەوارا رەژیما سێدارەدانێ!
ب چەندین جوران: ھندەکان دلخوەشییا خوە دیار کر کو ل ھەولێرێ دانە. ب تایبەت ل مەدیا جڤاکی میناکێن ڤان نامەردان گەلەکن.
مەدیایا گرێدایی ھزرا یالچین کوچوک و قەندیلا کو بوویە بەشەک ژ ھێزێن ھیلالا شیعە ژی ب حیلەبازی و ب دوورووتی پشتەڤانیا خوە بۆ رەژیما سێدارەدانێ دیار کر.
یەک ژ ڤانا، یەکێ کو خوە ب تەمامی ئاشکەرا کریە، ئیرۆ د رۆژنامەیا “خوەبوون” یا نیک دلەکێ کوردی دا ھات بەلاڤ کرن.
مرۆڤ شەرم دکەت!
هندەک جاران کورد دبێژن خوەزی ئەرد شەق ببا و ئەز حەفت قاتان د بنێ ئەردیدا چووبامە خوارێ و بەرزە ببام و ئەز نەببامە شاھدێ ڤێ شەرم و فەدیێ.
لێ کا شەرم و فەدی ل دەڤ ڤان ڤرەک و درەوکەران؟
مرۆڤ نکاریت وێ بێبەختیێ، وێ نڤیسا ب کین و غەرەزا داگرتی، بخوینیت! دلێ مرۆڤی دگریت، ڤەرەشانا مرۆڤی دهێت!
ناخوازم زێدە بەھسا ڤێ درەوێ و روورەشیێ بکەم.
واتەیا ڤێ نڤیسینێ ئەوە: پرۆپاگاندایا گۆتنێن رەژیما سێدارەدانێ دکەن. دبێژن: “ھەولێر کریە بنگەھێ مۆئسادا ئیسرالێ”! رەژیما سێدارەدانێ ژی ووسا دبێژیت! ئەز ل رەژیما سێدارەدانێ دگەهم، ما چ ژ وێیە؟ ھوون چما درەوێن ڤێ رەژیمێ بەلاڤ دکەن؟ درێژ ناکەم. نھا دۆربەرێن وان کارێن خوەیێن “میحوەرێ موقاوەمەتێ” پێکتینن. میحوەرێ مقاوەمەتێ، رەژیما سێدارەدانێ ھەڤالبەندێن خوە ووسا ب ناڤ دکەت. حزبولله یا لوبنانێ ژی، حەشدا شەعبی یا ئیراقێ ژی ھێزێن “میحوەرا مقاومەتێ”یێن ھیلالا شێعا نە. ئەڤێن ھەڤالبەندییا رەژیما سێدارەدانێ دکەن بەشەکن ژ میحوەرێ مقاومەتێ.
و ھەو!
ژ تویتەرا “خوەبوونێ: “د ڤێ جڤینێ دا ل ھەڤ کرن کو باژارێ ھەولێرێ ببیتە ناڤەندا مۆسادا ئیسرایلێ، گەلێ ئیرانێ و گەلێ باشوورێ کوردستانێ وەکە سیخورێن مۆسادێ ل دژی کۆمارا ئیرانێ ب کار بینن.”
بایرام ئایاز
