کامپانییا دژاتیيا پەدەکێ، بارزانیيان و بەرژەوەندیێن نەتەوه‌یی!
وەک دهێتە زانین دەما کورد د بەشەکێ کوردستانێ دا گاڤەکێ بەر ب بەرفرەھکرنا دەستکەفتیێن نەتەوی ڤە تاڤێژن، دەولەتێن داگیرکەر د جھ دا ژ بۆ کو وێ گاڤێ تێک ببەن دکەڤنە د ناڤا تەڤگەرەکێ دا. پرانی ژی ل شوونا کو ئەو راستەراست ئێریشان بکەن یەکەمجار سیخورێن خوە یێن کوردستانێ ب کارتینن و ب ڤێ یەکێ ب ناڤێ کوردان شەرێ دەستکەفتیێن نەتەوی و کوردستانێ دکەن.
سالا 2017ێ دەما رەفراندۆما سەرخوەبوونا کوردستانێ چێبوویی ھەرکەسەکێ دیت چەوا دەولەتێن داگیرکەر و سیخوورێن وان یێن کوردستانێ ل ھمبەر داخوازا گەلێ کوردستانێ سەکنین و ژ بۆی کو وێ دەستکەفتیا گرنگ تێک ببەن جاردەکا دن شەرێ کوردا و تایبەتی شەرێ پەدەکێ و بارزانیان کرن.
ئیرۆ د ڤێ قۆناغا کو تەڤگەرا کوردستانی تێرا دەرباس دبیت جارەکا دن ھەمان تشتێ دکەن. تایبەتی پشتی شەرێ روسیا و ئوکرانیا، گرنگیا ئەنەرژیا کوردستانێ دەرکەت ھۆلێ، و وەلاتێن رۆژئاڤا کەتن د ناڤا ھەولدانا کو چەوا بکارن خوە ژ گاز و ئەنەرژیا رووسیا بقەتینن و پێدڤییێن خوەیێ ئەنەرژیێ ژ دەڤەرەک دن پەیدا بکەن. ژ بۆ جیھانا رۆژئاڤا جھێ ھەری گرنگ کو بکاربە ڤێ پێدڤیا وان پێکبینە باشوورێ کوردستانێیە.
ئەگەر گازا سرووشتی یا کوردستانێ ب ئاوایەکێ بکاربن ڤەگوھێزن ئەورۆپا دێ د سیاسەتا ئەورۆپایا د دەربارێ کوردستانێ دا گەلەک گوھەرتنێن ستراتەژیک پێکوەرن. ھەروەھا ڤێ یەکێ ڤە گرێدایی سیاسەتا ئامەرکایێ ژ بۆ کوردستانێ و تایبەتی باشوورێ کوردستانێ زەلالتر دبیت. ڤێ یەکێ ڤە گرێدایی رۆلێ رووسیا و ئیرانێ ژی کێمتر دبیت و حەزەکا خوەیا ئابووری وەندا دکەن. ھەتا ئەورۆپا و ئامەریکا ژ بۆ بەرژەوەندیێن خوە بپارێزن دکارن چەوا دوھی ل دژێ رەفەراندۆما سەرخوەبوونێ دەرکەتین، ئیرۆ ژ بۆ بەرژەوەندیێن خوە کوردستانێ بەرب دەولەتبوونێ ڤە ژی ببن.
ل ھەموو کوردستانێ ھێزا کو دەولەتبوونا کوردا دپارێزیت و خوەدی گرانیەکێیە پەدەکەیە. ھەروەھا 3 کەسایەتی د ڤی واری دا دەردکەڤن پێش. سەرۆکێ پەدەکێ مەسعوود بارزانی، سەرۆکێ ھەرێما کوردستانێ نێچیرڤان بارزانی و سەرۆکوەزیرێ کوردستانێ مەسروور بارزانی.
تایبەتی د ڤێ قۆناغا کو ئاڤاکرنا حکوومەتەکا نوویا ئیراقێ و ھلبژارتنا سەرۆککۆمارێ ئیراقێ و ھەروەھا د ڤێ چارچۆڤەیێ دا، رێکەفتنا کو پەدەکێ ئەنجامدای و ھەلوەستا پەدەکێ ل کوردستانێ و ئیراقێ، د سەری دا ئیرانێ گەلەک عاجز دکەت و مەترسیا ئیرانێ چێبوویە کو ئەڤ سیاسەتا پەدەکێ باندۆرا وان ل ئیراقێ و ھەرێما کوردستانێ کێم بکەت.
ژ بۆ ڤان سەدەمێن کو ل ژۆر ھاتین دیارکرن، ئیران و ھەڤالبەندێن خوە ئێریشەک مەزن و رێکخستی دکەتە سەر پەدەکێ و بارزانیان. ژ بەر کو بارزانینە داخوازا دەولەتبوونا کوردان ل جیھانێ ددەنە ناساندن و ب دپلۆماسیەک سەرکەفتی بەرژەوەندیێن کوردستانێ دپارێزن. مرۆڤ حەز ژ پەدەکێ بکەت یان نەکەت، مرۆڤ بارزانیان ب ئاوایەک ئەرێنی یان ژی نەرێنی بنرخینیت یان نەنرخینیت، ئەڤ راستیا ھەیی ناهێتە گوھەرتن. ئیرۆ پەدەکە و بارزانی بوونە دەمانا گاڤا بەر ب دەولەتبوونێ ڤە.
ئەگەر مرۆڤ باش بالا خوە بدەتێ، ئەڤە دەمەکە ژ بلی ئێریشکرنا پەدەکێ و بارزانیان پەکەکێ هیچ کارەک دی نەمایە. پەکەکە نە ب تەنێ هێرشێ دکەت، بەلکو نووچەیێن درەو بەلاڤدکەت و د مەدیا خوە دا نووچەیێن ساختە و دوور ژ راستیێ بەلاڤ دکەت. ئەگەر ئەم بەرێ خوە بدەینە مەدیا پەکەکێ، دێ راستیا ھەیی ب زەلالی هێتە دیتن.
سەرۆکانیا دژاتیا خەتا سەربخوە یانی یا پەدەکێ و بارزانیان ئیران و سخورێ وان یێ ل کوردستانێ نە. تایبەتی د ڤێ سەناریۆیا ل دژێ دەستکەفتیێن نەتەوی پەکەکە رۆلێ ھەری مەزن دگێریت. دەما مەدیایا پەکەکێ ڤێ یەکێ دکەت، چەپێن ترک د جھ دا زرنایا پەکەکێ لێ ددەن. ھەتا رادەیەکێ چەپێن ترکان ژی د ڤێ دەربارێ دا خوەدی باندۆرن و دکارن ب رێیا پەکەکێ ل دژێ بەرژەوەندیێن کوردا و تایبەتی ل ھمبەر دەولەتبوونا کوردان خوەدی ھەلوەستبن.
د دەربارێ ئێریش و درەوێن کو پەکەکە ل ھەمبەر پەدەکێ و بارزانیان دکەت، دو خالێن گرنگ و ئەوقاس ژی بالکێش ھەنە کو دڤێت مرۆڤ باس بکەت.
یەکەم ئەوە کو، مەدیایا باشوورێ کوردستانێ و تایبەتی یا نێزک ژ پەدەکێ و ژ ھەموو دام و دەزگەھێن مەدیا پەکەکێ گەلەک ب ھێزتر و خوەدیێ ئیعتیبارەک ناڤنەتەوییە ژی. لێ ب ئاوایەک پێوست ل ھمبەر ڤان ئێریشێن پەکەکێ، ل ھمبەر بێبەختی و درەوێن مەدیا پەکەکێ کو ل دژێ پەدەکێ و بارزانیان دکەت ناسەکنیت، واتە د باوەریا مە دا ئەرکێ خوە ئەنجام نادەت. ھەتا رادەیەکێ د ھندەک نووچەیێن کو گرانیێ ددەنێ دا، د کەسایەتا ھەدەپێ و ھندەک رێخستنێن گرێدایی پەکەکێ دا ب ئاوایەکێ پرۆپاگاندەیا وان دکەن.
دویەم ھەلوەستا گەلەک پارتی و رێخستنێن کو سەرخوەبوونێ دپارێزن و د ڤێ دەربارێ دا ژی پشتگریا بارزانیان و پەدەکێ دکەنە. د دەربارێ ئێریشێن پەکەکێ دا بێ دەنگن و خوەدی ھەلوەست نینن. د ئاخاڤتن و نووچەیێن تەنگ دا بەحسا ڤێ یەکێ دکەن، لێ د داخویانی و مەدیایا پارتی و رێخستنێن خوە دا بێ دەنگن.
بێ گومان ئەڤ ھەردو مژارە گەلەک بەرفرەھی جھێ گۆتوبێژەکێنە. لێ د چەرچۆڤەکا مەقالەیی دا ئیشارەتکرنا ڤێ ژ بۆ بالکشاندنەکێ یە.
گەلەک ڤەکری ل ھمبەر ئێریش و دەرەوێن پەکەکێ و ماموستایێن سیاسەتا پەکەکێ دەرکەتن، و پارستنا پەدەکێ و بارزانیان بوویە ئەرکەک نەتەوی. بێ گومان ئەگەر ھەبن مرۆڤ ب دلەکێ بەرفرەھ رەخنا دکەت، کێماسیێن ھەیی دبێژیت، لێ مرۆڤ د ھەمان دەمی دا ژ بۆ بەرژەوەندیێن نەتەوی دڤێت ببیتە مەرتالەک ژ بۆ پاراستنا بەرژەوەندیێن نەتەوی، پەدەکێ و بارزانیا……. هەری کێم ئیرۆ، د ڤێ قۆناغێ دا ژ بۆ بھێزکرنا گاڤا بەر ب دەولەتبوونێ ڤە ئەڤە ئەرکەک نەتەوییە.
