سەرۆکاتیا کارووبارێن ئۆلی یا ل ترکیێ ل دەریێ مزگەفتا مەزن (ئولو جامی) یا «ئامەدێ» ل باکورێ کوردستانێ تابلۆیەک ب 4 زمانێن ئینگلیزی، ترکی، عەرەبی و رووسی دانایە، لێ د دەمەکێ دا خەلکێ ل باژێر کوردن، زمانێ کوردی د ناڤ وان زمانان دا نینە.
د مەھا رەمەزانێ دا ب دەھان ھەزار کەس سەردانا مزگەفتا مەزن (ئولو جامی) یا ئامەدێ دکەن. سەرۆکاتیا کارووبارێن ئۆلی یا ل ترکیێ ل بەر دەریێ ڤێ مزگەفتێ تابلۆیەک ب 4 زمانان دانایە، لێ کوردی د ناڤا وان زمانان دا نینە.
د تابلۆیێ دا بەحسا رێنمایێن پێویست یێن ژ بۆ چوونا ناڤ مزگەفتێ دهێتە کرن.
ئامەد وەک باژارێ کو ل باکورێ کوردستانێ ھەری زێدە کورد لێ دژین دهێتە ناسکرن، لێ ل ڤی باژاری نە تەنێ د سازیێن حکوومەتێ دا لێ بەلێ د سازیێن گشتی و شوونوارێن دیرۆکی دا ژی زمانێ کوردی تێ پاشگوھکرن.
تەڤی کو سالانە ھەژمارەکا گەلەک کێم یا گەشتیارێن رووسی سەردانا ئامەدێ دکەن، لێ بەلێ حکوومەتا ترکیێ د ناساندنا ھندەک جھێن دیرۆکی یێن باژێر وەکە مزگەفتا مەزنا ئامەدێ دا جھ دایە زمانێ رووسی و زمانێ خەلکێ باژێری، زمانێ کوردی پاشگوھ کریە.
گرنگی پێدانا ب زمانێ رووسی و زمانێن بیانی و پاشگوھکرنا زمانێ کوردی ل ئامەدێ، د ناڤا خەلکێ ئامەدێ و کەسایەتیێن باژێر دا بوویە سەدەما عاجزیەک مەزن. ب تایبەتی ل سەر تۆرێن جڤاکی رەخنە ل نەبوونا زمانێ کوردی د تابلۆیا ل بەر دەریێ مزگەفتا مەزنا ئامەدێ دهێنە کرن کو ئەو تابلۆ ژ ئالیێ سەرۆکاتیا کارووبارێن ئۆلی یا ترکیێ ڤە ھاتیە دانان.
رۆژنامەڤانێ کوردێ خەلکێ ئامەدێ، «ماھموت بۆزارسلان» ل سەر تویتەرێ رەخنە ل نەبوونا زمانێ کوردی د تابلۆیێ دا گرتیە و گۆتیە، “سالێ چەند توریستێن رووس تێنە ئامەدێ نزانم و ھەتا ئیرۆ نایێ بیرا من. لێ ھەر سال ب دەھ ھەزاران توریست ژ کوردستانا ئیراقێ تێن. تابلۆیا ھشیاریێ یا ل بەر دەریێ مزگەفتا «ئولویێ» ب رووسی ھەیە، لێ ب کوردی نینە.” ئەندامێ کۆمیتەیا رێڤەبەرا ناڤەندی یا «ئاک پارتیێ» و پارلەمەنتەرێ بەرێ یێ «ئاک پارتیێ» «عەبدولرەحمان کورت» ژی د بەرسڤا رەخنەیان دا دیار کر کو رەخنە د جھ دا نە.
«عەبدولرەحمان کورت» گۆت، دێ لگەل سەرۆکێ کارووبارێن ئۆلی ئاخڤیت و چارەسەریەکێ بۆ ڤێ چەندێ بینیت.
