سیاسەتا پەکەکێ یا چاڤترساندنا ل سەر ئۆپۆزسیۆنا رۆژئاڤایێ کوردستانێ بەردەوامە. د ڤێ چارچۆڤەیێ دا ھەری داوی گەف ل دەردۆرێن ئۆپۆزیسیۆنێ و ب تایبەت مالباتێن پێشمەرگەیێن رۆژ دکەت. یەک ژ ڤان گەفان ژی ژ ئالییێ «شێخ باقی» ڤە ھاتە کرن.
سەرۆکێ پارتیا ب ناڤێ «پارتیا یەکیتیا دەمۆکراتا کوردێن سووری» یا رۆژئاڤا «شێخ باقی» ژ بۆ مەدیایا پەکەکێ داخویانیەک دا و تێ دا گەفێن کوشتنێ ل مالباتێن پێشمەرگەیێن رۆژ کرن.
«جەمال شێخ باقی» د ئاخافتنا خوە دا ئیدیعا کر کو پێشمەرگەیێن رۆژ یێن ھەرێما کوردستانێ گولـلە ل گەریلایێن پەکەکێ رەشاندنە. «باقی» د بەردەوامییا ئاخافتنا خوە دا گۆت، “بێ گومان ڤێ رەوشێ ل رۆژئاڤا ژی دێ سیتاڤا خوە ھەبیت. ژ بەر کو مالباتێن ڤان پێشمەرگەیێن رۆژ ل رۆژئاڤا نە. پرسگرێک د ناڤبەرا مە رۆژئاڤاییان و وان دا دێ ڤەگوهریتە تۆلڤەکرنێ.”
دژمناتیا پەکەکێ لگەل پێشمەرگەیێن رۆژ دا؟
د تەڤاھیا سالا 2021ێ دا پەکەکێ شەرێ تایبەت مەشاند و گەف ل ئۆپۆزسیۆنا رۆژئاڤا و مالباتێن پێشمەرگەیێن رۆژ کرن. ژ بۆ گەلێ رۆژئاڤا دژمناتیا ھەرێما کوردستانێ بکەت و سیستەما تاکەکەسی ل رۆژئاڤا خورت بکەت، ب درەوا گۆت: “7 گەریلایێن مە ل خەلیفانێ ژ ئالیێ پێشمەرگەیێن رۆژ ڤە ھاتن کوشتن” و ب ڤێ بەهانەیێ دەست ب پێڤاژۆیەکا دژبەری بوو باشوور کر. رایەدارێن ھەرێما کوردستانێ دیار کرن کو ل خەلیفان چ پەڤچوونەک چێنەبوویە. ل ئالیێ دن دەولەتا ترک داخویانیەک بەلاڤکربوو کو فرۆکەیێن وان ل خەلیفان-گارە گەریلا تۆپباران کرینە.
دژمناتیا پەکەکێ یا ل ھەمبەر پێشمەرگەیێن رۆژ نە نوویە. گەلەک جاران ژ بۆ تەوانبارکرنا پێشمەرگەیێن رۆژ ل سەر درەوان بەرنامە و نووچە چێکرنە. لێ دهێتە چاڤەرێکرن کو پەکەکە ژ نھا و پێ دا دێ ھەلوەستەکا توندتر ل ھەمبەر پێشمەرگەیێن رۆژ نیشان دەت. ب تایبەتی ژی نەکارینا پەکەکێ یا پێڤاژۆیا ل رۆژئاڤا بمەشینیت و نەرەحەتیا رایا گشتی یا ژ رێڤەبەریا رۆژئاڤا دبیتە سەدەم کو پەکەکە دژمنەکێ ئاشۆپی ئاڤا بکەت و ھەموو پرسگرێکێن خوە ڤەشێریت. رەوشا ئابۆری یا پێشمەرگەیێن رۆژ، پشتەڤانیا کو ژ بۆ مالباتێن خوە یێن ل رۆژئاڤا دکەن، و ھەروەھا ب ناڤ و دەنگی و مەشق و راھێنانێن پێشمەرگەیێن رۆژ، ئاستا پەروەدا بلند، باوەری و پۆپولەربوونا پێشمەرگەیێن رۆژ ل رۆژئاڤا رۆژ ب رۆژ زێدەتر دبیت. ئەڤ رەوشە، ب تایبەتی د وارێ جڤاکی دا، پۆلیتیکایا پەکەکێ یا ب زۆری لەشکەرکرنا شەرڤانان ئاستەنگ دکەت. ئەڤ مژارە ژی پەکەکێ تێخیت ناڤا رەوشەکا دژوار. ب ئاوایەک دن، ئێریشا ل سەر پێشمەرگەیێن رۆژ دێ رێ دەت کو بۆ دەمکێ ل ھەمبەر وێ ئاسێبوونا کو پەکەکە تێدایە، پیچەکێ نەفەسێ بستینیت.
پەکەکە ژ بەر بەرژەوەندیێن خوەیێن رێخستنی خوەدی ئیمکانەکە کو کوردان ل دژی ھەڤ بدەتە شەرکرن. پەکەکە خوەدی پراکتیکەک وەھایە. پەکەکە ژ بۆ کو ئیسال ئەڤ بوویەرە بەردەوام بکەت دخوازیت مالباتێن پێشمەرگەیێن رۆژ بێخیتە رۆژەڤێ. ژ بۆ ڤێ ژی ب ھندەک کەسێن نەحەز وەکو «باقی» دخوازیت جڤاکێ ژ بۆ ڤێ یەکێ ئامادە بکەت.
جەمال شێخ باقی کییە؟
جەمال شەخ باقی سەکرەتەرێ گشتی یێ پەدەکە-سێ یە. ھەر چەندە کو ئەڤ پارتیە ژ بەر ناڤێ خوە وەکو کەڤنەشۆپیا پەدەکێ بهێتە فەھمکرن ژی لێ راستی گەلەک جودایە. پەدەکە-س پارتیەکە کو ژ ئالیێ پەکەکێ و دەولەتا سووریێ ڤە ھاتیە دامەزراندن. ب راستی ئەو پارتیەکە کو تەنێ ژ بۆ سوودوەرگرتنا ژ میراتەیا کەڤنەشۆپیا پەدەکێ یا ل رۆژئاڤا و ژ بۆ روورەشکرنا میراتەیا پەدەکێ ھاتیە ئاڤاکرن.
ئەڤ پارتیە کو د سالێن 1990ێ دا ب پشتگریا ئیستخباراتا سووریێ ھاتیە دامەزراندن، د ناڤا گەل دا ھاتیە تەشھیر کرن وەکو پارتیەکا مالباتی بێ باندۆر ما بوو. جەمال شێخ باقی کو پشتی سالێن 2000ێ بوو سەرۆکێ پارتیێ، ژ ئالیێ گەلێ رۆژئاڤا ڤە وەکە پەیامنێرەکێ ئالیگرێ ئەسەد، یانی کەسەکێ کو لگەل ئیستخباراتا سووریێ دا کار دکەت دھاتە دیتن. ب راستی ئەو کەسە کو د ناڤ گرسەیا پەکەکێ دا، ژ بەر کو بەرێ ناڤێن ھندەک ئەندامێن پەکەکێ دانە دەولەتا سووریێ، ھات بوو تەشھیر کرن. لێ پشتی پێڤاژۆیا تێکدانێن سووریێ، دەولەتا سووریێ ئەرکەکێ نوو دا شێخ باقی. ڤێ جارێ ژی د ناڤ رەفێن پەیەدێ دا جھ گرت.
ھەولدانا پەکەکێ یا ژ بۆ چێکرنا شۆورۆۆم و سیاسەتا فێلبازی
پەکەکێ گەلەک پارتی و رێخستن ئاڤا کرن، دا ووسا دیار بکەت کو ژ ئالیێ گرسەیەکا مەزنا رۆژئاڤا ڤە دهێتە پاشتەڤانیکرن. ژ ئالیێ دن ڤە ژی، ھندەک ناڤێن پارتیێن کو بەرێ ھەبوون خستن بن باندۆرا خوە. د چارچۆڤەیا ڤێ لێکۆلینێ دا کو پێکانینا وێ یا پراکتیکی ژ سازیا پەکەکێ تەڤ-دەمێ ھاتیە دایین، ب پێشەنگیا «ئالدار خەلیل» پێڤاژۆیەکا کۆمێ ھاتە مەشاندن. ژ بۆ ھەر پارتیەکێ بودجەیەک ھاتە دایین. د بەردێلا ڤێ یەکێ دا ژی د چاپەمەنیێ دا ریکلام ژ بۆی ڤان کەسا هاتن کرن و ئەو ھاتن وەرماندن. پشترا پەکەکێ خواست ب کۆمکرنا ھەموو سازیان د بن ناڤێ «پەیەنەدەکێ» دا شۆورۆۆمەک سییاسی چێکەت.
د ڤان دەمێن داوی دا پەکەکە ڤان پێکھاتەیان یەک ب یەک دەردخیت ھۆلێ و وانا ل گۆری بەرژەوەندیێن پارتییا خوە دژ-کورد ددەتە ئاخڤتن.
