جۆزێف گۆبێلز و مه‌دیا په‌كه‌كێ به‌شێ «1»
جۆزێف گۆبێلز وه‌زیرێ راگهاندنا ئه‌لمانیا نازى گوتبوو: «مه‌دیایه‌ك بێ ویژدان بد‌ن من، ئه‌زێ پڕ نه‌هشیێ بدم وه»، دیسان دبێژه: «ده‌ره‌وێ بكه، ده‌ره‌وێ بكه، ده‌ره‌وێ بكه» هه‌یا كو گه‌ل وێ ده‌ره‌وێ وه‌كه راستی دبینه.
پڕ كادرۆیێن په‌كه‌كێ ژی و ته‌یبه‌ت رێڤه‌به‌رییا ژوور یا رێخستنێ ل سه‌ر ڤی كۆنسه‌پتێ ئاڤا بوویه و وان ئه‌ڤ كۆنسه‌پت كرنه بنگه‌ها سه‌ره‌كه ژ بۆی ڤه‌شارتنا راستییا په‌كه‌كێ و رێبه‌رێ وێ، مه‌دیا په‌كه‌كێ ژى بوویه ئاموورێ سه‌رڤیسكرنا ده‌ره‌وان.
مه‌دیا په‌كه‌كێ خوه ب زانا و گه‌لێ كورد ب گێل دزانه
لێ یا راست، ل ده‌ما گاڤا شه‌رێ چه‌كداری ل باكور ده‌ستپێكری، گه‌ل ژ گۆتنێن په‌كه‌كێ باوه‌ر دكر و ئاماده بوون خوه فه‌دا بكن، فه‌داكاریییا گه‌ل گها ئاسته‌كی ووسا كو وان خوه ژ بۆی ئازادیێ شه‌وتاندن.
لێ كورد دبێژن: «به‌نكێ ده‌ره‌وینى كورته»، ئه‌ڤ گۆتن ل سه‌ر پارتییا كاركه‌ران تێ چه‌سپاندن، ل دنیایێ چه‌ندی شۆره‌ش درێژ ببه، گه‌ل پێتر پێره تێ گرێدان، لێ به‌لێ ل باكور بابه‌ت به‌ره‌ڤاژ بوو، چه‌ندی ته‌مه‌نا پارتییا كاركه‌ران درێژ دبه، گه‌ل ئه‌و قاس و رۆژ ب رۆژ پێتر ژێ دوور دبه، سه‌ده‌ما دووربوونا گه‌ل ژ په‌كه‌كێ ژ بۆی وێ ڤه‌دگه‌ره كو ده‌ره‌وێن وان ژ بۆ گه‌ل ئیفشا بوونه.
ژ گه‌لێ كورد ره ئه‌شكه‌ره بوو كو رێخستنا په‌كه‌كێ و ته‌یبه‌ت رێبه‌رێ وێ، ئه‌و ب گۆتنێن نه‌ته‌وه‌یی خاپاندنه، ژ بۆی گه‌ل دیار بوو كو په‌كه‌كێ ب قاسی ده‌وله‌تا ترك زرار ل دۆزا كورد كرییه و پێتر گه‌لێ كورد به‌ر ب هلوه‌شانێ برییه، ل ڤر ژی میناكا «رووڤیێ كه‌ڤلێ میهێ ل خوه كری» تێ بیرا مرۆڤ!!.
ل رۆژا 4 نیسانێ كو دبه رۆژا ژ دایكبوونا ئۆجالان، من هنه‌كی مه‌دیا په‌كه‌كێ شۆپاند، من دی د ڤێ بوونه‌یێ ده مه‌دیا وان بوویه ده‌ره‌وینترین مه‌دیا د دیرۆكا جیهانێ ده، من ووسا دی كو وان ئۆجالان گهاندییه ئاستا خوه‌دێ و جاران ژی خوه‌دێ داكه‌تییه ژێر ئاستا ئۆجالان، هه‌ما هه‌ما مابوو كو ببێژن: «ژ بۆ برێڤه‌برنا دنیایێ، حاشا خوه‌دێ علمێ خوه ژ ئۆجالان دستینه»!!.
دیسان من ووسا فێم كر كو سه‌ركرده‌یێن دیرۆكا ملله‌تێ كورد یێن مینا «شێخ عوبه‌یدوللایێ نه‌هرى، شیخ سه‌عیدێ پیران و سمكۆیێ شكاك، قازى محه‌مه‌د و مه‌لا مسته‌فا بارزانى» هه‌موو پووشمانن كو وان شۆره‌ش كرنه و چ ئێنجام ژ بۆی گه‌لێ كورد ب ده‌ست نه‌خستنه!!.
دیسان من دی كو «قاسملۆ، مه‌سعوود بارزانى و جلال تاله‌بانى و نه‌وشێروان مسته‌فا و گه‌له‌ك سه‌ركرده‌یێن دن» پووشمانن كو ل په‌ی رییا ئۆجالان نه‌مه‌شیان!!.
من دی كو «خانى، جزیرى و پیره‌مێرد و ناڵى و به‌درخان ….هتد» نكارینه مینا ئۆجالان خزمه‌تا چاند و زمانێ كوردى بكن.
تێ زانین ئۆجالان:
نزانه ب كوردییه‌ك ره‌هوان بئاخڤه.
نزانه جلێ كوردى ل خوه بكه، «ئه‌و جلێ مه‌دیا په‌كه‌كێ تینه پێش كو ئۆجالان به‌رگیزێن شین ل خوه كرنه، ئه‌و به‌رگیز كه‌سه‌ك سندى ژ بۆی ئۆجالان ئانی بوونه شامێ و ل ئه‌پارتمانه‌كێ ل خوه كربوون و شال ژ بۆی گرێدابوون و ده‌رسووك ژ بۆی چێكر و ته‌نێ ساعه‌ته‌كێ ل به‌ر مان»، ئه‌ڤ یێك ل سالا 1992 ان بوو.
نزانه‌ى چه‌كى بته‌قینه بژلی ده‌مانجێ.
د ژیانا خوه ده گه‌ریلاتى نه‌كرییه و یێك شه‌ڤ ژى ل چیایى نه‌مایه.
ده‌ما ئاڤ ڤه‌دخار، ب كلینكسێ په‌رداخ دگرت، ژ به‌ر كو وی باوه‌ری ب نێزیكترین كادرۆیێ په‌كه‌كێ نه‌دهات.
