سەدەمێن ئۆپەراسیۆنا ھەڤپارا یەبەشێ و حەشدا شەعبی و مووشەکێن ل سەر ھەولێرێ دبارن

حزب-العمال-الكردستاني-الحشد-الولائي-pkk-iran-erbil-hewler-hashed-shabi

 رۆژنامەیا پەکەکێ یا ب ناڤێ «رۆژ نیوز» کو ل سلێمانیێ وەشانێ دکەت، د 2یێ نیسانێ دا ل سەر حەسابا خوەیا مەدیایا جڤاکی ئۆپەراسیۆنا ھەڤپارا ھێزێن یەبەشێ یا گرێدایی پەکەکێ و ھێزێن حەشدا شەعبی یێن ئالیگرێن ئیرانێ یێن ل ئیراقێ پارڤە کربوو.

پشتی بۆرینا 4 رۆژان ل سەر ئەنجامدانا ڤێ ئۆپەراسیۆنا هەڤپار، ئێرشەکا دنا مووشەکی ل نێزیکی ھەولێرا پایتەختا ھەرێما کوردستانێ ھات ئەنجامدان. مووشەک ل «کەورگۆسکێ» ل نێزی پارزینگەها پەترۆلێ کەتن. ھات دیارکرن کو مووشەک ژ نێزیکی مووسلێ ھاتنە ئاڤێتن. واتە ب ئیحتیمالەکا مەزن جھێ کو مووشەک لێ ھاتینە ئاڤێتن جهێ حەشدا شەعبییە. ھەلبەت ئەڤە نە ئێریشا یەکەما حەشدا شەعبییە ل سەر ھەرێما کوردستانێ. بەرێ ژی ئێریشێن ب ھەمان رەنگی ھاتبوون کرن. ھەری داوی ئیرانێ شەڤا 13ێ ئادارێ ب 12 مووشەکان ئێرشی پایتەختا ھەرێما کوردستانێ ھەولێرێ کر بوو.

بەلێ، یا بالکێش ئەڤەیە کو چەند رۆژ بەرێ ھێزێن پەکەکێ یێن شنگالێ «یەبەشێ» و «حەشدا شەعبی» دیمەنێن ئۆپەراسیۆنا ھەڤپارا مووسلێ پارڤە کربوون. دیرۆکا وێنەیێن کو ژ ئالیێ «رۆژ نیوزێ»ڤە ھاتنە وەشاندن دیار نینە. لێ شێوازا پارڤەکرنا نووچەیێ نە تەنێ ناڤەرۆکا نووچەیێ د راستیێ دا تێ خواستن کو ب ڤێ نووچەیێ پەیامەکا نەراستەراست بهێتە دایین. پەیاما کو ل ڤێرە تێ دایین پەسەند کرنا ھەڤکاریا لگەل حەشدا شەعبی دا یە.

ھێزێن «حەشدا شەعبی» یێن ئالیگرێ ئیرانێ ب «داعشا» ڤێرژنا شیعەیا تێن ناسکرن و د ھەر دەلیڤەیەکێ دا دژبەریا خوە ل ھەمبەر کوردان نیشان ددەن. ل ئالیێ دن پەکەکە ژ سالا 2013ێ ڤە دەما کو «داعشێ» ئێریشی ئیراقێ کری و هێرڤە، ب باسکەکێ شیعە و حەشدا شەعبی یا ب ئیرانێ ڤە گرێدایی دناڤا پێوەندییان دایە. د بەردەوامیا پرۆژەیا «ئیرانێ» یا ژ بۆ دەرخستنا «شنگالێ» ژ ھەرێما کوردستانێ، کو بەردەوامیا پرۆژەیا «ھەیڤا شیعەیە»، پەکەکێ ھێزەکا لەشکەری د بن ئالایێ حەشدا شەعبی دا ل شنگالێ دامەزراند. ھێزا پەکەکێ «یەبەشێ» کو ئالایێ حەشدا شەعبی ھلدایە، ب تەمامی ل سەر دژمناھییا ھەرێما کوردستانێ و پێشمەرگە تەڤدگەریت.

 ئەرکا سەرەکی یا «یەبەشێ» کو شریکا حەشدا شەعبییە ئەوە کو د ھەر واری دا دژمنێ ھەرێما کوردستانێ یە، د ئێریشەکا چاڤەرێکری یا ئیرانێ بۆ سەر ھەرێما کوردستانێ ئەو دێ ل گەل ھێزێن ئیرانێ ئێرشی باشوور کەن. ژ بەر کو کارڤەدانا گشتی یا کوردان ل ھەمبەر ئێریشەکا ئارتێشەکا وەکە ئیراق و ئیرانێ دهێتە زانین، پەکەکە دخوازیت ڤێ بوویەرێ وەکە ناکۆکیەکا ناڤبەرا کوردان نیشان بدەت.

وەشانێن مەدیایا پەکەکێ نە دەمکی نە، ئەو د چارچۆڤەیا پلانەکا بەرفەرەھا دژی ھەرێما کوردستانێ، تەڤدگەرن. ئەڤە پلانا وێ ئەنیێ یە کو ئەم دبێژینێ «ئەنیا دژ-کورد». پلانا ڤێ ئەنیێ ئەوە کو ستاتویا ھەرێما کوردستانێ بگوھەرن و بشێن بێی کارڤەدانا جڤاکا ناڤنەتەوەیی و گەلێ کورد ڤێ پلانێ رێڤەببەن. د ڤێ پلانا دژمنکار دا پەکەکە د جھەکێ ستراتەژیک دا ھاتییە ئەرکدار کرن. پەکەکە ھاتیە ئەرکدارکرن کو ئێریشا ل سەر ھەرێما کوردستانێ وەکە ئێریشەکا ل دژی پەدەکێ نیشان بدەت و ئێریشا ل سەر رێڤەبەریا ھەرێما کوردستانێ ژی د بن ناڤێ ھند پەیڤێن چینی و ئابۆری دا بهێتە ڤەشارتن.

پەکەکە ژ بۆ ئاساییکرنا ئێریش و ھەولێن تێکبرنا ھەرێما کوردستانێ د ناڤ گەلێ کورد دا ب ئامادەکرنا بنەسازیەکا دەروونی ھاتیە ئەرکدارکرن. ھەروھا ئەگەر د دەما پێش دا ئێریشێن ل سەر ھەرێما کوردستانێ ژ پێڤاژۆیەکا سار و ڤەشارتی دەرکەڤیت و ئاشکەرا و چالاک ببیت، دێ پەکەکە ب ناڤێن جودا بەشداری ڤان ئێریشان بیت. یەک ژ ڤان ناڤان ژی یەبەشەیە. ژ بەر کو پەکەکە راستەراست ژ بەر ئێریشێن کو ل سەر ناڤێ خوە پێک ئانیبوو ھاتە رەخنەکرن و وەکە رێخستنەکا تەرۆریستی دهێتە دیتن دێ «یەبەشە» د ئێریشێن ل سەر ھەرێما کوردستانێ دا هێتە بکارئانین.

پەکەکێ ل شنگالێ کو خاکا کوردستانێ یە، ئالایێ ئیراقێ بلند کر، نەپەژراندنا ئالایێ کوردستانێ دیار دکەت کو پەکەکە وەکە بەلێندەرێ «مقاولێ» ھێزێن کو ئێریشی ستاتوویا ھەرێما کوردستانێ دکەن هێتە ب کار ئانین. 

ژ بەر ڤێ سەدەمێ نە خەلەتە کو مرۆڤ ل پشت ھەر ئێرشەکا حەشدا شەعبی و ئیرانێ بۆ سەر ھەرێما کوردستانا ل شۆپا پەکەکێ بگەریت و ل پشت ھەر ئێرشەکا پەکەکێ ژی ل شۆپا ئیران و حەشدا شەعبی بگەریت. ئەڤ ئێرش ھەموو ژ یێک ناڤەندێ و فەرمانگەھێ تێن مەشاندن.

پوستێن ھەمان بەش