ماھر حەسەن
جوانن کوردستانا-ترکیێ د پیرۆزکرنا نەورۆزا 2022یێ دا، دیسا ل باژارێ «ئامەدێ» ب نشتیمانپەروەری و حەز و ھەستێن بەرز ئالا پیرۆزا نەتەوی بەر ب ژۆر ڤە بلند کرن و ب وێنەیێن سەروەر و رێبەرێن مە، کۆلان خەملاندن. چەند ھێژا نە کو ل سەر دەست و تلیێن وان باکورێ وەلات پشتی ئێش و نەخوەشیەک دوور و کوور دکەنیت و کۆنێ شینیێ دچرینیت و دیسا گولستان و گول و دارستانێن «ئامەد، مێردین، وان، شەرنەخ، سێرت و جزیر» ب بارانا ژ تاڤێن شۆرەشێ تێنە ئاڤدان، و ل سەر چیا و دەشتێن باکورێ وەلات، ل سەر لات و زنارێن وێ، بۆست ب بۆست ب تیپێن زێرین ناڤێ خوە د نڤیسینن و دبێژن ڤا ئەم ھەنە، ئۆمید و ھێڤی ڤەگەراندن و گەلەک کێفخوەشی بەلاڤ کرن ژ بۆ پێشەرۆژێ.
گاڤا جوانێن کوردێن باکورێ کوردستانێ سەرکەفتنەک بوو کو ئارمانج و پلانسازێن نەمانا نەتەوا کوردی ل وی پارچەیی گوڕ کر، و بوو ھەولدان ژ بۆ ئاڤاکرنا نفشەکی دلسۆز و رەسەن. چاوا ژ کەلا «ئامەد» ھەیا «بارزانا» بەرخوەدانێ، ژ پەراڤێ «دیجلە و فەرات» بۆ خوپ-خوپا ئاڤا چەم و جۆبارێن «مەھاباتا» بریندار، ژ نەورۆزا 2022یێ بۆ شۆرەشا «ئەیلوولێ» و پێشمەرگەیێن دلێر، د سینگا ئاسمانێ وەلات دەنگ ڤەدان و ل ھەڤ ڤەدگەریت و ھەر تشت ب کوردی ئاخڤی د بن سیا ئالایێ نەتەوی دا.
ب دیداریا ھەری مەزن، سەرێ سبەھا نەورۆزێ ڤە کەتنە رێ و جادەیان دا جارەکا دی ل کۆلانان گۆڤەندێ بگەرینن و ئالا خوە ھەمبێز بکەن و گرینگیەکا مەزن پێ دان، و ل قادا نەورۆزێ ژی ئالا د ئاھەنگ و جۆش ل ئاستا ھەری بلند بوو.
جوانێن نەتەوییێن کوردستان «CNK»، د کێلەکا بەرەڤانیکرن ژ مافێن خوەیێن رەوا، خوەدان رۆلەکێ گرینگ و بەرچاڤن ژ بۆ پێشدەبرنا زانایی و وەکھەڤی و دیار کرن کو تم وێ بەردوام بن ل سەر خەباتێ بۆ پاراستن و بەرگریکرن د بەر نەتەوا خوە دا، و ب چ ئاوایی ژی نە ئامادەیە د بن چ زەختەکێ دا کو ئالا خوە بروخینن یان ژی دەڤ ژ خواستەک و داخوازێن خوەیێن رەوا بەردەن.
بژی جوانێن نەتەوییێن کوردستانێ، بژی کەد و ھزرا هەوە
